അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അടൂര്‍: അടൂരില്‍ ബസ് കയറുന്നതിനിടെ വിദ്യാര്‍ഥിനിയെ കടന്നു പിടിച്ച വയോധികന്‍ പിടിയില്‍. വള്ളിക്കോട് കുടമുക്ക് മാമൂട് ചാരുവിളയില്‍ ശ്രീജിത്ത് ഭവനത്തില്‍ കൃഷ്ണന്‍കുട്ടി(70)യാണ് അറസ്റ്റിലായത്.അടൂര്‍ ടൗണില്‍ നിന്ന് അമ്മയോടൊപ്പം വീട്ടിലേക്ക് പോകാന്‍ ബസ് കയറുന്നതിനിടെ അതേ ബസില്‍ വന്നിറങ്ങിയ ഇയാള്‍ വിദ്യാര്‍ഥിനിയെ തിരക്കിനിടയില്‍ കടന്നുപിടിച്ചു.
ഭയന്ന കുട്ടി അമ്മയോട് കാര്യം പറഞ്ഞപ്പോഴേക്കും ബസ്, സ്റ്റാന്‍ഡ് വിട്ടിരുന്നു. ആ സമയംകൊണ്ട് ഇയാള്‍ കടന്നുകളഞ്ഞിരുന്നു. തുടര്‍ന്ന് ബസ് നിര്‍ത്തി ട്രാഫിക് ഡ്യൂട്ടിയില്‍ ഉണ്ടായിരുന്ന ഹോംഗാര്‍ഡിനോട് വിവരം പറഞ്ഞു.വിവിധ സ്ഥാപനങ്ങളുടെ സി.സി ടി.വി പരിശോധിച്ചതില്‍നിന്ന് വിദ്യാര്‍ഥിനിയെ അപമാനിക്കുന്ന ദൃശ്യങ്ങള്‍ കിട്ടി. ഇയാള്‍ സ്വകാര്യ സ്റ്റാന്‍ഡില്‍നിന്ന് ബസ് കയറി പോകുന്നതായി തിരിച്ചറിഞ്ഞു.
അടൂര്‍ മുതല്‍ പത്തനംതിട്ട വരെ അന്വേഷണം വ്യാപിപ്പിക്കുകയും തുടര്‍ന്ന് തോലുഴം ഭാഗത്തുനിന്ന് തിരിച്ചറിയുകയായിരുന്നു.കോടതിയില്‍ ഹാജരാക്കി റിമാന്‍ഡ് ചെയ്തു. അടൂര്‍ ഇന്‍സ്‌പെക്ടര്‍ ടി.ഡി. പ്രജീഷ്, എസ്.ഐ മനീഷ്, സി.പി.ഒ അന്‍സാജു, അനുരാഗ് മുരളീധരന്‍, രതീഷ് ചന്ദ്രന്‍, സനല്‍ എന്നിവരാണ് പ്രതിയെ പിടികൂടിയത്.
