കമൽഹാസന്റെ പാർട്ടി പ്രഖ്യാപനം ഫെബ്രുവരി 21 ന്; സംസ്ഥാന പര്യടനവും അന്നേ ദിവസം ആരംഭിക്കും

വാര്‍ത്തകള്‍ തത്സമയം ലഭിക്കാന്‍

കമൽഹാസന്റെ പാർട്ടി പ്രഖ്യാപനം ഫെബ്രുവരി 21 ന്; സംസ്ഥാന പര്യടനവും അന്നേ ദിവസം ആരംഭിക്കും

തമിഴ് രാഷ്ട്രീയത്തിലേക്ക് ചുവട് വെക്കാനൊരുങ്ങുന്ന ഉലകനായകൻ കമൽഹാസൻ തന്റെ പുതിയ രാഷ്ട്രീയ പാർട്ടിയുടെ പേര് ഫെബ്രുവരി 21 ന് പ്രഖ്യാപിക്കും. സംസ്ഥാന വ്യാപകമായി പര്യടനവും അന്നുതന്നെ ആരംഭിക്കും. തമിഴ്‌നാട്ടിലെ രാമനാഥപുരത്ത് നിന്നുമാണ് സംസ്ഥാനയാത്ര ആരംഭിക്കുന്നതിനും കമല്‍ഹാസന്‍ വാര്‍ത്താക്കുറിപ്പിലൂടെ അറിയിച്ചു. 

വിവിധ ഘട്ടങ്ങളിലായാണു പര്യടനം നടക്കുക. കമലിന്റെ ജന്മനാടാണു രാമനാഥപുരം. ഇവിടെനിന്ന് ആരംഭിക്കുന്ന പര്യടനം പിന്നീട് മധുര, ഡിണ്ടിഗല്‍, ശിവഗംഗ എന്നീ ജില്ലകളിലും ഉണ്ടാകും. യാത്ര അവസാനിക്കുന്നതോടെ കമൽഹാസനും തമിഴ് രാഷ്ട്രീയത്തിന്റെ ഭാഗമാകും. 

പര്യടനത്തിന്റെ ആരംഭത്തില്‍ത്തന്നെ രാഷ്ട്രീയ പാര്‍ട്ടിയുടെ പേരു പ്രഖ്യാപിക്കുമെന്നും നയങ്ങളും മുന്നോട്ടു നയിക്കേണ്ട തത്വങ്ങളും പ്രഖ്യാപിക്കുമെന്നും കമല്‍ വ്യക്തമാക്കി. . തമിഴ്‌നാട് രാഷ്ട്രീയത്തില്‍ കുറച്ചുകാലങ്ങളായി നിലനില്‍ക്കുന്ന മാറ്റമില്ലാത്ത അവസ്ഥയെ വെല്ലുവിളിച്ചാണു താന്‍ രംഗത്തിറങ്ങുന്നത്. ഇതിനായി തന്റെ ചിന്തകളും പ്രവൃത്തികളും ജനങ്ങള്‍ക്കൊപ്പം നില്‍ക്കണം. സംസ്ഥാന പര്യടനം കൊണ്ടു ലക്ഷ്യമിടുന്നത് ഇതാണ്. ജനങ്ങള്‍ക്ക് എന്താണു വേണ്ടതെന്നു മനസ്സിലാക്കണം. അവരുടെ പ്രശ്‌നങ്ങള്‍ കണ്ടറിയണം. കമൽഹാസൻ പറയുന്നു.

ഗ്ലാമര്‍ പരിവേഷത്തിലോ വിപ്ലവമുണ്ടാക്കാനോ അല്ല തന്റെ പര്യടനം. ജനങ്ങളെ കണ്ടെത്താനും മനസ്സിലാക്കാനും ഒരു അവസരമായാണ് ഇതിനെ കാണുന്നത്. പല കാര്യങ്ങളെയും ചോദ്യം ചെയ്യാന്‍ തമിഴ്‌നാട്ടിലെ ജനങ്ങള്‍ തയാറാകണം. സംസ്ഥാനത്തെ ക്ഷേമപ്രവര്‍ത്തനങ്ങളും ഭരണനിര്‍വഹണവും ഉയര്‍ത്തിക്കൊണ്ടുവരണം. ഈ ലക്ഷ്യം നേടുന്നതിനാണു തന്റെ പര്യടനം. സംസ്ഥാനത്തെയും രാജ്യത്തെയും ശക്തമാക്കാന്‍ തനിക്കൊപ്പം ചേരാന്‍ കമല്‍ ജനങ്ങളെ ആഹ്വാനം ചെയ്തു.