താരിഫ് നിരക്ക് കൂട്ടിയതിന് പിന്നാലെ ഡബിള്‍ ഡാറ്റ ഓഫര്‍ നിര്‍ത്തലാക്കി വിഐ

ചില പ്ലാനുകള്‍ക്കൊപ്പം ഇരട്ടി ഡാറ്റ നല്‍കുന്ന പ്ലാനാണ് കമ്ബനി അവതരിപ്പിച്ചിരുന്നത്. ഈ പ്ലാനിലൂടെ ദിവസവും രണ്ട് ജിബി ഡാറ്റ ആനുകൂല്യമാണ് ഉള്ളത്. ഇതിനൊപ്പം അധികമായി രണ്ട് ജിബി ഡാറ്റ കൂടി നല്‍കുന്നതായിരുന്ന വിഐയുടെ ഡബിള്‍ ഡാറ്റ ഓഫര്‍.

ദിവസവും 4 ജിബി ഡാറ്റ നല്‍കുന്ന പ്ലാനുകള്‍ കുറഞ്ഞ വിലയ്ക്ക് ലഭ്യമാക്കിയ വിഐ മറ്റ് ടെലിക്കോം കമ്ബനികള്‍ക്ക് വലിയ വെല്ലുവിളിയായിരുന്നു ഉയര്‍ത്തിയത്. കൂടുതല്‍ ഡാറ്റ ആവശ്യമുള്ള ആളുകള്‍ വലിയ തോതില്‍ തിരഞ്ഞെടുത്തിരുന്ന പ്ലാന്‍ ആയിരുന്നു ഇത്. 

ഈ പ്ലാനുകള്‍ അണ്‍ലിമിറ്റഡ് കോളിങ്, ദിവസവും 100 എസ്‌എംഎസുകള്‍, ഒടിടി ആനുകൂല്യങ്ങള്‍ എന്നിവയും നല്‍കിയിരുന്നു. 299 രൂപ, 449 രൂപ, 699 രൂപ എന്നീ പ്ലാനുകളിലാണ് ഡബിള്‍ ഡാറ്റ ആനുകൂല്യം നല്‍കിയിരുന്നത്. ഈ പ്ലാനുകള്‍ക്ക് വില വര്‍ധിപ്പിച്ചതിന് പിന്നാലെയാണ് ഡബിള്‍ ഡാറ്റ ആനുകൂല്യവും നീക്കം ചെയ്തത്.

ഇനി മുതല്‍ 299 രൂപ, 449 രൂപ, 699 രൂപ പ്ലാനുകളിലൂടെ ഉപയോക്താക്കള്‍ക്ക് ദിവസവും 4 ജിബി ഡാറ്റയ്ക്ക് പകരം 2 ജിബി ഡാറ്റ മാത്രമേ ലഭിക്കൂ. കേരളം അടക്കമുള്ള സര്‍ക്കിളുകളിലെ വെബ്‌സൈറ്റുകളില്‍ നിന്നും ഡാറ്റ ആനുകൂല്യം എടുത്ത് മാറ്റിയിട്ടുണ്ട്.

വോഡാഫോണ്‍ ഐഡിയ നേരത്തെ 299 രൂപയ്ക്ക് നല്‍കിയിരുന്ന പ്രീപെയ്ഡ് പ്ലാന്‍ ഇപ്പോള്‍ 359 രൂപയ്ക്കാണ് നല്‍കുന്നത്. ഈ പ്ലാനിലൂടെ ഉപയോക്താക്കള്‍ക്ക് ദിവസവും 2 ജിബി ഡാറ്റയാണ് ലഭിക്കുന്നത്. ഇന്ത്യയിലെ എല്ലാ നെറ്റ് വര്‍ക്കുകളിലേക്കും അണ്‍ലിമിറ്റഡ് വോയിസ് കോളിങ് ആനുകൂല്യങ്ങളും പ്ലാനിലൂടെ ലഭിക്കുന്നു. 28 ദിവസത്തേക്ക് 100 എസ്‌എംഎസുകളും പ്ലാനിലൂടെ ലഭിക്കും. ഈ പ്ലാനിനൊപ്പം വരിക്കാര്‍ക്ക് വിഐ മൂവീസ് ആന്റ് ടിവി ആനുകൂല്യവും സൗജന്യമായി ലഭിക്കും.