അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
സംവരണത്തിനായി മഹാരാഷ്ട്രയിൽ മറാഠാ പ്രക്ഷോഭം വീണ്ടും സജീവമാകുന്നു. സംവരണം ആവശ്യപ്പെട്ട് ജൽന ജില്ലയിൽ നിരാഹാരം നടത്തുന്നവർക്കെതിരെ പൊലീസ് നടത്തിയ ലാത്തിച്ചാർജാണ് പ്രക്ഷോഭം ആളിക്കത്തിച്ചത്. സംസ്ഥാനത്ത് പല മേഖലകളിലും മറാഠകൾ സമരപാതയിലാണ്.
സംസ്ഥാന ജനസംഖ്യയുടെ 32% വരുന്ന പ്രബല സമുദായമായ മറാഠകൾ സർക്കാരിനെതിരെ തിരിഞ്ഞാൽ എൻഡിഎയുടെ കണക്കുകൂട്ടലുകൾ തെറ്റും. സാഹചര്യം പരമാവധി മുതലാക്കാനുള്ള ശ്രമം കോൺഗ്രസും ശരദ് പവാറിന്റെ നേതൃത്വത്തിലുള്ള എൻസിപിയും ഉദ്ധവ് പക്ഷവും തുടങ്ങിക്കഴിഞ്ഞു. ശരദ് പവാറും ഉദ്ധവ് താക്കറെയും കോൺഗ്രസ് നേതാവ് അശോക് ചവാനും ലാത്തിച്ചാർജിൽ പരുക്കേറ്റവരെ ജൽന ജില്ലയിലെത്തി സന്ദർശിച്ചു.
ശിവസേന, എൻസിപി എന്നീ പാർട്ടികളെ പിളർത്തി എൻഡിഎയുടെ കരുത്തു കൂട്ടിയ ബിജെപിയുടെ ആത്മവിശ്വാസം ഉയർന്നു നിൽക്കവെയാണ് അപ്രതീക്ഷിതമായി സംവരണം വെല്ലുവിളിയായത്. കേന്ദ്ര, സംസ്ഥാന തിരഞ്ഞെടുപ്പുകൾ ഒരുമിച്ചു നടത്താനുള്ള നീക്കത്തെ സ്വാഗതം ചെയ്ത ബിജെപി-ശിവസേന (ഷിൻഡെ)-എൻസിപി (അജിത് പവാർ) ഭരണമുന്നണി ഇതോടെ മറാഠകളെ അനുനയിപ്പിക്കാനുള്ള നീക്കം സജീവമാക്കി.
ആഭ്യന്തരവകുപ്പിന്റെ ചുമതല വഹിക്കുന്ന ഉപമുഖ്യമന്ത്രി ദേവേന്ദ്ര ഫഡ്നാവിസിന്റെ രാജി മൂന്നു പാർട്ടികളും ആവശ്യപ്പെട്ടു. കോൺഗ്രസ് ആരംഭിക്കാനിരുന്ന ജനസംവാദ യാത്ര പ്രക്ഷോഭത്തിന്റെ പശ്ചാത്തലത്തിൽ മാറ്റിവച്ചു. സംവരണ ആവശ്യവുമായി ജൽന ജില്ലയിൽ മറാഠ നേതാവ് മനോജ് ജരാകെ പാട്ടീലിന്റെ നേതൃത്വത്തിൽ നടത്തിയ നിരാഹാരസമരത്തിനിടെ വെള്ളിയാഴ്ച കല്ലേറുണ്ടാവുകയും തുടർന്ന് പൊലീസ് ലാത്തിച്ചാർജ് നടത്തുകയും ചെയ്തതാണ് പ്രശ്നം രൂക്ഷമാക്കിയത്.
7 ജില്ലകളിൽ ബന്ദ് ആചരിച്ച സമരക്കാർ സർക്കാർ വാഹനങ്ങളും പൊലീസ് വാഹനങ്ങളും ആക്രമിച്ചു. 15 ബസുകൾ അഗ്നിക്കിരയാക്കി. കല്ലേറിൽ 40 പൊലീസുകാർക്കു പരുക്കുണ്ട്. 350 പേർക്കെതിരെ കേസെടുത്തു. മുംബൈ അടക്കം പലയിടത്തും ഇന്നലെയും പ്രതിഷേധം തുടർന്നു. നീണ്ട സമരങ്ങളെത്തുടർന്ന് 2018ൽ മറാഠകൾക്ക് 16% സംവരണം നൽകി നിയമസഭ ബിൽ പാസാക്കിയിരുന്നു. ഇത് ഭേദഗതികളോടെ ബോംബെ ഹൈക്കോടതിയും അംഗീകരിച്ചെങ്കിലും സുപ്രീംകോടതി 2021ൽ സംവരണം റദ്ദാക്കുകയായിരുന്നു.
