അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
മാഡ്രിഡ്: ലാ ലിഗ മത്സരത്തിനിടെ റയല്‍ മാഡ്രിഡിന്റെ ബ്രസീല്‍ താരം വിനീഷ്യസ് ജൂനിയറിനെ വംശീയമായി അധിക്ഷേപിച്ച സംഭവത്തില്‍ മൂന്ന് യുവാക്കളെ സ്പാനിഷ് പോലീസ് അറസ്റ്റ് ചെയ്തു. 18-നും 21 വയസിനും ഇടയില്‍ പ്രായമുള്ളവരാണ് മൂന്ന് പേരും. ചൊവ്വാഴ്ചയായിരുന്നു അറസ്റ്റ്.
കഴിഞ്ഞ ജനുവരിയിൽ റയലും അത്‌ലറ്റികോയും തമ്മിലുള്ള മത്സരത്തിനു മുൻപ് റയൽ മാഡ്രിഡിന്റെ പരിശീലന മൈതാനത്തിന് അടുത്തുള്ള പാലത്തില്‍ വിനീഷ്യസിന്‍റെ കോലം തൂക്കിയ സംഭവത്തിൽ നാല് പേരെ പോലീസ് അറസ്റ്റ് ചെയ്തിരുന്നു.
ഞായറാഴ്ച ലാ ലിഗയില്‍ റയല്‍ മാഡ്രിഡും വലന്‍സിയയും തമ്മിലുള്ള മത്സരത്തിനിടെയാണ് വിനീഷ്യസ് വംശീയ അധിക്ഷേപത്തിന് ഇരയായത്. വലന്‍സിയയുടെ മെസ്റ്റാല്ല സ്റ്റേഡിയത്തിലായിരുന്നു മത്സരം. വനീഷ്യസിനെ കുരങ്ങനെന്ന് വിളിച്ചായിരുന്നു അധിക്ഷേപം. വിനീഷ്യസിന്‍റെ കാലില്‍ പന്ത് കിട്ടുമ്പോഴെല്ലാം സ്‌റ്റേഡിയത്തില്‍ കുരങ്ങ് വിളികള്‍ ഉയര്‍ന്നു.
റഫറിയോടു പരാതിപ്പെട്ട വിനീഷ്യസ് പിന്നീട് റയൽ കോച്ച് കാർലോ അഞ്ചലോട്ടിയോടും ബുദ്ധിമുട്ട് അറിയിച്ചു. തന്നെ കുരങ്ങനെന്ന് വിളിച്ചയാളെ റഫറിക്ക് വിനീഷ്യസ് ചൂണ്ടിക്കാണിച്ചതോടെ ആ ഭാഗത്തിരുന്ന കാണികള്‍ ഒന്നാകെ അധിക്ഷേപം ചൊരിഞ്ഞു. ഇതേത്തുടര്‍ന്ന് മത്സരം 10 മിനിറ്റോളം തടസപ്പെട്ടു.
മത്സരത്തിൽ റയൽ മാഡ്രിഡ് 1-0നു പരാജയപ്പെടുകയും 90+7-ാം മിനിറ്റിൽ നേരിട്ടുള്ള ചുവപ്പുകാർഡിലൂടെ വിനീഷ്യസ് പുറത്താകുകയും ചെയ്തിരുന്നു. മത്സരശേഷം ബ്രസീൽ താരം തനിക്കുനേരിട്ട വംശീയാധിക്ഷേപത്തിനെതിരെ ശക്തമായി സമൂഹമാധ്യമത്തിലൂടെ പ്രതികരിക്കുകയും ചെയ്തു.
ഇത് ആദ്യത്തെ സംഭാവമല്ലെന്നും ലാ ലിഗയില്‍ വംശീയാധിക്ഷേപം സാധാരണമാണെന്നും വിനീഷ്യസ് കുറിച്ചു. ഒരുകാലത്ത് റൊണാള്‍ഡീഞ്ഞ്യോ, റൊണാള്‍ഡോ, ക്രിസ്റ്റ്യാനോ റൊണാള്‍ഡോ, ലയണല്‍ മെസ്സി എന്നിവരുടേതായിരുന്ന ഈ ചാമ്പ്യന്‍ഷിപ്പ് ഇപ്പോള്‍ വംശവെറിയന്‍മാരുടേതാണെന്നും വിനീഷ്യസ് തുറന്നടിച്ചു.
സംഭവത്തില്‍ പ്രതിഷേധമറിയിച്ച് ബ്രസീല്‍ സര്‍ക്കാരും രംഗത്തെത്തിയിരുന്നു. സ്പാനിഷ് അംബാസഡര്‍ക്ക് മുന്നില്‍ പ്രതിഷേധമറിയിച്ച ബ്രസീല്‍ സര്‍ക്കാര്‍ ലാ ലിഗ അധികൃതര്‍ക്ക് മുന്നില്‍ ഔദ്യോഗികമായി പരാതി നല്‍കും. സംഭവത്തില്‍ ലാ ലിഗയും സ്പാനിഷ് സര്‍ക്കാരും അന്വേഷണത്തിന് ഉത്തരവിട്ടിട്ടുണ്ട്.
