അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
ന്യൂഡൽഹി: രാജ്യത്തെ മാധ്യമങ്ങളെ സമ്പൂർണമായി കാൽക്കീഴിലാക്കാനാണ് കേന്ദ്ര സർക്കാരിന്റെ ശ്രമമെന്ന് രാജ്യസഭാ എംപി കപിൽ സിബൽ. മുൻപ് ടിവി നെറ്റ്‌വർക്കുകൾ കയ്യടക്കിയ സർക്കാർ, പുതിയ ഭേദഗതികളിലൂടെ സമൂഹമാധ്യമങ്ങളെയും ലക്ഷ്യമിടുന്നതായി സിബൽ ചൂണ്ടിക്കാട്ടി. ഐടി നിയമങ്ങളിൽ കേന്ദ്ര സർക്കാർ വരുത്തിയ ഭേദഗതികള്‍ക്കെതിരെയായിരുന്നു സിബലിന്റെ വിമര്‍ശനം.
“ആദ്യം അവർ ടിവി നെറ്റ്‌വർക്കുകൾ കൈപ്പിടിയിലൊതുക്കി. ഇപ്പോൾ സമൂഹമാധ്യമങ്ങളെയാണ് ഉന്നമിട്ടിരിക്കുന്നത്. എല്ലാത്തരം മാധ്യമങ്ങളെയും വരുതിയിലാക്കുകയാണ് ആത്യന്തിക ലക്ഷ്യം. ഒറ്റ പെരുമാറ്റച്ചട്ടം, ഒറ്റ രാഷ്ട്രീയ പാർട്ടി, ഒറ്റ ഭരണ സംവിധാനം. ആരോടും ഒന്നിനും മറുപടി നൽകേണ്ട എന്ന സ്ഥിതിയിലേക്കാണ് നമ്മുടെ പോക്ക്.
സർക്കാരിനു പരമാവധി സുരക്ഷ, ആളുകൾക്ക് യാതൊരു സുരക്ഷയുമില്ല. ഈ സർക്കാരിന്റെ എല്ലാ നീക്കങ്ങളിലും നിഴലിക്കുന്നത് ഈ നയം തന്നെയാണ്. സാധാരണക്കാരായ പൗരൻമാർക്ക് അഭിപ്രായം പറയാൻ അവശേഷിച്ചിരുന്ന ഏക ഇടം സമൂഹമാധ്യമങ്ങളായിരുന്നു. ഇനിമുതൽ അഭിപ്രായങ്ങൾ അതിരുകടന്നാൽ അവർ വിചാരണ ചെയ്യപ്പെടും.” – കപിൽ സിബൽ ആരോപിച്ചു.
സമൂഹമാധ്യമങ്ങളുമായി ബന്ധപ്പെട്ട് ഉപഭോക്താക്കളുടെ പരാതികള്‍ പരിഹരിക്കാന്‍ അപ്പീല്‍ സമിതികള്‍ രൂപീകരിക്കുന്നതിനായി ഐടി ചട്ടങ്ങളില്‍ കഴിഞ്ഞ ദിവസം കേന്ദ്രം ഭേദഗതി വരുത്തിയിരുന്നു.
