അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കല്‍പറ്റ: രഞ്ജിത്ത് ശ്രീനിവാസന്‍ വധക്കേസിലെ കോടതി വിധി പോപ്പുലർ ഫ്രണ്ടിനെ സഹായിച്ചവര്‍ക്കും എതിരാണെന്ന് ബിജെപി സംസ്ഥാന പ്രസിഡന്റ് കെ.സുരേന്ദ്രന്‍. ലോക്‌സഭാ മണ്ഡലങ്ങളിലൂടെ നടത്തുന്ന പദയാത്രയുടെ ഭാഗമായി വയനാട്ടില്‍ എത്തിയ അദ്ദേഹം കല്‍പറ്റയില്‍ നടത്തിയ വാർത്താ സമ്മേളനത്തിലാണ് ഇക്കാര്യം പറഞ്ഞത്. കോടതി വിധി സ്വാഗതാര്‍ഹമാണെന്നും അദ്ദേഹം പറഞ്ഞു. കുടുംബത്തിന് നീതി ലഭിച്ചു. അഭിഭാഷക സംഘം അഭിനന്ദനം അര്‍ഹിക്കുന്നു. കുറ്റവാളികള്‍ക്ക് അര്‍ഹമായ ശിക്ഷ ലഭിച്ചു. കീഴ്‌ക്കോടതി വിധി മേല്‍ക്കോടതിയില്‍ ലഘൂകരിക്കാതിരിക്കുന്നതില്‍ ജാഗ്രത ഉണ്ടാകണം.
എംപി എന്ന നിലയില്‍ രാഹുല്‍ഗാന്ധി പരാജയമാണ്. മണ്ഡലത്തിനായി അദ്ദേഹത്തിന് ഒന്നും ചെയ്യാനായില്ല. സ്വന്തം പ്രയത്‌നം കൊണ്ടു വന്നതാണെന്നു ചൂണ്ടിക്കാട്ടാന്‍ ഒരു പദ്ധതി പോലും ഇല്ല. മണ്ഡലത്തില്‍ എത്തിയാല്‍ ഭക്ഷണം കഴിച്ച് യോഗങ്ങളില്‍ പങ്കെടുത്ത് പോകുകയാണ് എംപി ചെയ്യുന്നത്. ലോക്‌സഭാ തിരഞ്ഞെടുപ്പില്‍ വയനാട് മണ്ഡലത്തില്‍ എൻഡിഎ ശക്തമായ മത്സരം കാഴ്ചവയ്ക്കും. മണ്ഡലത്തില്‍ ബിജെപി പ്രതിനിധിയെ സ്ഥാനാര്‍ഥിയാക്കുന്നതിനെക്കുറിച്ച് എന്‍ഡിഎ ആലോചിച്ചുവരികയാണ്.
