അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പൂച്ചാക്കൽ ∙ സ്വകാര്യ ബാങ്ക് ജപ്തി ചെയ്തു പൂട്ടിയിട്ടിരുന്ന വീട്ടുവളപ്പിൽ കുടുങ്ങിയ തെരുവുനായയെ ഫയർഫോഴ്സ് എത്തി ഗേറ്റിന്റെ പൂട്ടുപൊളിച്ചു രക്ഷപ്പെടുത്തി.പാണാവള്ളി പഞ്ചായത്ത് 7–ാംവാർഡ് ബ്ലോക്ക് ഓഫിസ്– നാൽപ്പത്തെണ്ണീശ്വരം റോഡിൽ പൂന്നച്ചുവടിനു സമീപത്തെ വീട്ടുവളപ്പിലാണ് നായ കുടുങ്ങിയത്. മതിൽക്കെട്ടിനുള്ളിൽ അകപ്പെട്ടുപോയ നായയ്ക്കു പുറത്തുകടക്കാൻ കഴിഞ്ഞില്ല. തുടർച്ചയായുള്ള കുര കേട്ടു സമീപവാസികൾ വ്യാഴാഴ്ച രാവിലെ ഫയർഫോഴ്സിനെ വിവരം അറിയിച്ചു.
ഗേറ്റ് പൂട്ടിയിട്ടിരുന്നതിൽ ചേർത്തലയിൽ നിന്നെത്തിയ ഫയർഫോഴ്സ് ഉദ്യോഗസ്ഥർക്ക് അകത്തേക്കു പ്രവേശിക്കാനായില്ല. തുടർന്ന് ബാങ്ക് അധികൃതരെയും പൂച്ചാക്കൽ പൊലീസിനെയും വിവരമറിയിച്ചു. കൊച്ചിയിൽ നിന്നെത്തിയ ബാങ്ക് ഉദ്യോഗസ്ഥയുടെയും പൊലീസിന്റെയും സാന്നിധ്യത്തിൽ ഗേറ്റിന്റെ പൂട്ടുപൊട്ടിച്ചാണ് ഉദ്യോഗസ്ഥർ അകത്തുകയറിയത്. തുറന്നിട്ട ഗേറ്റുവഴി നായയെ പുറത്തെത്തിച്ചു. തുടർന്ന് ബാങ്ക് അധികൃതർ ഗേറ്റ് പൂട്ടി സീൽ ചെയ്തു മടങ്ങി.
