സംഗീത ലോകത്തെ തലമുറകൾ ഒന്നിക്കുന്ന ചാനൽ ഫൈവ്ൻ്റെ 'ഹെഡ്മാസ്റ്റർ'

Kavalam Sreekumar, nithya mammen, jayachandran

ഏറെ പുതുമകളും അതിലേറെ കൗതുകങ്ങളുമായി മലയാളത്തിൽ ഒരു പുതിയ സിനിമ ഒരുങ്ങുന്നു. ചാനൽ ഫൈവ്ൻ്റെ ബാനറിൽ ശ്രീലാൽ ദേവരാജ് നിർമ്മിക്കുന്ന 'ഹെഡ്മാസ്റ്റർ'. മലയാള സിനിമാ ലോകത്തെ മൂന്ന് തലമുറകൾ 'ഹെഡ്മാസ്റ്ററി'ൽ ഒത്തുചേരുന്നു. 75 വയസ്സ് പിന്നിട്ടിട്ടും ഇന്നും ശബ്ദത്തിൽ ആർദ്ര പ്രണയത്തിൻ്റെ മധുരം സൂക്ഷിക്കുന്ന മലയാളത്തിൻ്റെ ഭാവ ഗായകൻ ജയചന്ദ്രൻ, തനതു നാടകങ്ങളുടെയും സംഗീതത്തിൻ്റെയും ആചാര്യൻ കാവാലം നാരായണ പണിക്കരുടെ മകൻ കാവാലം ശ്രീകുമാർ, പിന്നെ പുതിയ തലമുറയിലെ പുതുശബ്ദമായ നിത്യ മാമ്മൻ.

കഴിഞ്ഞ തലമുറയിലെ അധ്യാപകരുടെ ദുരിത ജീവിതങ്ങളുടെ നേർക്കാഴ്ചയാണ് 'ഹെഡ്മാസ്റ്റർ'. പ്രശസ്ത ചെറുകഥകൃത്ത് കാരൂരിൻ്റെ പ്രസിദ്ധ കഥയായ 'പൊതിച്ചോറി'ൻ്റെ ചലച്ചിത്ര ഭാഷ്യമാണ് 'ഹെഡ്മാസ്റ്റർ'. പ്രശസ്ത കവി പ്രഭാവർമ്മയുടെ വരികൾക്ക് കാവാലം ശ്രീകുമാർ സംഗീതം ഒരുക്കുന്നു. കാവാലം ശ്രീകുമാർ സംഗീതം ഒരുക്കുന്ന ആദ്യ സിനിമ കൂടിയാണിത്.

സംഗീത ലോകത്തിലെ തലമുറകളുടെ സംഗമം ഇപ്പോഴേ സിനിമാ ലോകത്തു ചർച്ചയായി കഴിഞ്ഞു. രാജിവ് നാഥ് സംവിധാനം നിർവഹിക്കുന്ന ചിത്രത്തിൻ്റെ തിരക്കഥ രാജീവ് നാഥും, കെ ബി വേണുവും ചേർന്ന് നിർവഹിച്ചിരിക്കുന്നു. ക്യാമറ പ്രവീൺ പണിക്കർ, എഡിറ്റിംഗ് ബീന പോൾ, പിആർഒ -അജയ് തുണ്ടത്തിൽ. ജനുവരി 14ന് തിരുവനന്തപുരത്ത് ചിത്രത്തിൻ്റെ ചിത്രീകരണം ആരംഭിക്കുന്നു.