അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
ടോക്യോ: ജപ്പാനെതിരായ സൗഹൃദ ഫുട്ബോളിൽ ബ്രസീലിന് ഒരു ഗോൾ ജയം. കളിയുടെ അവസാനഘട്ടത്തിൽ നെയ്മറിന്റെ പെനൽറ്റി ഗോളിലാണ് ബ്രസീൽ ജയം നേടിയത്.
കളിയിൽ പൂർണമായും ആധിപത്യം നേടിയെങ്കിലും ബ്രസീലിന് തുടക്കത്തിൽ ലക്ഷ്യം കാണാനായില്ല. 21 ഷോട്ടുകളാണ് ബ്രസീൽ താരങ്ങൾ ജപ്പാൻ പോസ്റ്റിന് ലക്ഷ്യമാക്കി ഉതിർത്തത്. അതേസമയം, ജപ്പാന് ഏഴ് ഷോട്ടുകൾ മാത്രമാണ് ഉതിർക്കാൻ സാധിച്ചത്. ബോൾ കൈവശം വെക്കുന്നതിലും ചെറിയ മുൻതൂക്കം ബ്രസീലനായിരുന്നു.
റിച്ചാർലിസണെ ജപ്പാൻ പ്രതിരോധം ബോക്‌സിൽ വീഴ്‌ത്തിയതിനായിരുന്നു പെനൽറ്റി. നെയ്‌മ‌ർ അനായാസം ലക്ഷ്യം കണ്ടു. ജപ്പാനെതതിരെ കളിച്ച അ‍ഞ്ച് മത്സരങ്ങളില്‍ നെയ്മറുടെ ഒമ്പതാം ഗോളാണിത്. ഇന്നത്തെ ഗോള്‍ നേട്ടത്തോടെ ബ്രസീലിനായി ഏറ്റവും കൂടുതല്‍ ഗോളുകള്‍ നേടുന്ന താരമെന്ന ഇതിഹാസം താരം പെലെയുടെ റെക്കോര്‍ഡിലേക്കുള്ള അകലം മൂന്നാക്കി കുറക്കാനും നെയ്മര്‍ക്കായി. ബ്രസീല്‍ കുപ്പായത്തില്‍ 119 മത്സരങ്ങളില്‍ നെയ്മറുടെ 74-ാം ഗോളാണിത്. 77 ഗോളുകളാണ് പെലെയുടെ പേരിലുള്ളത്.
11ന് അർജന്റീനയുമായാണ് ബ്രസീലിന്‍റെ അടുത്ത മത്സരം.
