അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മലര്‍വാടി ആട്‌സ് ക്ലബ്ബ്, പ്രണയം തുടങ്ങിയ സിനിമകളിലൂടെ ശ്രദ്ധേയായ നടി അപൂര്‍വ ബോസിന്റെ വിവാഹവിഡിയോയാണ് സമൂഹമാധ്യമങ്ങളിൽ ശ്രദ്ധേയമാകുന്നത്.
അടുത്ത സുഹൃത്തായിരുന്ന ധിമൻ തലപത്രയാണ് അപൂർവയുടെ വരൻ. ധിമന്റെ വീട്ടുകാരുടെ ആചാരപ്രകാരമുള്ള ബംഗാളി വെഡ്ഡിങ് വിഡിയോ ആണ് പുറത്തുവന്നിരിക്കുന്നത്.
ഡിസംബർ മാസം രാജസ്ഥാനിൽവച്ചായിരുന്നു വിവാഹം. ചടങ്ങിൽ വധൂവരന്മാർ ബീജ് നിറത്തിലെ വസ്ത്രങ്ങളാണ് തിരഞ്ഞെടുത്തത്. അപൂർവയുടേത് സാരിയും, ധിമന്റേത് കുർത്തയുമായിരുന്നു. രസകരമായ ചടങ്ങുകളും നടന്നു.
കഴിഞ്ഞ വർഷം മെയ് മാസം രണ്ടുപേരും വീട്ടുകാരുടെ സാന്നിധ്യത്തിൽ റജിസ്റ്റർ വിവാഹം നടത്തിയിരുന്നു. രണ്ടു വ്യത്യസ്ത പശ്ചാത്തലങ്ങളിൽ നിന്നും വരുന്ന ഇരുവർക്കും അന്ന് ആചാരപ്രകാരമുള്ള വിവാഹം നടത്താൻ ലഭിച്ച സമയക്കുറവാണ് റജിസ്റ്റർ വിവാഹത്തിൽ എത്തിച്ചത്.
പ്രണയ വിവാഹമാണ് ഇവരുടേതും. ഇക്കുറി ഭർത്താവിന്റെ ആചാരപ്രകാരമാണ് അപൂർവയുടെ വിവാഹം നടന്നത്. കുടുംബത്തിലെ ചില മുതിർന്ന അംഗങ്ങളുടെ ആരോഗ്യസ്ഥിതി പരിഗണിച്ചാണ് അന്ന് പെട്ടെന്നൊരു വിവാഹം നടത്തേണ്ട സാഹചര്യം ഒത്തുവന്നത്. ശേഷം രണ്ടുപേരും അമ്പലത്തിൽ വച്ചൊരു മാലയിടൽ ചടങ്ങും നടത്തിയിരുന്നു.
‘പത്മശ്രീ ഡോക്ടര്‍ സരോജ് കുമാര്‍’, ‘പൈസ പൈസ’, ‘പകിട’, ‘ഹേയ് ജൂഡ്’ തുടങ്ങിയ ചിത്രങ്ങളിലും അപൂര്‍വ വേഷമിട്ടിട്ടുണ്ട്. സ്വിറ്റ്‌സര്‍ലന്‍ഡിലെ ജനീവയിലാണ് അപൂര്‍വ ഇപ്പോള്‍ താമസം. അവിടെ യൂനൈറ്റഡ് നേഷന്‍സ് എന്‍വിയോണ്‍മെന്റ് പ്രോഗ്രാം കമ്മ്യൂണിക്കേഷന്‍ കണ്‍സള്‍ട്ടന്റായി ജോലി ചെയ്യുകയാണ് അപൂര്‍വ.
ഇന്റര്‍നാഷനല്‍ ലോയില്‍ ബിരുദാനന്തര ബിരുദം പൂര്‍ത്തിയാക്കിയാണ് യുണൈറ്റഡ് നേഷന്‍സില്‍ നടി ജോലിക്കു പ്രവേശിച്ചത്.
