ജിയോയുടെ 5ജി ഫോണ്‍ വരുന്നു ; പുതിയ വിവരങ്ങൾ ഇങ്ങനെ

jio

തിരുവനന്തപുരം : 5ജി പിന്തുണയോടെ പുതിയ ജിയോഫോണ്‍ പുറത്തിറക്കുമെന്ന് റിലയന്‍സ് മുൻപേ പ്രചരിപ്പിച്ചിരുന്നു. ഫോൺ 2021 ല്‍  വിപണിയിലെത്തിക്കുമെന്നാണ് പ്രതീക്ഷിച്ചിരുന്നത്, എന്നാല്‍ ഇപ്പോള്‍ ഈ വര്‍ഷം ഒക്ടോബര്‍-നവംബര്‍ മാസങ്ങളില്‍ ഫോണ്‍ വിപണിയിലെത്തുമെന്നാണ് പുതിയ റിപ്പോര്‍ട്ട്. വിലക്കുറവുള്ള ഒരു സ്മാര്‍ട്ട്‌ഫോണിനായി കമ്പനി റിലയന്‍സുമായി പങ്കാളിത്തം ഏര്‍പ്പെടുത്തിയതായി ഗൂഗിള്‍ സിഇഒ സുന്ദര്‍ പിച്ചൈ കഴിഞ്ഞ മാസം പ്രഖ്യാപിച്ചിരുന്നു. എങ്കിലും, ഫോണ്‍ എപ്പോള്‍ ഇന്ത്യയിൽ ലഭ്യമാകുമെന്ന് പിച്ചൈ വെളിപ്പെടുത്തിയിട്ടില്ല. കഴിഞ്ഞ വര്‍ഷം 7.7 ശതമാനം ഓഹരികള്‍ക്കായി ഗൂഗിള്‍ ജിയോ പ്ലാറ്റ്‌ഫോമില്‍ 33,737 കോടി രൂപ നിക്ഷേപിച്ചിരുന്നു.

എന്നാൽ റിലയന്‍സ് ഫോണുമായി ബന്ധപ്പെട്ട ഒരു പ്രഖ്യാപനവും നടത്തിയിട്ടില്ല. എന്നാല്‍ ഇപ്പോള്‍ ഊഹാപോഹങ്ങള്‍ സൂചിപ്പിക്കുന്നത് ദീപാവലിയോടനുബന്ധിച്ച് നവംബര്‍ അല്ലെങ്കില്‍ ഒക്ടോബറില്‍ ഫോണ്‍ ലോഞ്ച് ചെയ്യുമെന്നാണ്. റിപ്പോര്‍ട്ടുകള്‍ പ്രകാരം, നിലവില്‍ ഡിക്‌സണ്‍ ടെക്‌നോളജീസ്, യുടിഎല്‍ നിയോലിന്‍സ്, ഫ്‌ലെക്‌ട്രോണിക്‌സ്, വിന്‍ടെക് മൊബൈല്‍സ് എന്നിവയുടെ നിര്‍മ്മാണ യൂണിറ്റുകളില്‍ സ്മാര്‍ട്ട്‌ഫോണ്‍ പരീക്ഷിച്ചു കൊണ്ടിരിക്കുകയാണ്. ജിയോമാര്‍ട്ട്, റിലയന്‍സ് ഡിജിറ്റല്‍ എന്നിവയുള്‍പ്പെടെയുള്ള റിലയന്‍സിലെ ഓണ്‍ലൈന്‍ സ്‌റ്റോറുകളില്‍ ഈ ഉപകരണം പ്രത്യേകമായി ലഭ്യമാകുമെന്നാണ് റിപോർട്ടുകൾ. ഇത് ജിയോ സിം ഉപയോഗിച്ച് ബണ്ടില്‍ ചെയ്യും. എല്ലായ്‌പ്പോഴും ചെയ്തതുപോലെ ഫോണിനൊപ്പം ആവേശകരമായ ഓഫറുകളും റിലയന്‍സ് നല്‍കുമെന്നാണ് പ്രതീക്ഷിക്കുന്നത്.

 ആന്‍ഡ്രോയിഡ് ഓപ്പറേറ്റിംഗ് സിസ്റ്റത്തിലായിരിക്കും ഫോൺ പ്രവര്‍ത്തിക്കുക എന്നാണ് പ്രതീക്ഷിക്കുന്നത്. ഇതിന്റെ വില ഏകദേശം 3650 രൂപയിലും താഴെയായിരിക്കുമെന്നാണ് റിപോർട്ടുകൾ. 2018 ല്‍ റിലയന്‍സ് നേരത്തെ ജിയോ ഫോണ്‍ 2 പുറത്തിറക്കിയിരുന്നു. ക്വാര്‍ട്ടി കീപാഡ് ഉപയോഗിച്ചാണ് ഈ ഉപകരണം പുറത്തിറക്കിയത്, ബ്ലാക്ക്‌ബെറി ഫോണുകളോട് സാമ്യമുള്ള രൂപകല്‍പ്പനയും 4 ജിക്ക് പിന്തുണയും ഇതു നല്‍കിയിരുന്നു. ഹൈ എന്‍ഡ് 4 ജി സ്മാര്‍ട്ട്‌ഫോണുകള്‍ വാങ്ങാന്‍ കഴിയാത്ത ആളുകള്‍ക്കായി ഈ ഫോണ്‍  2999 രൂപയ്ക്കാണ് ഇന്ത്യയില്‍ ലോഞ്ച് ചെയ്തത്.