ട്രെയിനിൽ അടിവസ്ത്രം മാത്രമിട്ട് എംഎല്‍എ; ചോദ്യം ചെയ്തയാളെ വെടിവെക്കുമെന്ന് ഭീഷണി

jdu mla
ന്യൂഡൽഹി: ട്രെയിനിൽ അടിവസ്ത്രം മാത്രമിട്ട് ജെഡിയു എംഎല്‍എ ഗോപാല്‍ മണ്ഡല്‍ യാത്ര ചെയ്​തത്​ വിവാദമായി. സ്​ത്രീ യാത്രക്കാർ ഉൾപ്പെടെ ഉണ്ടായിരുന്ന കമ്പാർട്ട്​മെന്‍റിലെ എംഎൽഎയുടെ പ്രവർത്തി ചോദ്യം ചെയ്​ത സഹയാത്രികനെ എംഎൽഎ അസഭ്യം പറഞ്ഞെന്നും വെടിവെക്കുമെന്ന്​ ഭീഷണിപ്പെടുത്തിയെന്നും പരാതിയുണ്ട്​. ബീഹാറിൽ നിന്നുള്ള എംഎൽഎയാണ് ഗോപാല്‍ മണ്ഡല്‍,

വ്യാഴാഴ്ച രാത്രി പട്‌നയില്‍ നിന്ന് ഡല്‍ഹിയിലേക്കുള്ള തേജസ് രാജധാനി എക്‌സ്പ്രസില്‍ കമ്പാർട്ട്​മെന്‍റിലൂടെ അടിവസ്​ത്രം മാത്രം ധരിച്ച്​ നടന്നത്​. അതേസമയം, തന്‍റെ വയറിന്​ സുഖമില്ലായിരുന്നെന്നും തിടുക്കത്തിൽ ശൗചാലയത്തിൽ പോയതുകൊണ്ടാണ്​ ഇങ്ങനെ സംഭവിച്ചതെന്നുമാണ്​ എംഎൽഎയുടെ വിശദീകരണം. താൻ സഹയാത്രികരോട്​ മോശമായി സംസാരിച്ചില്ലെന്നും അദ്ദേഹം പറയുന്നു.

കമ്പാർട്ട്​മെന്‍റിലുണ്ടായിരുന്ന പ്രഹദ് പാസ്വാൻ എന്നയാളാണ് എംഎൽഎയുടെ പ്രവൃത്തിയെ ചോദ്യം ചെയ്തത്. എംഎല്‍എയാണ് എന്നറിയാതെയാണ് താന്‍ ചോദ്യം ചെയ്തതെന്നും ക്ഷുഭിതനായ അദ്ദേഹം തന്‍റെ സഹോദരിയേയും അമ്മയേയും ചേര്‍ത്ത് അസഭ്യം പറഞ്ഞെന്നും പ്രഹദ് പരാതിപ്പെടുന്നു. തനിക്കൊപ്പം നിന്ന മറ്റ്​ യാത്രക്കാരെ തല്ലുമെന്നും വെടിവെക്കുമെന്നും ഭീഷണിപ്പെടുത്തിയതായും പ്രഹദ് പാസ്വാൻ പറയുന്നു. 

ഇയാൾ സംഭവത്തിൽ ആർ പി എഫിന്​ പരാതി നൽകിയിരുന്നു​. ഇതേതുടർന്ന് ഗോപൽ മണ്ഡലിനെ പിന്നീട്​ മറ്റൊരു കമ്പാർട്ട്​മെന്‍റിലേക്ക്​ മാറ്റിയാണ്​ പ്രശ്​നം പരിഹരിച്ചത്​.