അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ജിദ്ദ: സൗദി അറേബ്യക്ക് പുറത്തുനിന്നുവരുന്ന 12 വയസ്സും അതില്‍ കൂടുതലുമുള്ള തീര്‍ഥാടകര്‍ക്ക് ഉംറക്ക് അനുമതി നല്‍കിയതായി ഹജ്ജ്, ഉംറ മന്ത്രാലയം അറിയിച്ചു.നേരത്തേ 18 വയസ്സ് മുതലുള്ളവര്‍ക്കായിരുന്നു അനുമതി.ഇനിമുതല്‍ 12 വയസ്സിന് മുകളിലുള്ള എല്ലാവര്‍ക്കും വിദേശത്തുനിന്ന് ഉംറ തീര്‍ഥാടനത്തിനും ഇരുഹറമുകളിലെയും നമസ്കാരങ്ങള്‍ക്കും റൗദ സന്ദര്‍ശനത്തിനും അനുമതിയുണ്ട്.
സൗദിക്കകത്തുനിന്നുള്ള ആഭ്യന്തര തീര്‍ഥാടകരില്‍ 12 വയസ്സ് മുതല്‍ പ്രായമുള്ളവര്‍ക്ക് നേരത്തേ തന്നെ അനുമതി നല്‍കിയിരുന്നു.ഉംറ തീര്‍ഥാടകര്‍ക്ക് നിലവിലുണ്ടായിരുന്ന പരമാവധി 50 വയസ്സ് എന്ന പ്രായപരിധി ഈയിടെയായി മന്ത്രാലയം എടുത്തുകളഞ്ഞു.
ആഭ്യന്തര, വിദേശ തീര്‍ഥാടകരെല്ലാവരും ഇഅ്തമര്‍നാ, തവക്കല്‍നാ ആപ്പുകള്‍ വഴി അനുമതി നേടിയിരിക്കണം. ‘തവക്കല്‍നാ’ ആപ്പില്‍ ആരോഗ്യനില ‘രോഗപ്രതിരോധശേഷി’ ഉള്ളതാണെങ്കില്‍ മാത്രമേ അനുമതി ലഭിക്കൂ. വിദേശത്തുനിന്ന് വരുന്നവര്‍ സൗദി അറേബ്യയില്‍ പ്രവേശിക്കുന്നതിന് മുമ്ബ് ‘ഖുദൂം’ പോര്‍ട്ടലില്‍ വാക്‌സിന്‍ വിവരങ്ങള്‍ രജിസ്റ്റര്‍ ചെയ്യണം.
കൂടാതെ, രാജ്യത്ത് എത്തിയശേഷം തവക്കല്‍നാ, ഇഅ്തമര്‍നാ ആപ്ലിക്കേഷനുകളിലും രജിസ്റ്റര്‍ ചെയ്യണം. കോവിഡ് വ്യാപനം തടയാനുള്ള എല്ലാ മുന്‍കരുതല്‍ നടപടികളും പ്രതിരോധ പ്രോട്ടോകോളുകളും കൃത്യമായി പാലിക്കലും നിര്‍ബന്ധമാണ്.സാമൂഹിക അകലം പാലിക്കല്‍ നടപടികള്‍ എടുത്തുകളഞ്ഞെങ്കിലും തീര്‍ഥാടകര്‍ പള്ളിക്കകത്ത് മാസ്ക് ധരിക്കല്‍ നിര്‍ബന്ധമാണ്. ഇരുഹറമുകളിലെയും മുഴുവന്‍ സ്ഥലവും തീര്‍ഥാടകര്‍ക്കും നമസ്കരിക്കാന്‍ എത്തുന്നവര്‍ക്കും ഉപയോഗിക്കാനുള്ള അനുമതി നേരത്തേ നല്‍കിയിട്ടുണ്ട്.
