അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കേരളത്തിലെ ഏറ്റവും പ്രശസ്തമായ സാംസ്കാരിക, കായിക മത്സരങ്ങളിൽ ഒന്നായ നെഹ്‌റു ട്രോഫി വള്ളംകളി, ആയിരക്കണക്കിന് ആളുകളെയാണ് ആകർഷിക്കുന്നത്. ഓളപ്പരപ്പിലെ ഒളിമ്പിക്സ് എന്നറിയപ്പെടുന്ന വള്ളംകളി ചുണ്ടൻ വള്ളങ്ങളുടെ വേഗമേറിയ പോരാട്ടത്തിനാണ് സാക്ഷ്യം വഹിക്കുന്നത്.പട്ടാളച്ചിട്ടയില്‍ പരിശീലനം പൂർത്തിയാക്കിയ തുഴച്ചിലുകാർ പുന്നമടക്കായലിൻ്റെ ഓളപരപ്പിൽ തുഴനീട്ടിയെറിയാനുള്ള അവസാനവട്ട ഒരുക്കത്തിലാണ്. 21 ചുണ്ടൻ വള്ളങ്ങള്‍ ഇത്തവണ മത്സരിക്കും. കർഷകരും മത്സ്യത്തൊഴിലാളികളും മത്സരത്തില്‍ മാറ്റുരച്ചിരുന്ന ഒരു കാലത്തില്‍ നിന്ന് അല്‍പം മാറി, ഇത്തവണ യുവത്വത്തിന്‍റെ കരുത്താകും പുന്നമടയില്‍ കാണാനാകുക. പതിനെട്ടിനും ഇരുപത്തിയഞ്ചിനും ഇടയില്‍ പ്രായമുള്ള തുഴച്ചിലുകാർക്ക് ക്ലബുകള്‍ ഇത്തവണ അവസരമൊരുക്കിയിട്ടുണ്ട്.
അത്ര നിസാരമല്ല ഒരു തുഴക്കാരന്‍റെ തെരഞ്ഞെടുപ്പ് പ്രക്രിയ. ആദ്യം സെലക്ഷൻ ട്രയല്‍, കായിക ക്ഷമതയില്ലാത്തവർ അപ്പോള്‍ തന്നെ ഔട്ട്. പല ക്ലബുകളും നാല് മാസം മുമ്പ് തന്നെ അഭിമുഖവും ശാരീരികക്ഷമതാ പരിശോധനകളും നടത്തിയാണ് മത്സരാർഥികളെ തെരെഞ്ഞെടുത്തിട്ടുള്ളത്. തെരഞ്ഞെടുക്കപ്പെട്ട തുഴക്കാരെ ശാരീരികമായി ഫിറ്റാക്കിയെടുക്കുകയാണ് അടുത്തപടി. ആവശ്യമായ ശരീരഭാരം ഇല്ലാവരുടെ ഭാരം കൂട്ടിയും കൂടുതലുള്ളവരുടെ ഭാരം കുറച്ചും തുഴച്ചിലുകാരെ ഫിറ്റാക്കിയെടുക്കും. ഇക്കാര്യത്തില്‍ ഒരു വിട്ടുവീഴ്‌ചയുമില്ല. ക്യാമ്പ് ഒരുക്കി ഒരു മാസത്തിലേറെ നീണ്ട കഠിനമായ പരിശീലനം പൂർത്തിയാക്കിയാണ് മത്സരാർഥികളെ തുഴച്ചലിനിറക്കുന്നത്.എല്ലാ വള്ളംകളികളിൽ വെച്ചും പുന്നമടക്കായലിൽ നടക്കുന്ന നെഹ്‌റു ട്രോഫി വള്ളംകളിക്കാണ് ഏറ്റവും വലിയ ആരാധകരുള്ളത്. ഈ വർഷത്തെ മത്സരം ഓഗസ്റ്റ് 30-നാണ് നടക്കുന്നത്. മുൻ വർഷങ്ങളെ അപേക്ഷിച്ച് കേരളത്തിന് പുറത്ത് ഈ മത്സരത്തിന് വലിയ താൽപ്പര്യമുണ്ടാകുന്നുണ്ട്. നിരവധി വിദേശ വിനോദസഞ്ചാരികളും ഫോട്ടോഗ്രാഫർമാരും സിനിമാ നിർമ്മാതാക്കളും വരെ വള്ളംകളി നേരിട്ടനുഭവിക്കാൻ ആലപ്പുഴയിലെത്തുന്നു.
