അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
ഷിംല: ഹിമാചൽ പ്രദേശിലെ ലാഹോൾ- സ്പിതി ജില്ലയില് മണ്ണിടിച്ചില്. 16 പേരെ കാണാതായതായി എ.എഫ്.പി റിപ്പോര്ട്ട് ചെയ്തു. 13 ഗ്രാമങ്ങളില് നിന്ന് രണ്ടായിരത്തിലധികം പേരെ മാറ്റിപ്പാര്പ്പിച്ചു. മുന്കരുതല് നടപടിയെന്ന നിലയിലാണ് സമീപവാസികളെ സുരക്ഷിതയിടങ്ങളിലേക്ക് മാറ്റിപാര്പ്പിച്ചത്.
അപകടത്തില് ആളപായമോ മറ്റു നാശനഷ്ടങ്ങളോ ഉണ്ടായതായി റിപ്പോര്ട്ട് ചെയ്യപ്പെട്ടിട്ടില്ല. മണ്ണിടിച്ചിലിനെത്തുടര്ന്ന് ഹിമാചലില് ചെനാബ് നദിയുടെ ഒഴുക്ക് തടസപ്പെട്ടു.
മലയുടെ ഒരുഭാഗം ഒന്നാകെ ഇടിഞ്ഞ് ചെനാബ് നദിയിലേക്ക് പതിക്കുകയായിരുന്നു. ഇതിന്റെ ദൃശ്യങ്ങളും പുറത്തുവന്നിട്ടുണ്ട്.
അതേസമയം നദിയുടെ സ്വാഭാവിക ഒഴുക്ക് തടസപ്പെട്ടതോടെ സമീപ പ്രദേശങ്ങളിലേക്ക് വെള്ളം കയറി വലിയ തടാകം രൂപപ്പെട്ടിട്ടുണ്ട്.
പ്രദേശത്തെ സാഹചര്യം വിലയിരുത്താന് ജില്ലാ ഭരണകൂടം ഹെലികോപ്റ്ററില് നിരീക്ഷണം നടത്തി. മുന്കരുതല് നടപടിയെന്ന നിലവില് സമീപവാസികളെ സുരക്ഷിത ഇടങ്ങളിലേക്ക് മാറ്റിപാര്പ്പിച്ചിട്ടുണ്ട്. ദുരന്ത നിവാരണ സേനയേയും പ്രദേശത്ത് വ്യന്യസിച്ചിട്ടുണ്ട്.
അതേസമയം,നദിയുടെ ഒഴുക്ക് പുനരാരംഭിച്ചതായി ഹിമാചല് പ്രദേശ് മുഖ്യമന്ത്രി ജയ് റാം താക്കൂര് ട്വീറ്റ് ചെയ്തു. നാട്ടുകാര് ആരും അപകടസ്ഥലത്തേക്ക് പോകരുതെന്നും മുഖ്യമന്ത്രി മുന്നറിയിപ്പു നല്കി.
