അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇംഗ്ലണ്ടിനെതിരായ ടെസ്റ്റ് പരമ്പര സ്വന്തമാക്കി ന്യൂസിലൻഡ്. രണ്ടാം മത്സരത്തിൽ 8 വിക്കറ്റിന് ഇംഗ്ലണ്ടിനെ തകർത്താണ് ന്യൂസീലൻഡ് പരമ്പര സ്വന്തമാക്കിയത്. 22 വർഷത്തിന് ശേഷമാണ് ഇംഗ്ലണ്ടിൽ ന്യൂസീലൻഡ് ടെസ്റ്റ് പരമ്പര നേടുന്നത്. ആദ്യ മത്സരം സമനില ആയിരുന്നു.
രണ്ട് ഇന്നിംഗ്സിലുമായി 6 വിക്കറ്റ് വീഴ്ത്തിയ മാറ്റ് ഹെൻറിയാണ് കളിയിലെ താരം. ഡോമിനിക് കോൺവേ, റോറി ബേൺസ് എന്നിവർ മാൻ ഓഫ് ദി സീരീസ് പങ്കിട്ടു.
സ്കോർ: ഇംഗ്ലണ്ട് ഒന്നാം ഇന്നിങ്സ് 303 റൺസ്, രണ്ടാം ഇന്നിങ്സ് 122 റൺസ്. ന്യൂസിലൻഡ് ഒന്നാം ഇന്നിങ്സിൽ 388 റൺസ്, രണ്ടാം ഇന്നിങ്സിൽ രണ്ടിന് 41 റൺസ്.
എഡ്ജ്ബാസ്റ്റണിൽ നടന്ന മത്സരത്തിൽ 38 റൺസ് ലക്ഷ്യവുമായി രണ്ടാം ഇന്നിങ്സ് ബാറ്റിങ്ങിനിറങ്ങിയ ന്യൂസീലൻഡ് രണ്ട് വിക്കറ്റ് നഷ്ടത്തിൽ ചരിത്രവിജയത്തിലെത്തി. നാലാം ദിവസത്തെ ആദ്യ സെഷനിൽ തന്നെ സന്ദർശകർ ലക്ഷ്യത്തിലെത്തി. അതിനിടയിൽ ഡെവോൺ കോൺവേയുടേയുടേയും വിൽ യങ്ങിന്റേയും വിക്കറ്റുകൾ നഷ്ടപ്പെട്ടു.
പരിക്കേറ്റ കെയ്ൻ വില്ല്യംസണ് പകരം ടീമിനെ നയിച്ച ടോം ലാഥം ബൗണ്ടറിയിലൂടെയാണ് കിവീസിന്റെ വിജയറൺ നേടിയത്. 23 റൺസുമായി ലാഥം പുറത്താകാതെ നിന്നു.
ആദ്യ ഇന്നിങ്സിൽ ഇംഗ്ലണ്ട് 303 റൺസെടുത്തപ്പോൾ മറുപടി ബാറ്റിങ്ങിൽ കിവീസ് 388 റൺസ് അടിച്ചു. ഇതോടെ ന്യൂസീലൻഡ് ഒന്നാമിന്നിങ്സിൽ നിർണായകമായ 85 റൺസ് ലീഡ് നേടി. രണ്ടാം ഇന്നിങ്സിൽ ഇംഗ്ലണ്ടിന്റെ ബാറ്റിങ് തകർച്ചയാണ് കണ്ടത്.
മൂന്നു വീതം വിക്കറ്റെടുത്ത നീൽ വാഗ്നറുടേയും മാറ്റ് ഹെൻട്രിയുടേയും രണ്ട് വിക്കറ്റ് വീതം വീഴ്ത്തിയ ട്രെന്റ് ബോൾട്ടിന്റേയും അജാസ് പട്ടേലിന്റേയും ബൗളിങ് ഇംഗ്ലണ്ടിനെ തകർക്കുകയായിരുന്നു. 122 റൺസിന് ഓൾഔട്ടായ ആതിഥേയർക്ക് ന്യൂസീലൻഡിന് മുന്നിൽ 38 റൺസിന്റെ വിജയലക്ഷ്യം വെയ്ക്കാനെ കഴിഞ്ഞുള്ളൂ.
ഇംഗ്ലണ്ടിൽ 18 ടെസ്റ്റ് പരമ്പരകളിൽ ന്യൂസീലന്റിന്റെ മൂന്നാമത്തെ മാത്രം വിജയമാണിത്. ഇതിന് മുമ്പ് 1986-ലും 1999-ലുമാണ് ന്യൂസിലൻഡ് ഇംഗ്ലീഷ് മണ്ണിൽ പരമ്പര നേടിയത്.
2014-ന് ശേഷം സ്വന്തം മണ്ണിൽ ആദ്യമായാണ് ഇംഗ്ലണ്ട് പരമ്പര തോൽക്കുന്നത്. 2014-ൽ ശ്രീലങ്കയ്ക്കെതിരേ ആയിരുന്നു തോൽവി.
