​”ഇനി ജനങ്ങൾക്കായി നിലകൊള്ളാൻ; ഞാൻ സിനിമ വിടുന്നു” – വികാരഭരിതനായി മലേഷ്യയിൽ നടന്ന ‘ജനനായകൻ’ ഓഡിയോ ലോഞ്ചിൽ വിജയ്

തമിഴക വെട്രി കഴകം സ്ഥാപകനും സൂപ്പർതാരവുമായ വിജയ്, തൻ്റെ അവസാന ചിത്രമായ ‘ജനനായകന്റെ’ ഓഡിയോ ലോഞ്ച് വേദിയിൽ വികാരഭരിതനായി നടത്തിയ പ്രസംഗം ശ്രദ്ധേയമായി.

ആരാധകർക്ക് വേണ്ടി നിലകൊള്ളുന്നതിനായി സിനിമ ഉപേക്ഷിക്കാൻ തീരുമാനിച്ചുവെന്ന് മലേഷ്യയിൽ നടന്ന പ്രൗഢഗംഭീരമായ ചടങ്ങിൽ അദ്ദേഹം പ്രഖ്യാപിച്ചു. താരത്തിൻ്റെ ഈ തീരുമാനം രാഷ്ട്രീയ പ്രവേശനത്തിനായുള്ള ഉറച്ച കാൽവെപ്പായി വിലയിരുത്തപ്പെടുന്നു.

വിജയിയുടെ വാക്കുകളിൽ ആരാധകരോടുള്ള സ്നേഹവും കടപ്പാടും നിറഞ്ഞുനിന്നു. “ഞാൻ സിനിമയിലേക്ക് വന്നപ്പോൾ ഒരു ചെറിയ മണൽ വീട് കെട്ടാനാണ് ആഗ്രഹിച്ചത്. എന്നാൽ നിങ്ങൾ ഓരോരുത്തരും ചേർന്ന് എന്നെ ഒരു കൊട്ടാരമാക്കി വളർത്തി, ഒരു കോട്ട പണിയാൻ സഹായിച്ചു. എനിക്കുവേണ്ടി എല്ലാം ഉപേക്ഷിച്ച ഈ ലക്ഷക്കണക്കിന് ആരാധകർക്ക് വേണ്ടി നിലകൊള്ളാനാണ് ഞാൻ ആഗ്രഹിക്കുന്നത്. അതിനായി ഞാൻ സിനിമ തന്നെ ഉപേക്ഷിക്കുന്നു,” ലക്ഷക്കണക്കിന് വരുന്ന കാണികളെ സാക്ഷിയാക്കി അദ്ദേഹം പറഞ്ഞു.

സിനിമ ജീവിതത്തിൽ നിന്ന് താൽക്കാലികമായി വിട പറയുന്നതിൻ്റെ കാരണം ഈ പ്രസംഗത്തിലൂടെ വ്യക്തമാവുകയായിരുന്നു

കോലാലംപൂരിലെ ബുകിത് ജലീൽ സ്റ്റേഡിയം ‘ദളപതി തിരുവിഴ’ എന്ന പേരിൽ നടന്ന ഈ ഓഡിയോ ലോഞ്ചിനായി ശനിയാഴ്ച സാക്ഷ്യം വഹിച്ചു. ഒരു ലക്ഷത്തോളം ആരാധകർ പങ്കെടുത്ത പരിപാടി വൻ വിജയമായി മാറി.

ഇത്രയധികം ആളുകൾ പങ്കെടുത്ത ചടങ്ങ് മലേഷ്യൻ ബുക്ക് ഓഫ് റെക്കോർഡ്സിൽ ഇടംനേടി. ശ്രീലങ്കയ്ക്ക് ശേഷം ലോകത്ത് ഏറ്റവും കൂടുതൽ തമിഴ് വംശജർ താമസിക്കുന്ന രാജ്യമായ മലേഷ്യയിലെ ആരാധകരോട് താരം പ്രത്യേക നന്ദി അറിയിക്കുകയും ചെയ്തു.

രാഷ്ട്രീയ പ്രവേശനത്തെ സൂചിപ്പിക്കുന്ന ശക്തമായ വാക്കുകളും വിജയ് പങ്കുവെച്ചു. “നിങ്ങൾക്ക് ജീവിതത്തിൽ വിജയിക്കണമെങ്കിൽ സുഹൃത്തുക്കളെ ആവശ്യമില്ല, കരുത്തനായ ഒരു ശത്രുവിനെയാണ് വേണ്ടത്. ശക്തനായ ശത്രു ഉള്ളപ്പോൾ നിങ്ങളും കരുത്തനാകും. അതുകൊണ്ട്, 2026 ചരിത്രം ആവർത്തിക്കും.

അതിനെ ജനങ്ങൾക്കുവേണ്ടി സ്വാഗതം ചെയ്യാൻ നിങ്ങൾ തയ്യാറായിക്കോളൂ,” അദ്ദേഹം പറഞ്ഞു. ആറു മണിക്കൂർ നീണ്ട പരിപാടിക്ക് കനത്ത സുരക്ഷയാണ് ഒരുക്കിയിരുന്നത്. ഗായകരായ ടിപ്പു, അനുരാധ ശ്രീറാം, സൈന്ദ്വി എന്നിവരുടെ നേതൃത്വത്തിൽ സംഗീത വിരുന്നും അരങ്ങേറി.

വിജയിയുടെ രാഷ്ട്രീയ പ്രവേശന പ്രഖ്യാപനത്തിന് മുന്നോടിയായെത്തുന്ന ഈ ചിത്രം ജനുവരി 9-നാണ് ലോകമെമ്പാടും റിലീസ് ചെയ്യുന്നത്. പൂജ ഹെഗ്‌ഡെ, ബൈജു, ബോബി ഡിയോൾ, പ്രകാശ് രാജ്, ഗൗതം മേനോൻ, പ്രിയാമണി, നരൻ തുടങ്ങി വൻ താരനിര അണിനിരക്കുന്ന ‘ജനനായകൻ’ ഇതിനോടകം തന്നെ പ്രേക്ഷകർക്കിടയിൽ വലിയ തരംഗം സൃഷ്ടിച്ചു കഴിഞ്ഞു.