അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കൊല്ലം ∙ ആശ്രാമത്തെ ബീവറേജ്‌സ് സെൽഫ് സർവീസ് കൗണ്ടറിൽനിന്നു മദ്യക്കുപ്പി മോഷ്ടിച്ച യുവാവ് സിസിടിവി ക്യാമറയിൽ കുടുങ്ങി. 910 രൂപയുടെ ഓൾഡ് മങ്ക് റം ഫുൾ ബോട്ടിലാണ് ശനിയാഴ്ച രാത്രി 8.45നു ഇയാൾ കവർന്നത്. മോഷണം നടത്തിയ വാളത്തുംഗൽ സ്വദേശിയെ പൊലീസ് തിരിച്ചറിഞ്ഞു. മോഷണദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ യുവാവ് വീട്ടിൽനിന്നു രക്ഷപ്പെട്ടു എന്നാണ് മനസ്സിലാക്കാൻ കഴിഞ്ഞത് .
അടയ്ക്കുന്ന സമയമായതിനാൽ കൗണ്ടറിൽ വലിയ തിരക്കില്ലായിരുന്നു. മാസ്കും നീല ടീഷർട്ടും പാന്റ്സും ധരിച്ചെത്തിയ യുവാവ് വന്നയുടൻ ഒരു ബോട്ടിൽ എടുത്ത് ഇടുപ്പിൽ തിരുകി ഒളുപ്പിച് വെക്കുകയായിരുന്നു . തുടർന്നു മദ്യം വാങ്ങാനെത്തിയവരുമായി സംസാരിച്ചു നിന്നു. പിന്നീടു മദ്യം വാങ്ങിയ ഒരാളോടൊപ്പം കൗണ്ടറിലേക്കു കടന്നു. പുറത്തോട്ടു നിൽക്കാമെന്ന് ഇയാളോടു പറഞ്ഞശേഷം ഇറങ്ങിപ്പോവുകയായിരുന്നു.
ഇയാളോടൊപ്പം വന്നയാളാണെന്നു തെറ്റിദ്ധരിപ്പിക്കാനായിരുന്നു യുവാവിന്റെ നീക്കം. ഇയാൾ അരമണിക്കൂർ മുൻപ് ഇതേ കൗണ്ടറിൽ എത്തി സാഹചര്യങ്ങൾ നോക്കിയ ശേഷം തിരിച്ചുപോയിരുന്നെന്നു ബീവറേജ്‌സ് ജീവനക്കാർ പറഞ്ഞു. മാസങ്ങൾക്കു മുൻപ് ഇവിടെ മോഷണശ്രമം നടത്തിയ ഒരാളെ ജീവനക്കാർ പിടികൂടി പൊലീസിൽ ഏൽപിച്ചിരുന്നു
