അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അടുക്കളയിൽ പുതിനയില, കറിവേപ്പില, മഞ്ഞൾ എന്നിവപോലെ പ്രധാനപ്പെട്ട മറ്റൊന്നാണ് ഇഞ്ചി. എന്തിനും ഒരു കഷ്‌ണം ഇഞ്ചി ചേർക്കുന്നത് ആ വിഭവത്തെ തന്നെ മാറ്റിമറിക്കും. നിങ്ങളുടെ അടുക്കളയിലെ ഒരു മസാല മാത്രമല്ല ഇഞ്ചി! നിങ്ങളുടെ ആരോഗ്യത്തിന് അദ്ഭുതങ്ങൾ സൃഷ്ടിക്കാൻ കഴിയുന്ന ശക്തമായ ഒരു സസ്യമാണിത്.
ഇഞ്ചിയിൽ ജിഞ്ചറോൾ, ഷോഗോൾ എന്നീ പ്രകൃതിദത്ത സംയുക്തങ്ങൾ അടങ്ങിയിട്ടുണ്ട്, ഇത് ആൻ്റി-ഇൻഫ്ലമേറ്ററി, ആൻ്റിഓക്‌സിഡൻ്റ് ഗുണങ്ങൾ നൽകുന്നു. ഈ സംയുക്തങ്ങൾ ഓക്കാനം കുറയ്ക്കാനും പേശി വേദന ലഘൂകരിക്കാനും അണുബാധകളെ ചെറുക്കാനും സഹായിക്കുന്നു. കൂടാതെ, നിങ്ങളുടെ ദിനചര്യയിൽ ഉൾപ്പെടുത്തുന്നത് വളരെ എളുപ്പമാണ്! എങ്കിൽ നമുക്ക് വീട്ടിൽ തന്നെ ഇഞ്ചി കൃഷി തുടങ്ങിയാലോ
കൃഷി ചെയ്യുന്ന രീതി
വരദ, റിയോഡി ജനിറോ, ചൈന എന്നീയിനങ്ങള്‍ തെരഞ്ഞെടുക്കാം. കുമ്മായം/ഡോളമൈറ്റ് എന്നിവ സെന്റിന് രണ്ട് കിലോ എന്ന അളവില്‍ ചേര്‍ത്ത് കിളച്ച് കട്ടയുടച്ച് മിതമായ ഈര്‍പ്പം ഉറപ്പുവരുത്തി രണ്ടാഴ്ച ഇടുക. 5 മീറ്റര്‍ നീളവും ഒരു മീറ്റര്‍ വീതിയും 30 സെന്റീമീറ്റര്‍ പൊക്കവുമുള്ള വാരത്തില്‍ 120 കിലോ ട്രൈക്കോഡര്‍മയാല്‍ സമ്പുഷ്ടീകരിച്ച ചാണകപ്പൊടി ഇടേണ്ടതുണ്ട്. 110 കിലോ ചാണകപ്പൊടിയും 10 കിലോ പൊടിച്ച വേപ്പിന്‍പിണ്ണാക്കും ഒരു കിലോ ട്രൈക്കോഡര്‍മയും ചേര്‍ത്ത് മിശ്രിതമുണ്ടാക്കണം.
വാരങ്ങളില്‍ 20 സെ.മീ അകലത്തില്‍ ചെറുകുഴികളെടുത്ത് മേല്‍പ്പറഞ്ഞ ജൈവവളങ്ങളും അല്‍പം എല്ലുപൊടിയും ചേര്‍ത്തിളക്കി സ്യൂഡോമൊണാസ് ലായനിയില്‍ മുക്കി തണലത്തുണക്കിയ ഇഞ്ചി വിത്ത് നടുക.
വിത്തിന്റെ വണ്ണത്തില്‍ മണ്ണിട്ടതിന് ശേഷം നന്നായി ഉണങ്ങിയ കരിയിലകളിട്ട് തെങ്ങോല കൊണ്ട് പുതയിടുക. നട്ട് കഴിഞ്ഞാലുടന്‍ മിതമായി നനയ്ക്കാം. പിന്നീട് ആഴ്ചയിലൊന്ന് എന്ന രീതിയില്‍ മഴ ലഭിക്കുന്നത് വരെ നനയ്ക്കണം.
നട്ട് ഒന്നര മാസത്തിന് ശേഷം മേല്‍വളം നല്‍കാം. സെന്റിന് 350 ഗ്രാം യൂറിയയും 200 ഗ്രാം പൊട്ടാഷും നല്‍കാം. ജൈവകൃഷിരീതിയില്‍ ചാണകപ്പൊടിയും ചാമ്പലും ചേര്‍ത്ത് പുതയിട്ടുകൊടുക്കാം. വാരങ്ങള്‍ക്കിടയില്‍ നിന്നും മണ്ണി കോരി ചെടിക്ക് ചുറ്റുമായി ഇടാം. വീണ്ടും ഒന്നര മാസം കഴിയുമ്പോള്‍ മേല്‍പ്പറഞ്ഞ അളവില്‍ ഒരുവളം കൂടി നല്‍കി നന്നായി പുതയിടാം.
പച്ചച്ചാണകം നീട്ടിക്കലക്കി ഒഴിക്കുന്നത് കൂടുതല്‍ ചിനപ്പുകള്‍ പൊട്ടാന്‍ സഹായിക്കും. വെള്ളം കെട്ടിനില്‍ക്കാനിടയായാല്‍ ഇഞ്ചി അഴുകിപ്പോകും. നട്ട് 180 ദിവസം കഴിഞ്ഞാല്‍ പച്ചക്കറിയാവശ്യത്തിനായി വിളവെടുക്കാം. ശാസ്ത്രീയ കൃഷിരീതികള്‍ പാലിച്ചാല്‍ ഒരു സെന്റില്‍ നിന്നും 100 കിലോ വരെ വിളവ് ലഭിക്കും. ഒരു സെന്റിലേക്ക് ആറ് കിലോഗ്രാം ഇഞ്ചി വിത്ത് വേണ്ടി വരും. 20-25 ഗ്രാം തൂക്കമുള്ള രണ്ട് മുകുളങ്ങളെങ്കിലുമുള്ള ഇഞ്ചിക്കഷണങ്ങളാണ് തടങ്ങളില്‍ നടേണ്ടത്.
