കര്‍ണാടക പൊലീസിന്റെ നോട്ടീസ് കിട്ടിയിട്ടില്ല, കേസ് നിയമപരമായി നേരിടും; വിജേഷ് പിള്ള
Tue, 14 Mar 2023
കൊച്ചി : സ്വര്‍ണക്കടത്ത് കേസ് പ്രതി സ്വപ്ന സുരേഷിന്റെ പരാതിയില്‍ കര്‍ണാടക പൊലീസ് രജിസ്റ്റര്‍ ചെയ്ത കേസ് നിയമപരമായി നേരിടുമെന്ന് വിജേഷ് പിളള. തനിക്ക് പൊലീസിന്റെ നോട്ടീസ് കിട്ടിയിട്ടില്ലെന്നും അതു കിട്ടിയശേഷം തുടര്‍ നടപടികള്‍ ആലോചിക്കുമെന്നും വിജേഷ് പിളള പറഞ്ഞു.
സ്വപ്ന സുരേഷിനെ ഭീഷണിപ്പെടുത്തിയെന്ന പരാതിയില്‍ കര്‍ണാടക കെ ആര്‍ പുര പൊലീസാണ് വിജേഷ് പിള്ളയ്‌ക്കെതിരെ എഫ്‌ഐആര്‍ രജിസ്റ്റര്‍ ചെയ്തിട്ടുള്ളത്. ഇതേ തുടര്‍ന്ന് ഇവര്‍ കൂടിയാഴ്ച നടത്തിയെന്ന് പറയുന്ന സുറി ഹോട്ടലിലെത്തി സ്വപ്നയുമായി പൊലീസ് തെളിവെടുപ്പ് നടത്തിയിരുന്നു. കേസില്‍ സ്വപ്‌നയുടെ മൊഴിയും പൊലീസ് രേഖപ്പെടുത്തിയിട്ടുണ്ട്. സിസിടിവി ദൃശ്യങ്ങള്‍ അടക്കം പൊലീസ് പരിശോധിക്കും.
