കൊറോണ വൈറസ്​ ചൈനീസ് ലാബിൽ നിന്ന്​ ചോർന്നതാകാം; യു.എസ് പഠന റിപ്പോർട്ട്​ പുറത്ത്​

wuhaan

കൊറോണ വൈറസ്​ വുഹാനിലെ ചൈനീസ് ലാബിൽ നിന്നും ചോർന്നതാകാമെന്ന് യു.എസ് പഠന റിപ്പോർട്ട്​ പുറത്ത്​ വിട്ട്​ വാൾസ്​ട്രീറ്റ്​ ​ജേണൽ. യു.എസ്​ ഗവൺമെന്റിന്​ കീഴിലുള്ള നാഷണൽ ലബോറിട്ടറിയാണ്​ പഠനം നടത്തിയത്​. ഇതുമായി ബന്ധപ്പെട്ട്​ കൂടുതൽ പരിശോധന വേണമെന്നും പഠനത്തിൽ പറയുന്നു. ഇത് സംബന്ധിച്ച് വീണ്ടും അന്വേഷണം നടത്താന്‍ യുഎസ് പ്രസിഡന്റ് ജോ ബൈഡന്‍ രഹസ്യാന്വേഷണ ഏജന്‍സികള്‍ക്ക് നിര്‍ദേശം നല്‍കി എന്നും റിപ്പോർട്ടുകളുണ്ട്. കാലിഫോർണിയയിലെ ലോറൻസ്​ ലിവ്​മോർ നാഷണൽ ലബോറട്ടറിയാണ്​ കൊറോണ വൈറസിനെ കുറിച്ചുള്ള പഠനത്തിന്​ പിന്നിൽ.

​മുൻ യു.എസ്​ പ്രസിഡന്റ്​ ഡോണൾഡ്​ ട്രംപ്​ അധികാരമൊഴിയാൻ മാസങ്ങൾ മാത്രം ബാക്കി നിൽക്കെയായിരുന്നു പഠനം. കൊറോണ വൈറസിന്റെ ജീനുകളെ പഠനവിധേയമാക്കിയാണ്​ ലബോറട്ടറി പഠന റിപ്പോർട്ട്​ തയാറാക്കിയതെന്നും വാൾസ്​ട്രീറ്റ്​ ജേണൽ പറയുന്നു.

ചൈന കൊറോണ വൈറസ് ഔദ്യോഗികമായി സ്ഥിരീകരിക്കുന്നതിനു മുമ്പ് വുഹാനിലെ വൈറോളജി ഇന്‍സ്റ്റിറ്റ്യൂട്ടിലെ മൂന്നു ഗവേഷകര്‍ രോഗബാധിതരായി ചികിത്സ തേടിയിരുന്നുവെന്ന് യു.എസ് രഹസ്യാന്വേഷണ റിപ്പോര്‍ട്ട് ചൂണ്ടിക്കാട്ടിയിരുന്നു. വൈറസിന്റെ ഉത്ഭവത്തെക്കുറിച്ച് ചൈന സുതാര്യത പുലര്‍ത്തുന്നില്ലെന്നാണ് അമേരിക്കയുടെ ആരോപണം.

കൊറോണ വൈറസിന്റെ ഉദ്​ഭവത്തെ കുറിച്ച്​ രണ്ട്​ സാധ്യതകളാണ്​ യു.എസ്​ രഹസ്യാന്വേഷണ ഏജൻസികൾ മുന്നോട്ട്​ വെക്കുന്നത്​. വൈറസ്​ വുഹാനിലെ ലാബിൽ നിന്ന്​ ചോർന്നതാകാമെന്ന്​ യു.എസ്​ രഹസ്യാന്വേഷണ ഏജൻസികൾ സംശയിക്കുന്നുണ്ട്​. അല്ലെങ്കിൽ മൃഗങ്ങളിൽ നിന്ന്​ വൈറസ്​ മനുഷ്യരിലേക്ക്​ പകർന്നതാകാം.