അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
കൊച്ചി : ഹൈക്കോടതി ജാമ്യം അനുവദിച്ച പോക്സോ കേസ് പ്രതി വിധി വരുന്ന ദിവസം കോടതിയിൽ ഹാജരാവാതെ മുങ്ങി. 14 വയസ്സുകാരിയെ വീട്ടിൽ അതിക്രമിച്ച് കയറി കഴുത്തിൽ കത്തി വെച്ച് കൊല്ലുമെന്ന് ഭീഷണിപ്പെടുത്തി പീഡിപ്പിച്ച് ഗർഭിണിയാക്കിയ കേസിലെ പ്രതി വെസ്റ്റ് ബംഗാൾ മുർഷിദാബാദ് സ്വദേശി
റൂഹുൽ അമീൻ (32) ആണ് വിധി വരുന്ന ദിവസം എറണാകുളം പോക്സോ കോടതിയിൽ ഹാജരാവാതെ മുങ്ങിയത്.
കേസ്സിൽ അന്തിമവാദം നടന്നുകൊണ്ടിരിക്കുമ്പോഴാണ് കേരള ഹൈക്കോടതി പ്രതിക്ക് ജാമ്യം അനുവദിച്ചത്. 2021 ജൂണിൽ അറസ്റ്റിലായ പ്രതി രണ്ടുദിവസം മുൻപ് വരെ ജുഡീഷ്യൽ കസ്റ്റഡിയിൽ ആയിരുന്നു. കേസ്റ്റിലെ വിധി പറയാൻ വെച്ചിരുന്നതിന്റെ രണ്ടു ദിവസം മുൻപ് ജാമ്യക്കാർ കീഴ്കോടതിയിൽ ഹൈക്കോടതി അനുവദിച്ച ജാമ്യത്തിനുള്ള നടപടികൾ സ്വീകരിക്കുകയും തുടർന്ന് പ്രതിയെ ജയിലിൽ നിന്ന് രണ്ട് ദിവസം മുൻപ് പുറത്തിറക്കുകയായിരുന്നു. പ്രതിയുടെ ജാമ്യ അപേക്ഷ ഹൈക്കോടതിയിൽ പോലീസും , പ്രോസിക്യൂഷനും ശക്തമായി എതിർത്തെങ്കിലും വിചാരണ നടന്നുകൊണ്ടിരിക്കുന്നു എന്ന കാരണത്താലാണ് ഹൈക്കോടതി ജാമ്യം അനുവദിച്ചതെന്ന് ഉത്തരവിൽ പറയുന്നു. വിചാരണയുടെ തത്സ്ഥിതി കീഴ്കോടതിയിൽ നിന്ന് ഹൈക്കോടതി തേടിയിരുന്നില്ല.
2019 കാലഘട്ടത്തിൽ ആയിരുന്നു കേസിന് ആസ്പദമായ സംഭവം നടന്നത്. വിവാഹിതനും മൂന്ന് കുട്ടികളുടെ പിതാവുമായ പ്രതി 14 വയസ്സുള്ള കുട്ടിയുടെ വീട്ടിൽ അതിക്രമിച്ചു കയറി കഴുത്തിന് കത്തി വെച്ച് ഭീഷണിപ്പെടുത്തി പീഡിപ്പിച്ചു ഗർഭിണിയാക്കുകയായിരുന്നു. തുടർന്ന് പീഡനത്തിനിടയായ പെൺകുട്ടി ഒരു കുഞ്ഞിന് ജന്മം നൽകിയിരുന്നു.
പ്രതി ജുഡീഷ്യൽ കസ്റ്റഡിയിൽ ആയിരുന്നാൽ തന്നെ വിചാരണ കഴിഞ്ഞ ആറുമാസമായി അതി വേഗത്തിൽ നടന്നുകൊണ്ടിരിക്കുകയായിരുന്നു. വിധി പറയുന്ന ദിവസം പ്രതി കോടതിയിൽ ഹാജരാവാത്തതിനാൽ പ്രതിക്കെതിരെ എറണാകുളം പോക്സോ കോടതിയിൽ നിന്ന് അറസ്റ്റ് വാറണ്ട് പുറപ്പെടുവിച്ചിട്ടുണ്ട്. പ്രതിയുടെ ജാമ്യം റദ്ദാക്കി ജാമ്യക്കാർക്ക് നോട്ടീസ് അയക്കുവാനും കോടതി ഉത്തരവായി.
ഇന്ത്യൻ ശിക്ഷാനിയമപ്രകാരവും , പോക്സോ നിയമപ്രകാരവും ഏഴോളം ഗുരുതരമായ വകുപ്പിലാണ് പ്രതി വിചാരണ നേരിട്ടുകൊണ്ടിരുന്നത് .
50 വർഷം കഠിനതടവോ അതിൽ കൂടുതലോ തൂക്കുകയറോ കിട്ടാവുന്ന കുറ്റകൃത്യങ്ങളാണവ. പ്രതി ഇതേസമയം കൊണ്ട് ബംഗ്ലാദേശിലേക്കോ സ്വദേശമായ വെസ്റ്റ് ബംഗാളിലേക്കോ കടന്നിരിക്കാം എന്നാണ് പോലീസ് നിഗമനം. പ്രതി കോടതിയിൽ നിന്ന് മുങ്ങിയതിനാൽ ഇരയായ കുട്ടിക്ക് ഇനിയും നീതി അകലെയാണ്. അന്യസംസ്ഥാക്കാർ പ്രതികളാവുന്ന ഇത്തരത്തിലുള്ള കേസുകളിൽ കോടതികൾ ജാമ്യം അനുവദിക്കുന്നത് കേസുകൾ അനന്തമായി നീണ്ടു പോകുന്നതിനും, വിചാരണ തടസ്സപ്പെടുവാനും. കുറ്റവാളികളും രക്ഷപ്പെടാനും മാത്രമേ സഹായിക്കു എന്ന ആക്ഷേപവും പൊതു സമൂഹത്തിൽ ഉയരുന്നുണ്ട്.
