അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മലപ്പുറം ∙ സുനിതയെയും മക്കളെയും രാവിലെ ഉറക്കത്തിൽനിന്നു എഴുന്നേൽപിക്കാ‍ൻ ടോമി വന്നില്ല,അങ്ങനെയാണ് അവർക്ക് ആ കാര്യം മനസ്സിലായത് .പ്രിയപ്പെട്ട വളർത്തു പൂച്ചയെ നഷ്ടപ്പെട്ടതിന്റെ വേദനയിലാണ് കുടുംബം. സപ്ലൈകോയുടെ മലപ്പുറം മൂന്നാംപടിയിലെ ലാഭം സൂപ്പർമാർക്കറ്റ് ജീവനക്കാരിയായ സുനിത വളർത്തുന്ന ടോമി എന്ന വിളിപ്പേരുള്ള പേർഷ്യൻ പൂച്ചയെ ആണ് കഴിഞ്ഞ ബുധൻ രാവിലെ മുതൽ കാണാതായത്.എവിടെ എന്നറിയാതെ വിഷമിച്ചിരിക്കുകയാണ് വീട്ടുകാർ
മൂന്നാംപടിയിലെ പാരി വില്ലയി‍ൽ താമസിക്കുന്ന സുനിതയെ എന്നും രാവിലെ 6ന് ഉണർത്തുന്ന ജോലി ടോമിക്കായിരുന്നു. രാവിലെ ശബ്ദം കേൾക്കാതെ വന്നപ്പോൾ പരിശോധിച്ചപ്പോഴാണ് പൂച്ചയെ കാണാതായ വിവരമറിയുന്നത്. ഒരു വയസ്സ് പ്രായമുള്ള ടോമിയെ കൂട്ടിലങ്ങാടിയിൽനിന്നാണ് വാങ്ങിയത്.
ചിക്കനും മീനും മാത്രം കഴിക്കുന്ന ടോമിക്ക് എന്നും വൈകിട്ട് 7.30ന് ഒരു ഐസ്ക്രീം നിർബന്ധമാണ്. സുനിത ജോലികഴിഞ്ഞു മടങ്ങിവരുന്നതു വരെ വീടിന്റെ ഉമ്മറപ്പടിയിൽ ടോമി കാത്തിരിക്കുന്നുണ്ടാകും. വൈകിയാൽ അസ്വസ്ഥനാകും.പൂച്ചയെ ആരെങ്കിലും എടുത്തുകൊണ്ടുപോയെങ്കിൽ നല്ല മനസ്സ് തോന്നി തിരിച്ചെത്തിക്കുമെന്നു പ്രതീക്ഷയിലാണ് സുനിത.
