അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
തിരുവനന്തപുരം: കേരള നിയമസഭാ പുസ്തകോത്സവത്തിന്റെ ഭാഗമായി നടന്ന കെ.എൽ.ഐ.ബി.എഫ് ഡയലോഗ്സ് സെഷനിൽ ‘പുതിയ കാലം, പുതിയ എഴുത്ത്’ എന്ന വിഷയത്തിൽ എഴുത്തുകാരായ ടി.ഡി. രാമകൃഷ്ണനും വി.ജെ. ജെയിംസും സംവദിച്ചു. തങ്ങൾ എഴുതിത്തുടങ്ങിയ കാലം മുതൽ ഇപ്പോൾ വരെ എഴുത്തിൽ ഉണ്ടായ മാറ്റത്തെക്കുറിച്ച് ഇരുവരും സംസാരിച്ചു.
വളരെ വൈകിയാണ് താൻ എഴുത്തിന്റെ ലോകത്തേക്ക് എത്തിയതെന്നും തന്റെയുള്ളിലെ ഭ്രാന്തൻ ചിന്തകളിൽ നിന്നും ഉണ്ടായതാണ് ആൽഫ എന്ന ആദ്യ നോവലെന്നും ടി.ഡി. രാമകൃഷ്ണൻ പറഞ്ഞു. സാഹിത്യത്തിലെ മാറ്റങ്ങൾ അനുസരിച്ച് മുന്നോട്ട് പോകുന്നതാണ് നല്ലത്. ഏറ്റവും പുതിയ കാലത്തെ എഴുത്ത് എങ്ങനെയാണെന്ന് നോക്കാറുണ്ട്. എഴുത്തിൽ ചരിത്രം ഒരു പ്രധാന ഘടകമാണ്. ചരിത്രത്തെ ഉപയോഗിച്ചുകൊണ്ട് സർഗാത്മകതയുടെ സാധ്യതകൾ അന്വേഷിക്കാനാകും. ചരിത്രത്തിൽ പൂരിപ്പിക്കപ്പെടാതെ കിടക്കുന്ന ഒരുപാട് ഇടങ്ങളുണ്ട്. ഭാവനകൊണ്ട് അവിടേക്ക് എത്തിച്ചേരാൻ കഴിയും. ചരിത്രത്തിൽ നിന്നും പുറത്താക്കപ്പെട്ട വലിയ വിഭാഗം ആളുകൾക്ക് വേണ്ടി സംസാരിക്കാനുള്ള അവസരമായാണ് എഴുത്തിനെ കാണുന്നത്. ചരിത്രത്തെ ചേർത്തുനിർത്തിക്കൊണ്ട് നോവലിലേക്ക് കടക്കുമ്പോൾ പലതരം സാധ്യതകളാണ് തുറന്നുവരുന്നത്. അതിനോടൊപ്പം തന്നെ സാമൂഹിക- രാഷ്ട്രീയ ഇടപെടലായും മാറാം. നൂറുകൊല്ലം കഴിഞ്ഞുള്ള ചരിത്രത്തിൽ നമ്മൾ നിലനിൽക്കുമോ എന്ന് സംശയമുണ്ട്. നിർദാക്ഷണ്യം പുറത്താക്കപ്പെടുന്നവരുടെ ചരിത്രം അടയാളപ്പെടുത്താനുള്ള വഴിയാണ് എഴുത്തെന്ന് അദ്ദേഹം അഭിപ്രായപ്പെട്ടു.
വായനയാണ് സാഹിത്യത്തിലേക്ക് അടുപ്പിച്ചതെന്നും കുട്ടിക്കാലത്ത് എഴുതാൻ ശ്രമിച്ച് പരാജയപ്പെട്ടുവെന്നും വി.ജെ. ജെയിംസ് പറഞ്ഞു. എൻജിനിയർ ആയതിനാൽ ഉള്ളിൽ കൃത്യതയുടെ ഭാഷയുണ്ട്. നോവൽ എഴുതുമ്പോൾ പല കഥാപാത്രങ്ങളും സൃഷ്ടിക്കപ്പെടുന്നുണ്ട്. അങ്ങനെ കഥാപാത്രങ്ങളെയെല്ലാം ഒരു നൂലിൽ കോർത്തിണക്കണം എന്നുള്ള ചിന്ത എഴുതുമ്പോൾ ഉണ്ടാകാറുണ്ട്. അത് എൻജിനിയറിങ് മനസ്സുള്ളതുകൊണ്ടാണെന്ന് അദ്ദേഹം പറഞ്ഞു.
ജനിക്കുകയും മരിക്കുകയും ചെയ്യുന്ന സ്വത്വം മാത്രമാണോ മനുഷ്യൻ എന്ന ചിന്തയിലൂടെ ജനനം ഒരു വലിയ സാഹചര്യമാണെന്ന് മനസ്സിലായാതായി അദ്ദേഹം പറഞ്ഞു. സ്ഥലകാലങ്ങളിൽ നമ്മൾ അടിഞ്ഞുകിടക്കുന്നതായി തോന്നിയിട്ടുണ്ട്. ശാസ്ത്രവും ഫിലോസഫിയും കൂടിച്ചേരുന്ന ഒരു ബിന്ദുവാണ് ഞാൻ അന്വേഷിക്കുന്നത്. കൂടാതെ വിശ്വാസവും അവിശ്വാസവും തമ്മിൽ വ്യത്യാസമുണ്ടെന്ന് തോന്നുമെങ്കിലും അവിശ്വാസവും ഒരു വിശ്വാസമാണെന്ന് അദ്ദേഹം അഭിപ്രായപ്പെട്ടു.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