വിവിധ വള്ളങ്ങളുടെ വിഭാഗങ്ങളിലായി നിരവധി ടീമുകൾ മത്സരത്തിൽ പങ്കെടുക്കുമ്പോൾ, ഏറ്റവും കൂടുതൽ ആരാധകരുള്ളത് കുട്ടനാട്ടിലെയും സമീപ പ്രദേശങ്ങളിലെയും വിവിധ ഗ്രാമങ്ങളെ പ്രതിനിധീകരിക്കുന്ന ടീമുകൾക്കാണ്. നിലവിലെ ജേതാക്കളായ പള്ളാത്തുരുത്തി ബോട്ട് ക്ലബ്, കുമരകം ടൗൺ ബോട്ട് ക്ലബ്, വില്ലേജ് ബോട്ട് ക്ലബ് കൈനകരി, നിരണം ബോട്ട് ക്ലബ്, വേമ്പനാട് ബോട്ട് ക്ലബ്, യുണൈറ്റഡ് ബോട്ട് ക്ലബ് കൈനകരി എന്നിവയാണ് ഇതിൽ ശ്രദ്ധേയമായ ചില ടീമുകൾ.
ടിക്കറ്റുകൾ എങ്ങനെ ബുക്ക് ചെയ്യാം
1) വെബ്സൈറ്റ് വഴി ഓൺലൈനായി ടിക്കറ്റുകൾ ബുക്ക് ചെയ്യാം.(https://nehrutrophy.nic.in/pages-en-IN/index.php)
2) മത്സര ദിവസം രാവിലെ 8 മണിക്ക് ആലപ്പുഴ ജില്ലാ ടൂറിസ്റ്റ് ഇൻഫർമേഷൻ സെന്ററിലെ (ഡിടിപിസി) അതത് ബാങ്ക് കൗണ്ടറുകളിൽ നിന്ന് ഫിസിക്കൽ ടിക്കറ്റുകൾ വാങ്ങാവുന്നതാണ്.
3) കെഎസ്ആർടിസി വാട്സ്ആപ്പ് നമ്പർ 9846475874 വഴി സീറ്റുകളും പാസുകളും ബുക്ക് ചെയ്യാം.
4) തിരുവനന്തപുരം, കോട്ടയം, കൊല്ലം, എറണാകുളം, പത്തനംതിട്ട എന്നിവിടങ്ങളിലെ കെഎസ്ആർടിസി ബജറ്റ് ടൂറിസം സെല്ലിന്റെ പ്രത്യേക കൗണ്ടറുകളിലും പാസുകൾ ലഭ്യമാണ്.
5) ആലപ്പുഴ, കോഴിക്കോട്, മലപ്പുറം, പാലക്കാട്, തൃശൂർ, എറണാകുളം, കോട്ടയം, തിരുവനന്തപുരം, കൊല്ലം എന്നിവിടങ്ങളിലെ സർക്കാർ ഓഫീസുകളിൽ നിന്നും ടിക്കറ്റുകൾ വാങ്ങാം.
6) ടിക്കറ്റുകളുടെ നിരക്ക് 100 രൂപ മുതൽ 25,000 രൂപ വരെയാണ്.
Advertisement
ടിക്കറ്റ് അനുസരിച്ചുള്ള ഇരിപ്പിട ക്രമീകരണം
പ്ലാറ്റിനം കോർണർ (25,000 രൂപ – 4 പേർക്ക്) – പേ & പാർക്ക് ജെട്ടി, മാളികയിൽ
ടൂറിസ്റ്റ് ഗോൾഡ് (3,000 രൂപ) – ഡിടിപിസി ബോട്ട് ജെട്ടി, കെഎസ്ആർടിസി ബസ് സ്റ്റാൻഡിന് സമീപം
ടൂറിസ്റ്റ് സിൽവർ (2,500 രൂപ) – വാട്ടർ ട്രാൻസ്പോർട്ട് ഡിപ്പാർട്ട്മെന്റ് ബോട്ട് ജെട്ടി
റോസ് കോർണർ (1,500 രൂപ), വിക്ടറി ലൈൻ (500 രൂപ), ലേക്ക് വ്യൂ (200 രൂപ), ലോൺ (100 രൂപ) – ടൂറിസം വകുപ്പ് ഡെപ്യൂട്ടി ഡയറക്ടറുടെ ഓഫീസിനടുത്ത് (കെഎസ്ആർടിസി ബസ് സ്റ്റാൻഡിന് സമീപം)
ഓൾ വ്യൂ (400 രൂപ) – പൊഞ്ഞിക്കര (വാട്ടർ ട്രാൻസ്പോർട്ട് ഡിപ്പാർട്ട്മെന്റിന്റെ റിപ്പയറിംഗ് ഡോക്കിന്റെ കിഴക്ക് ഭാഗം)
വിവിഐപി – ലേക്ക് പാലസ് ജെട്ടി, ലേക്ക് പാലസ് റിസോർട്ടിന് സമീപം
