അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
സിവിവി രഹിത സംവിധാനവുമായി പേയ്മെന്റ് നെറ്റ്‌വർക്ക് കമ്പനിയായ വിസ. ഉപഭോക്താക്കളുടെ കാർഡ് ടോക്കണൈസ് ചെയ്തിട്ടുണ്ടെങ്കിൽ, കാർഡ് ഹോൾഡർക്ക്, വെരിഫിക്കേഷനുവേണ്ടി സിവിവി നൽകാതെ തന്നെ ഓൺലൈൻ ഇടപാടുകൾ നടത്താൻ കഴിയും.
ഉപഭോക്താക്കൾക്ക് സുരക്ഷിതമായി ഓൺലൈൻ ട്രാൻസാക്ഷൻ നടത്താൻ സാധിക്കുന്നതരത്തിലാണ് ഓൺലൈൻ ഇടപാടുകൾക്ക് സിവിവി ഫ്രീ സംവിധാനമൊരുക്കിയിരിക്കുന്നത്. ടോക്കണൈസേഷൻ സംബന്ധിച്ച റിസർവ് ബാങ്ക് ഓഫ് ഇന്ത്യയുടെ (ആർബിഐ) മാർഗ്ഗനിർദ്ദേശങ്ങൾക്കനുസൃതമായാണ് പുതിയ നീക്കമെന്നും വിസ വാർത്താക്കുറിപ്പിൽ അറിയിച്ചു.
ടോക്കണൈസേഷൻ എന്നത് യഥാർത്ഥ കാർഡ് വിശദാംശങ്ങൾക്കു പകരം ടോക്കണുകൾ എന്നു വിശേഷിപ്പിക്കപ്പെടുന്ന കോഡുകളിൽ ഇടപാടുകൾ സാധ്യമാക്കുന്ന മാർഗമാണ്. ഇവിടെ ഓരോ ഇടപാടിനും വ്യത്യസ്ത കോഡുകൾ ജനറേറ്റ് ചെയ്യപ്പെടും. അതായത് ഉപഭോക്താവ് സാധനസാമഗ്രികൾ വാങ്ങിക്കുമ്പോൾ ഒരിക്കൽ ജനറേറ്റ് ചെയ്ത കോഡ് മറ്റൊരു സന്ദർഭത്തിൽ ഉപയോഗിക്കാൻ സാധിക്കില്ല.
ഓരോ തവണയും ഇടപാട് നടത്തുമ്പോൾ 16 അക്ക ഡെബിറ്റ് അല്ലെങ്കിൽ ക്രെഡിറ്റ് കാർഡ് നമ്പർ, സിവിവി, കാലാവധി തീയതി തുടങ്ങിയ വിശദാംശങ്ങൾ ഉപഭോക്താവിന് നൽകേണ്ടതിന്റെ ആവശ്യകത ടോക്കണൈസേഷൻ നീക്കം ചെയ്യുന്നു. കൂടാതെ ഇത് സൈബർ തട്ടിപ്പുകളിൽ നിന്ന് ഉപയോക്താവിനെ സുരക്ഷിതമാക്കുകയും ചെയ്യുന്നു.
ഓൺലൈൻ ഇടപാടുകൾ വഴിയുള്ള തട്ടിപ്പുകൾ വർധിക്കുന്ന സാഹചര്യത്തിലാണ് സുരക്ഷ മുൻനിർത്തി ആർബിഐ ടോക്കണൈസേഷൻ നടപ്പാക്കിയത്. ടോക്കണൈസേഷൻ വഴി ക്രെഡിറ്റ്, ഡെബിറ്റ് കാർഡ് വിവരങ്ങൾ വ്യാപാരികളിൽ നിന്നു സംരക്ഷിക്കപ്പെടും.
