അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അബൂജ: നൈജീരിയൻ വിദേശകാര്യമന്ത്രിക്ക് കോവിഡ് സ്ഥിരീകരിച്ചു. പ്രസിഡൻറ് മുഹമ്മദ് ബുഹാരി മന്ത്രിസഭയിലെ വിദേശകാര്യമന്ത്രി ജഫ്രി ഒന്യേമക്കാണ് കോവിഡ് സ്ഥിരീകരിച്ചത്. ഞായറാഴ്ച ഒന്യേമ തന്നെയാണ് ഇക്കാര്യം ട്വിറ്ററിലൂടെ അറിയിച്ചത്. നൈജീരിയയിൽ കോവിഡ് സ്ഥിരീകരിക്കുന്ന ആദ്യ മന്ത്രിയാണ് ജഫ്രി ഒന്യേമ.
ജഫ്രി ഒന്യേമക്ക് തൊണ്ടക്ക് അസ്വസ്ഥത അനുഭവപ്പെട്ടതിനെ തുടർന്ന് ആശുപത്രിയിലെത്തി പരിശോധനക്ക് വിധേയനായപ്പോഴാണ് രോഗവിവരം അറിയുന്നത്. ഒനീമിയയുടെ നാലാമത്തെ കോവിഡ് പരിശോധനയായിരുന്നു ഇത്.
‘‘തൊണ്ടക്ക് അസ്വസ്ഥത ഉണ്ടായതിനെ തുടർന്ന് ഇന്നലെ എൻെറ നാലാമത്തെ കോവിഡ് പരിശോധന നടത്തി. ദൗർഭാഗ്യവശാൽ ഇത്തവണ പോസിറ്റീവ് ആയി. ഇതാണ് ജീവിതം ! ചിലപ്പോൾ വിജയിക്കും ചിലപ്പോൾ പരാജയപ്പെടും. ഐസൊലേഷനിലേക്ക് പോവുകയാണ്. നല്ലത് വരാൻ പ്രാർഥിക്കുന്നു.’’ – ഒന്യേമ ട്വീറ്റ് ചെയ്തു.
അതേസമയം, നൈജീരിയയിൽ 36,000ത്തിലേറെ പേർക്ക് കോവിഡ് ബാധിക്കുകയും 778 പേർ മരിക്കുകയും ചെയ്തു. കോവിഡ് വ്യാപനം കുറച്ചുകൊണ്ടുവരുന്നതിനുള്ള നടപടികൾക്ക് ശേഷം മെയ് മുതൽ രാജ്യത്ത് ലോക്ഡൗൺ ഇളവുകളും നൽകിത്തുടങ്ങിയിരുന്നു.
