അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
അഹമ്മദാബാദ്: ഐപിഎല്‍ പതിനാറാം സീസണില്‍ സണ്റൈസേഴ്സ് ഹൈദരാബാദിനെ തകര്‍ത്ത് നിലവിലെ ചാമ്പ്യന്‍മാരായ ഗുജറാത്ത് ടൈറ്റന്‍സ് പ്ലേ ഓഫിലെത്തുന്ന ആദ്യ ടീമായി. 189 റണ്‍സ് വിജയലക്ഷ്യം തേടിയിറങ്ങിയ ഹൈദരാബാദിന് 20 ഓവറില്‍ 9 വിക്കറ്റിന് 154 റണ്‍സേ നേടാനായുള്ളൂ. അർധസെഞ്ചുറി നേടിയ ഹെന്‍‍റിച്ച് ക്ലാസന് മാത്രാണ് സണ്റൈസേഴ്സ് ബാറ്റിംഗ് നിരയില്‍ കാര്യമായി എന്തെങ്കിലും ചെയ്യാനായത്. മുഹമ്മദ് ഷമിയും മോഹിത് ശർമ്മയും നാല് വീതം വിക്കറ്റ് നേടി. തോല്‍വിയോടെ സണ്റൈസേഴ്സ് ഹൈദരാബാദ് പ്ലേ ഓഫ് കാണാതെ പുറത്തായി.
മറുപടി ബാറ്റിംഗില്‍ സ്റ്റാര്‍ പേസര്‍ മുഹമ്മദ് ഷമി തകര്‍ത്തെറിഞ്ഞതോടെ സണ്റൈസേഴ്സ് ബാറ്റിംഗ് നിര കൂട്ടത്തകര്‍ച്ച നേരിട്ടു. ഇന്നിംഗ്‌സിലെ അഞ്ചാം പന്തില്‍ അമോല്‍പ്രീത് സിംഗിനെ(4 പന്തില്‍ 5) റാഷിദ് ഖാന്‍റെ കൈകളില്‍ എത്തിച്ചാണ് ഷമി തുടങ്ങിയത്. പിന്നാലെ അഭിഷേക് ശര്‍മ്മയെ(5 പന്തില്‍ 4) യഷ് ദയാല്‍ സാഹയുടെ കൈകളില്‍ എത്തിച്ചു. രാഹുല്‍ ത്രിപാഠി(2 പന്തില്‍ 1), ക്യാപ്റ്റന്‍ ഏയ്‌ഡന്‍ മാര്‍ക്രം(10 പന്തില്‍ 10) എന്നിവരേയും ഷമി മടക്കിയപ്പോള്‍ സന്‍വീര്‍ സിംഗിനെയും(6 പന്തില്‍ 7), അബ്‌ദുല്‍ സമദിനേയും(3 പന്തില്‍ 4) മോഹിത് ശര്‍മ്മ മടക്കി. ഇതോടെ 6.4 ഓവറില്‍ 49-6 എന്ന നിലയില്‍ സണ്റൈസേഴ്സ് പതറി.
ഇതിന് ശേഷം മാര്‍ക്കോ യാന്‍സനെ(6 പന്തില്‍ 3) പുറത്താക്കി മോഹിത് ശര്‍മ്മ മൂന്ന് വിക്കറ്റ് തികച്ചു. എന്നാല്‍ ഭുവനേശ്വർ കുമാറിനെ കൂട്ടുപിടിച്ച് വെടിക്കെട്ട് നടത്തിയ ഹെന്‍‍റിച്ച് ക്ലാസന് സണ്‍റൈസേഴ്സിന് പ്രതീക്ഷ നല്‍കി. 44 പന്തില്‍ 64 റണ്‍സെടുത്ത് നില്‍ക്കേ ക്ലാസനെ മില്ലറുടെ കൈകളിലെത്തിച്ച് ഷമി നാല് വിക്കറ്റ് തികച്ചതോടെ ടൈറ്റന്‍സ് ജയമുറപ്പിച്ചു. 26 പന്തില്‍ 27 റണ്‍സെടുത്ത ഭുവിയെ മോഹിത് ശർമ്മ റാഷിദിന്‍റെ കൈകളിലാക്കി. 20 ഓവറും പൂർത്തിയാകുമ്പോൾ മായങ്ക് മർക്കാണ്ഡെയും(9 പന്തിൽ 18), ഫസൽഹഖ് ഫറൂഖിയും(5 പന്തിൽ 1) പുറത്താവാതെ നിന്നു.
നേരത്തെ, ഭുവനേശ്വര്‍ കുമാറിന്‍റെ അഞ്ച് വിക്കറ്റ് പ്രകടനത്തിന് മുന്നില്‍ ഫിനിഷിംഗ് പിഴച്ച ഗുജറാത്ത് ടൈറ്റന്‍സിന് 20 ഓവറില്‍ 9 വിക്കറ്റിന് 188 റണ്‍സാണ് നേടാനായത്. ശുഭ്‌മാന്‍ ഗില്ലിന്‍റെ സെഞ്ചുറിക്കരുത്തില്‍ ഗുജറാത്ത് ടൈറ്റന്‍സ് 20 ഓവറില്‍ 9 വിക്കറ്റിന് 188 റണ്‍സെടുത്തു. ഗില്ലിന്‍റെ മിന്നല്‍ സെഞ്ചുറിക്കൊപ്പം(58 പന്തില്‍ 101), സായ് സുദര്‍ശന്‍റെ(36 പന്തില്‍ 47) കൂട്ടുകെട്ടാണ് ഗുജറാത്തിനെ പൊരുതാനുള്ള സ്കോറിലേക്കെത്തിച്ചത്.
36 പന്തില്‍ 6 ഫോറും ഒരു സിക്‌സും സഹിതം സായ് സുദര്‍ശന്‍ 47 റണ്‍സ് നേടി. പാണ്ഡ്യ(6 പന്തില്‍ 8) രാഹുല്‍ ത്രിപാഠിയുടെ ക്യാച്ചില്‍ പുറത്തായി. 5 പന്തില്‍ 7 റണ്‍സ് നേടിയ ഡേവിഡ് മില്ലറെ ടി നടരാജനും 3 പന്തില്‍ മൂന്ന് നേടിയ രാഹുല്‍ തെവാട്ടിയയെ ഫസല്‍ഹഖ് ഫറൂഖിയും പുറത്താക്കി. റാഷിദ് ഖാനും(1 പന്തില്‍ 0) വേഗത്തിൽ പുറത്തായപ്പോള്‍ മൂന്നാം ബോളില്‍ നൂര്‍ അഹമ്മദിനെ ഭുവനേശ്വർ റൺഔട്ടാക്കി.
