അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പത്തനംതിട്ട: കോവിഡിൻ്റെ മൂലം ശബരിമലയില്‍ ഏര്‍പ്പെടുത്തിയിരിക്കുന്ന ചില നിയന്ത്രണങ്ങള്‍ ഭക്തരെ അകറ്റുന്നുവെന്ന് ദേവസ്വംബോര്‍ഡിൻ്റെ വിലയിരുത്തല്‍. അശാസ്ത്രീയമായ വെര്‍ച്ച്വല്‍ ക്യൂവിന് ഇളവുകള്‍ തേടി ബോര്‍ഡ് പലതവണ സര്‍ക്കാരിനെ സമീപിച്ചെങ്കിലും നിരസിച്ചു. അനാവശ്യ നിയന്ത്രണങ്ങള്‍ ഒഴിവാക്കണമെന്ന് ശബരിമലയുമായി ബന്ധപ്പെട്ട വിവിധ സംഘടനകള്‍ ആവശ്യപ്പെട്ടിട്ടുണ്ട്.
വലിയ തിരക്കുണ്ടായിരുന്ന കാലത്ത് ഭക്തര്‍ക്ക് സുഖ ദര്‍ശനത്തിനായിട്ടാണ് കേരള പോലീസ് വെര്‍ച്ച്വല്‍ ക്യൂ ആരംഭിച്ചത്. അന്ന് വളരെ പ്രയോജനകരമായിരുന്ന സംവിധാനം ഇപ്പോള്‍ സാധാരണ ഭക്തരെ ശബരിമലയില്‍ നിന്നു അകറ്റുന്നുവെന്നാണ് പരസ്യമായി പറയുന്നില്ലെങ്കിലും ദേവസ്വം ബോര്‍ഡിൻ്റെ നിലപാട്.
പലതവണ ശ്രമിച്ചാലും സ്ലോട്ട് ലഭിക്കുന്നില്ലെന്ന് ഇതര സംസ്ഥാനങ്ങളിലെ തീര്‍ഥാടകര്‍ക്ക് ഉള്‍പ്പടെ പരാതിയുണ്ട്. മാത്രമല്ല ബുക്കിങ്ങ് കാന്‍സല്‍ ചെയ്യാനുള്ള സംവിധാനം ഇല്ലാത്തതും വെര്‍ച്ച്വല്‍ ക്യൂവിൻ്റെ പോരായ്മയാണ്. ഇതിന് പുറമേ നെയ്യഭിഷേകത്തിനുള്ള നിയന്ത്രണം, സന്നിധാനത്ത് ഭക്തരെ തങ്ങാന്‍ അനുവദിക്കാത്തതൊക്കെ പുനപരിശോധിക്കണമെന്ന ആവശ്യമുണ്ട്.
എരുമേലിയില്‍ നിന്നു പമ്പയിലേക്കും അവിടെ നിന്നു സന്നിധാനത്തേക്കും പരമ്പരാഗത പാതയിലൂടെ യാത്രയ്ക്ക് അനുമതി വേണം. പമ്പയില്‍ സ്നാനവും ബലിയും വിളക്കുമൊക്കെ നിയന്ത്രണങ്ങളോടെ അനുവദിക്കണം. മണ്ഡലം – മകരവിളക്ക് ഉല്‍സവത്തിനായി തിങ്കളാഴ്ച്ച വൈകുന്നേരം ശബരിമല നട തുറക്കും.
