അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.‘പുഷ്പ: ദ റൂളി’ലെ രണ്ടാമത്തെ പാട്ടും എത്തി. സ്ലോ പേസിലെത്തി, ഫീൽ ഗുഡ് ബിജിഎമ്മുമായി എത്തിയിരിക്കുന്ന പാട്ട് പാടിയിരിക്കുന്നത് ശ്രേയ ഘോഷാൽ ആണ്. ലിറിക്കൽ വീഡിയോയായി എത്തിയിരിക്കുന്ന ‘സൂസേകി’ എന്ന പാട്ടിന്റെ പശ്ചാത്തലം പാട്ടിന്റെ തന്നെ ഷൂട്ടിംഗ് സെറ്റാണ്. ചന്ദ്രബോസിന്റെ വരികൾക്ക് സംഗീതം ഒരുക്കിയിരിക്കുന്നത് ഗായിക കൂടിയായ ദേവി ശ്രീ പ്രസാദ് ആണ്. ആ പാട്ടിലും സിഗ്നേച്ചർ സ്റ്റെപ്പുണ്ട്. പാട്ടിന് കൊറിയോഗ്രഫി ചെയ്തിരിക്കുന്നത് പ്രശസ്ത നൃത്തസംവിധായകൻ ഗണേഷ് ആചാര്യയും സംഘവുമാണ്.
ചിത്രത്തിലെ ആദ്യ ഗാനവും വലിയ ആരാധകരെ നേടിക്കൊടുത്തിട്ടുണ്ട്. മൂന്ന് ആഴ്ച കൊണ്ട് 46 മില്യൺ കാഴ്ച്ചക്കാരെയാണ് ഗാനം യൂട്യൂബിൽ സ്വന്തമാക്കിയിരിക്കുന്നത്. ഓഗസ്റ്റ് 15-ന് റിലീസിനെത്തുന്ന ചിത്രത്തിനായി കാത്തിരിക്കുകയാണ് പ്രേക്ഷകർ. സുകുമാറിന്റെ സംവിധാനത്തിലൊരുങ്ങുന്ന പുഷ്പയും രണ്ടാം ഭാഗം വലിയ ട്വിസ്റ്റുകളോടെയാണ് എത്തുന്നത്.
ചിത്രത്തിന്റെ ആദ്യ ഭാഗമായ ‘പുഷ്പ: ദ റൈസ്’ തെന്നിന്ത്യൻ ബോക്സ് ഓഫീസിൽ വലിയ ചലനമാണ് സൃഷ്ടിച്ചത്. പുഷ്പരാജ് എന്ന കഥാപാത്രമായി അല്ലു അർജുൻ എത്തുന്ന ചിത്രത്തില്‍ രശ്മിക മന്ദാനയാണ് നായിക. ബന്‍വാര്‍ സിംഗ് ഷെഖാവത്ത് ഐപിഎസ് എന്ന വില്ലനെയാണ് ചിത്രത്തില്‍ ഫഹദ് ഫാസിൽ അവതരിപ്പിക്കുന്നത്.
അഞ്ച് ഭാഷകളിലായാണ് രണ്ടാം ഭാഗവും ഒരുങ്ങുന്നത്. വമ്പന്‍ ബജറ്റിലൊരുങ്ങുന്ന സിനിമയ്ക്കായി അല്ലു പ്രതിഫലം വാങ്ങുന്നില്ലെന്നും പകരം ലാഭവിഹിതമാണ് കൈപ്പറ്റുന്നത് എന്നുള്ള റിപ്പോർട്ടുകൾ മുൻപെത്തിയിരുന്നു. സിനിമയുടെ വരുമാനത്തിന്റെ 33 ശതമാനമായിരിക്കും നടന്‍ സ്വീകരിക്കുക എന്നാണ് റിപ്പോര്‍ട്ട്. തിയേറ്റർ കളക്ഷന് പുറമെ സാറ്റലൈറ്റ്, ഒടിടി എന്നിവയിൽ നിന്നുള്ള വരുമാനത്തിന്റെ 33 ശതമാനവും ഇതിൽ ഉൾപ്പെടും എന്നാണ് സൂചനകൾ.
