ഐതിഹ്യങ്ങളും കല്ലിലെ തെളിവുകളും നിറഞ്ഞ പാറക്കൂട്ടങ്ങളുടെ ഇടം 'പാണ്ഡവൻപാറ '

pandavanpara

പാണ്ഡവൻ പാറ 

വിശ്വാസവും യാഥാര്‍ത്ഥ്യവും തമ്മില്‍ തിരിച്ചറിയുവാന്‍ പോലും ചിലപ്പോള്‍ ഇടങ്ങളില്‍ ബുദ്ധിമുട്ടാണ്. അത്തരത്തിലൊരിടമാണ് ആലപ്പുഴ ചെങ്ങന്നൂരിലെ പാണ്ഡവന്‍ പാറ. മഹാഭാരതത്തോളം പഴക്കമുള്ള ഐതിഹ്യങ്ങളാണ് പാണ്ഡവന്‍ പാറയ്ക്കും ഇവിടുത്തെ പാണ്ഡവന്‍പാറ ശ്രീകൃഷ്ണക്ഷേത്രത്തിനുമുള്ളത്.

മഹാഭാരതവുമായാണ് പാണ്ഡവന്‍ പാറയുടെ ഐതിഹ്യങ്ങള്‍ ചേര്‍ന്നു കിടക്കുന്നത്. തങ്ങളുടെ അജ്ഞാത വനവാസക്കാലത്ത് പാണ്ഡവര്‍ ഇവിടെയെത്തിയെന്നും നാളുകളോളം ഇവിടുത്തെ കുന്നിന്‍മുകളില്‍ താമസിച്ചു എന്നുമാണ് വിശ്വസിക്കപ്പെടുന്നത്.പേരുപോലെ തന്നെ കൂറ്റന്‍ പാറക്കൂട്ടങ്ങളുടെ ഒരു കൂട്ടമാണ് പാണ്ഡവന്‍ പാറ എന്നറിയപ്പെടുന്നത്.ട്രക്കിങ്ങിനും കാടുകയറ്റങ്ങള്‍ക്കും സാധ്യതകളേയില്ലാത്ത ജില്ലയായ ആലപ്പുഴയില്‍ സ്ഥിരം കാഴ്ചകളില്‍ നിന്നും അല്പം വ്യത്യസ്തത നല്കുന്ന ഇടമാണ് ചെങ്ങന്നൂരിന് സമീപം സ്ഥിതി ചെയ്യുന്ന പാണ്ഡവന്‍ പാറ.

പാണ്ഡവര്‍ ഇവിടെ താമസിച്ചിരുന്നു എന്നതിന്‍റെ പല അടയാളങ്ങളും ഇന്നും ഇവിടുത്തെ പാറകളില്‍ തെളിഞ്ഞു കാണാം. ഭീമന്റെ കാലടിപതിഞ്ഞ കാലടിക്കല്ല്, പാണ്ഡവര്‍ ഇരുന്നത് എന്നു വിശ്വസിക്കപ്പെടുന്ന കസേരയുടെ ആകൃതിയിലുള്ള കസേരക്കല്ല്, പടിപ്പുരയുടെ രൂപമുള്ള പടിപ്പുരക്കല്ല്, മു​റു​ക്കാ​ന്‍ ചെ​ല്ലം, സിം​ഹാ​സ​നം, താ​മ​ര ആ​കൃ​തി​യി​ലെ സ്തൂ​പ​ങ്ങ​ള്‍,ആ​ന​യു​ടെ ആ​കൃ​തി​യി​ലെ പാ​റ എന്നിങ്ങനെ നിരവധി കാഴ്ചകള്‍ ഇവിടെയുണ്ട്.

പാണ്ഡവന്‍ പാറയിലെ പാറക്കെട്ടുകള്‍ക്ക് മുകളിലായി ഒരു ജലസ്രോതസ്സുണ്ട്. പ്രദേശവാസികള്‍ ഇതിനെ കന്യാകുമാരി എന്നാണ് വിളിക്കുന്നത്. പ​ടി​പ്പു​ര​യി​ല്‍​നി​ന്ന്​ 100 മീ​റ്റ​ര്‍ വ​ട​ക്കു​കി​ഴ​ക്കു മാ​റി​യാ​ണ് ഇതുള്ളത്. എത്ര കടുത്ത വേനലായാലും ഇവിടുത്തെ വെള്ളം വറ്റില്ല എന്നൊരു പ്രത്യേകതയുമുണ്ട്.പാണ്ഡവന്‍ പാറയില്‍ താമസിച്ചിരുന്ന കാലത്ത് പാണ്ഡവര്‍ അടുത്തുള്ള ഓരോ ക്ഷേത്രങ്ങളില്‍ ആരാധന നടത്തിയിരുന്നു എന്നാണ് വിശ്വാസം.

ചെങ്ങന്നൂരില്‍ നിന്നും ചെറിയനാട് റൂട്ടില്‍ 1.1 കിലോമീറ്റര്‍ ദൂരയാണ് പാണ്ഡവന്‍പാറയുള്ളത്. ചെങ്ങന്നൂര്‍ റെയില്‍വേ സ്റ്റേഷനില്‍ നിന്നും വരുമ്ബോള്‍ ഓവര്‍ബ്രിഡ്ജ് തൊട്ടു മുമ്ബ് ഉടന്‍ ഇടത്തോട്ട് തിരിഞ്ഞ് ഇവിടേക്ക് കയറാം.