കർണാടക തെര‍ഞ്ഞെടുപ്പ് ഫലം ബിജെപിയുടെ ഹുങ്കിനുള്ള മറുപടി: മുഖ്യമന്ത്രി

 

തിരുവനന്തപുരം: കർണാടക തെരഞ്ഞെടുപ്പ് ഫലം രാജ്യത്തിന്റെ മുന്നോട്ട് പോക്കിനുള്ള സൂചനയാണെന്നും ബിജെപിയുടെ ഹുങ്കിനുളള മറുപടിയാണെന്നും മുഖ്യമന്ത്രി പിണറായി വിജയൻ. ബിജെപിക്ക് ഇനിയും തുടർച്ച ഉണ്ടായാൽ രാജ്യത്ത് സർവനാശം ഉണ്ടാകുമെന്ന് ജനങ്ങൾ ഭയക്കുന്നുവെന്നും അടുത്ത തെരഞ്ഞെടുപ്പിൽ ബിജെപി തറ പറ്റുമെന്നതിൽ സംശയമില്ല എന്നും രണ്ടാം പിണറായി സർക്കാരിന്റെ വാർഷികാഘോഷത്തിൽ മുഖ്യമന്ത്രി പറഞ്ഞു.

വർഗീയ അജണ്ടകളുമായി മുന്നോട്ടു പോയ ബിജെപിക്കുള്ള തിരിച്ചടിയാണ് കർണാടക തെരഞ്ഞെടുപ്പ് ഫലം. അവരുടെ ഹുങ്കിനുള്ള മറുപടി. ഏക സിവിൽ കോഡ് അടക്കമുള്ള വിഷയങ്ങളുമായി മുന്നോട്ടു പോകാനായിരുന്നു അവരുടെ പദ്ധതി. എന്നാൽ ബിജെപിക്ക് ഇനിയും തുടർച്ച ഉണ്ടായാൽ രാജ്യത്ത് സർവനാശം ഉണ്ടാകുമെന്ന് ജനങ്ങൾ ഭയക്കുന്നു. രാജ്യത്തിന്റെ മുന്നോട്ടു പോക്കിനുള്ള സൂചനയാണ് തെരഞ്ഞെടുപ്പ് ഫലം. എല്ലാവരും അത് ഉൾക്കൊള്ളണം.

കോൺഗ്രസ്സും രാജ്യത്തിന്റെ സാഹചര്യം മനസിലാക്കണം. കോൺഗ്രസ്‌ പഴയ കോൺഗ്രസ്‌ അല്ല. ബിജെപിക്ക് എതിരെ നിൽക്കുന്ന എല്ലാവരെയും കൂട്ടി യോജിപ്പിക്കാനാകണം. ഒരു കക്ഷിക്ക് മാത്രമായി അതിന് കഴിയില്ല.  ഓരോ സംസ്ഥാനത്തെയും സ്ഥിതി വ്യത്യസ്തമാണ്. അടുത്ത തെരഞ്ഞെടുപ്പിൽ ബിജെപി തറ പറ്റുമെന്നതിൽ സംശയമില്ലെന്നും മുഖ്യമന്ത്രി പറഞ്ഞു.