തിരുവനന്തപുരം: വിദ്വേഷ പ്രസംഗത്തിന്റെ പേരില് അറസ്റ്റിലായ പി.സി. ജോര്ജിന് പിന്തുണ നല്കുകയും പൊലീസിനുമേല് സമ്മര്ദ്ദം സൃഷ്ടിക്കുകയും ചെയ്ത കേന്ദ്രമന്ത്രി വി. മുരളീധരന്റെ നടപടി അധികാര ദുര്വിനിയോഗമാണെന്ന് എ.എ. റഹീം എം.പി. രാജ്യത്തിന്റെ മത സഹിഷ്ണുത തകര്ക്കാന് ഹീനമായ വിദ്വേഷ പ്രചരണം നടത്തിയ കുറ്റവാളിയ്ക്ക് നേരിട്ടെത്തി പിന്തുണ പ്രഖ്യാപിക്കുക വഴി കേന്ദ്ര സഹമന്ത്രി സത്യപ്രതിജ്ഞാ ലംഘനം നടത്തിയിരിക്കുകയാണെന്ന് അദ്ദേഹം പ്രസ്താവനയില് ആരോപിച്ചു.
വിഷയം പാര്ലമെന്റില് ഉന്നയിക്കുമെന്നും അദ്ദേഹം വ്യക്തമാക്കി. മതമൈത്രി തകര്ക്കാനും വര്ഗീയ കലാപം സൃഷ്ടിക്കാനും ആസൂത്രിതമായി സംഘപരിവാര് തീരുമാനിച്ചു നടപ്പിലാക്കുന്നതാണ് ഇത്തരം വര്ഗ്ഗീയ വിദ്വേഷ പ്രചരണങ്ങള്. അതിന് കേന്ദ്രമന്ത്രി തന്നെ പിന്തുണയുമായി എത്തുന്നത് അത്യന്തം അപലപനീയമാണ്.
മന്ത്രി തന്റെ ഭരണഘടനാപരമായ ഉത്തരവാദിത്വം ഉപേക്ഷിച്ചിരിക്കുന്നു.അദ്ദേഹം വര്ഗീയതയുടെ ബ്രാന്റ് അംബാസഡര് ആയി മാറിയിരിക്കുന്നു. വി. മുരളീധരന്റെ നടപടിയില് ശക്തമായി പ്രതിഷേധം രേഖപ്പെടുത്തുന്നുവെന്നും അദ്ദേഹം പ്രസ്താവനയില് വ്യക്തമാക്കി.