കത്ത് വിവാദം ;ഇന്ന് പ്രത്യേക കൗൺസിൽ യോഗം ചേരും

തിരുവനന്തപുരം:തിരുവനന്തപുരം  നഗരസഭയിലെ കത്ത് വിവാദം ചർച്ചചെയ്യാൻ ഇന്ന് പ്രത്യേക കൗൺസിൽ യോഗം ചേരും. ബിജെപി അടക്കമുള്ള പ്രതിപക്ഷ പാർട്ടികൾ നൽകിയ കത്ത് പരിഗണിച്ചാണ് മേയർ ആര്യാ രാജേന്ദ്രൻ പ്രത്യേക കൗൺസിൽ വിളിച്ചത്. ഈ സാഹചര്യത്തിൽ വൈകീട്ട് നാല് മണിക്ക് ചേരുന്ന പ്രത്യേക കൗൺസിൽ യോഗം പ്രതിഷേഡ് പ്രകടങ്ങൾക്ക് സാക്ഷ്യം വഹിക്കാൻ സാധ്യതയുണ്ട്. 

ഈ മാസം 22 ന് യോഗം വിളിക്കണമെന്നായിരുന്നു ബിജെപി ആവശ്യം. എന്നാൽ അതിന് രണ്ട് ദിവസം മുമ്പായാണ് മേയർ പ്രത്യേക കൗൺസിൽ വിളിച്ചു ചേർത്തത്. പ്രത്യേക കൗൺസിൽ യോഗത്തിൽ നിന്ന് മേയറെ മാറ്റി നിർത്തണമെന്ന ആവശ്യവും ബിജെപി ഉയർത്തിയിട്ടുണ്ട്. 

സത്യപ്രതി‍ജ്ഞാലംഘനം നടത്തിയ മേയർ ആര്യാ രാജേന്ദ്രൻ ജനാധിപത്യ മര്യാദ പാലിച്ച് യോഗത്തിൽ നിന്ന് വിട്ട് നിൽക്കണമെന്നാണ് ആവശ്യം. എന്നാൽ ഈ സമ്മർദ്ദത്തിന് വഴങ്ങേണ്ടെന്നാണ് എൽഡിഎഫ് തീരുമാനം. കൗൺസിൽ യോഗത്തിന് മുമ്പ് രാവിലെ എൽഡിഎഫ് യോഗം ചേരുന്നുണ്ട്.