അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
കൊൽക്കത്ത: എഎഫ്‌സി ഏഷ്യാകപ്പ് ഫുട്‌ബോള്‍ യോഗ്യതാ റൗണ്ടില്‍ ഇന്ത്യയ്ക്ക് രണ്ടാം ജയം. അഫ്ഗാനിസ്ഥാനെ ഒന്നിനെതിരെ രണ്ട് ഗോളുകള്‍ക്ക് തോല്‍പ്പിച്ചു. ഇന്ത്യയ്ക്കായി മലയാളി താരം സഹലും ക്യാപ്റ്റന്‍ സുനില്‍ ഛേത്രിയും ഗോളുകള്‍ നേടി.
86ാം മിനുറ്റിൽ മലയാളി താരം ആഷിഖ് കുരുണിയനിനെ വീഴ്ത്തിയതിന് ലഭിച്ച ഫ്രീക്കിക്ക് ഇന്ത്യൻ ക്യാപ്റ്റൻ സുനിൽ ഛേത്രി അതിമനോഹരമായി അഫ്ഗാൻ വലയിലെത്തിച്ചു. എന്നാൽ ഇന്ത്യയുടെ ആഹ്ലാദത്തിന് രണ്ട് മിനിറ്റ് മാത്രമായിരുന്നു ആയുസ്. 88ാം മിനുറ്റിൽ ലഭിച്ച കോർണർ അഫ്ഗാൻ താരം സുബൈർ അമീരി ഇന്ത്യ ഗോൾകീപ്പർ ഗുർപ്രീതിന് യാതൊരു അവസരവും നൽകാതെ വലയിലെത്തിച്ചു.
എന്നാൽ, ക്യാപ്റ്റൻ സുനിൽ ഛേത്രിക്ക് പകരക്കാരനായി എത്തിയ സഹൽ അധിക സമയത്ത് ഇന്ത്യയുടെ വിജയഗോൾ നേടി. ആഷിഖ് കുരുണിയനിന്റെ അതിമനോഹരമായ പാസ് കൃത്യമായി സഹൽ ഫിനിഷ് ചെയ്യുകയായിരുന്നു. ജയത്തോടെ രണ്ട് കളികളിൽ നിന്ന് ആറുപോയിന്റുമായി ഗ്രൂപ്പിൽ ഇന്ത്യ രണ്ടാം സ്ഥാനത്താണ്.
