അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
ദോഹ: ലോകകപ്പ് ഗ്രൂപ്പ് എയിൽ ഖത്തറിനെ വീഴ്ത്തി നെതർലൻഡ്‌സ് പ്രീ ക്വാർട്ടറിൽ. എതിരില്ലാത്ത രണ്ട് ഗോളിനായിരുന്നു നെതർലൻഡ്‌സിന്റെ വിജയം. നെതർലൻഡിനായി കോഡി ഗാക്‌പോയും ഫ്രാങ്കി ഡിയോങ്ങുമാണ് വലകുലുക്കിയത്. മൂന്ന് മത്സരങ്ങളില്‍ നിന്ന് ഏഴ് പോയന്റുമായി ഗ്രൂപ്പ് ചാമ്പ്യന്‍മാരായാണ് നെതര്‍ലന്‍ഡ്‌സിന്റെ പ്രീ ക്വാര്‍ട്ടര്‍ പ്രവേശനം. ഇതോടെ ലോകകപ്പിൽ ഗ്രൂപ്പ് ഘട്ടത്തിൽ ഒരു പോയന്റ് പോലും നേടാതെ പുറത്താകുന്ന ആദ്യ ആതിഥേയരായിരിക്കുകയാണ് ഖത്തർ.
ജയം മാത്രം ലക്ഷ്യമിട്ടാണ് ഡച്ച് ടീം ഖത്തറിനെതിരേ പന്ത് തട്ടാനിറങ്ങിയത്. തുടര്‍ച്ചയായ അവസര നഷ്ടങ്ങള്‍ക്കൊടുവില്‍ 26-ാം മിനിറ്റില്‍ കോഡി ഗാക്‌പോയിലൂടെ നെതര്ലന്ഡ്സ് മുന്നിലെത്തി. ഡേവി ക്ലാസന്‍ നല്‍കിയ പാസ് ഖത്തര്‍ പ്രതിരോധ താരങ്ങളുടെ സമ്മര്‍ദം മറികടന്ന് ഗാക്‌പോ പോസ്റ്റിന്റെ വലതുമൂലയിലെത്തിക്കുകയായിരുന്നു.
49 ാം മിനിറ്റിലാണ് സൂപ്പര്‍ താരം ഫ്രാങ്കി ഡിയോങ്ങിന്‍റെ ഗോള്‍ പിറന്നത്. ഗോള്‍ മുഖത്ത് വച്ച് ഡീപേ അടിച്ച പന്ത് ഖത്തര്‍ ഗോളി ബര്‍ഷാം മനോഹരമായി തടുത്തിട്ടെങ്കിലും റീബൌണ്ടില്‍ ഡിയോങ് വലകുലുക്കുകയായിരുന്നു.
മത്സരത്തിലാകെ നെതര്ലന്ഡ്സ് നാലു ഷോട്ടുകള്‍ മാത്രമാണ് ലക്ഷ്യത്തിലേക്ക് പായിച്ചത്. ഖത്തറാകട്ടെ മൂന്ന് തവണ ലക്ഷ്യത്തിലേക്ക് പന്ത് പായിച്ചു. 63 ശതമാനം പന്തവകാശവും 784 പാസുകളുമായി നെതര്‍ല്‍ഡ്സ് ആധിപത്യം പുലര്‍ത്തിയപ്പോള്‍ ഖത്തര്‍ 452 പാസുകളും 37 ശതമാനം പന്തടക്കവുമായി മോശമല്ലാത്ത പ്രകടനം പുറത്തെടുത്തു.
ടീം ലൈനപ്പ്
നെതർലൻഡ്‌സ്: ആൻഡ്രൈസ് നോപ്പെർട്ട്, ഡാലി ബ്ലിൻഡ്, നഥാൻ അകെ, വിർജിൽ വാൻ ജൈക്, യുരിയൻ ടിംബർ, ഡെൻസെൽ ഡംഫ്രീസ്, മാർട്ടിൻ ഡെ റോൺ, ഡേവി ക്ലാസൻ, ഫ്രെങ്കി ഡി ജോങ്, കോഡി ഗാക്‌പോ, മെംഫിസ് ഡിപേ.
ഖത്തർ: മിഷാൽ ബർഷാം, പെഡ്രോ മിഗ്വേൽ, അബ്ദുൽ കരീം ഹസ്സൻ, അബ്ദുൽ അസീസ് ഹാതിം, ഹസ്സൻ അൽഹൈദ്രോസ്, അക്രം അഫീഫ്, ഇസ്മായിൽ മുഹമ്മദ്, ഹുമാം അഹ്മദ്, അസീം മാദിബോ, ബൗലം ഖൗഖി, അൽമുഇസ് അലി.
