കണ്ണൂർ: കെ റെയിൽ പദ്ധതിക്കായുള്ള കല്ലിടലിനെതിരെ കണ്ണൂർ എടക്കാട് പ്രദേശവാസികളുടെ പ്രതിഷേധം. മുഴപ്പിലങ്ങാട് പഞ്ചായത്തിലെ നടാലിൽ ദേശീയപാതക്ക് സമാന്തരമായാണ് കെ റെയിൽ ഉദ്യോഗസ്ഥർ കല്ലിട്ടത്. പൊലീസിൻറെ സാന്നിധ്യത്തിലായിരുന്നു നടപടി.
നിർദിഷ്ട ദേശീയപാതക്ക് വേണ്ടി ഭൂമി ഏറ്റെടുത്തതിന് സമീപമാണ് കെ റെയിലിനായി കല്ല് സ്ഥാപിച്ചത്. അതേസമയം, കെ റെയിൽ ഉദ്യോഗസ്ഥരുടെയും പൊലീസുകാരുടെയും സാന്നിധ്യത്തിൽ തന്നെ ഇട്ട കല്ല നാട്ടുകാർ പിഴുതുമാറ്റി.
കല്ല് സ്ഥാപിക്കുന്നത് സംബന്ധിച്ച് സർക്കാറിൽ നിന്ന് യാതൊരു മുൻകൂർ അറിയിപ്പും ലഭിച്ചിട്ടില്ലെന്ന് നാട്ടുകാർ പറഞ്ഞു. പദ്ധതിക്കെതിരെ ശക്തമായ പ്രതിഷേധം ഉയർത്തും. കല്ലിടാൻ അനുവദിക്കില്ലെന്നും അവർ വ്യക്തമാക്കി.
വ്യാഴാഴ്ച കണ്ണൂർ ചാല അമ്പലത്തിനുസമീപം കല്ലിടാനായി എത്തിയ അധികൃതരെ കെ റെയിൽ വിരുദ്ധ സമിതിയുടെ നേതൃത്വത്തിൽ തടഞ്ഞിരുന്നു. തുടർന്ന് വൻ പൊലീസ് സന്നാഹം സ്ഥലത്തെത്തി പ്രതിഷേധക്കാരെ അറസ്റ്റ് ചെയ്തുനീക്കി. തുടർന്ന് സർവേ പുനരാരംഭിക്കുകയും കുറ്റി സ്ഥാപിക്കുകയും ചെയ്തു.
വൈകീട്ടോടെ സ്ഥലത്തെത്തിയ കെ.പി.സി.സി പ്രസിഡൻറ് കെ. സുധാകരൻറെ നേതൃത്വത്തിൽ വീണ്ടും സർവേ തടഞ്ഞു. സർവേക്കുറ്റികൾ യൂത്ത് കോൺഗ്രസ് സംസ്ഥാന വൈസ് പ്രസിഡൻറ് റിജിൽ മാക്കുറ്റിയുടെ നേതൃത്വത്തിൽ പിഴുതുമാറ്റി. ഇതോടെ പൊലീസുകാരും യൂത്ത് കോൺഗ്രസ് പ്രവർത്തകരും തമ്മിൽ സംഘർഷമുണ്ടാവുകയും ചെയ്തു.
Comments