അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.രാജ്യത്തെ പ്രമുഖ സോഷ്യൽ ബാങ്കായ ഇസാഫ് സ്‌മോൾ ഫിനാൻസ് ബാങ്കിന്റെ ഐടി രംഗം ശക്തിപ്പെടുത്തുന്നതിനും ഡിജിറ്റൽ ബാങ്കിങ് മേഖലയുടെ കാര്യക്ഷമത വർധിപ്പിക്കുന്നതിനും ആഗോള ഐടി ഇൻഫ്രാസ്ട്രക്ചർ സേവന ദാതാക്കളായ കിൻഡ്രിലുമായി സഹകരിക്കാൻ ധാരണയായി. നൂതന സാങ്കേതിക വിദ്യയുടെ സഹായത്തോടെ ഇടപാടുകാർക്ക് മികച്ച ബാങ്കിങ് സൗകര്യം നൽകുന്നതിന്റെ ഭാഗമായാണ് ഈ സഹകരണം. ബാങ്കിന്റെ തന്ത്രപ്രധാന ഐടി മേഖലയിലും ഡിജിറ്റൽ ബാങ്കിങ്ങിലും സൈബർ സെക്യൂരിറ്റിയിലും കിൻഡ്രിലിന്റെ വിദഗ്‌ധ സേവനം ലഭ്യമാകും. ഇതോടെ, ബാങ്കിന്റെ ഐടി രംഗം പൂർണമായി ആധുനികവൽക്കരിക്കും. ഇടപാടുകാരുടെ ആവശ്യങ്ങൾ, ഓൺലൈൻ സേവനങ്ങൾ, പരാതി പരിഹാര സംവിധാനം എന്നിവ കൂടുതൽ കാര്യക്ഷമമാകും.
ഗ്രാമീണ മേഖലയിലെ അസംഘടിത ജനവിഭാഗങ്ങൾ ഉൾപ്പടെ, എല്ലാവരെയും ഉൾപ്പെടുത്തിയുള്ള സാമ്പത്തിക വികസനമെന്ന ഇസാഫ് ബാങ്കിന്റെ കാഴ്ചപ്പാടിനെ സാങ്കേതിക പരിജ്ഞാനം നൽകി ശക്തിപ്പെടുത്തുകയാണ് സഹകരണത്തിലൂടെ ലക്ഷ്യമിടുന്നതെന്ന് കിൻഡ്രിൽ ഇന്ത്യ പ്രസിഡന്റ് ലിംഗരാജു സവ്‌കർ പറഞ്ഞു. ഇതിന്റെ ഭാഗമായി കൊച്ചിയിൽ ‘സപ്പോർട്ട് ആൻഡ് ഡെലിവറി സെന്റർ’ ആരംഭിക്കുമെന്നും അദ്ദേഹം പറഞ്ഞു.
ഇന്ത്യയിലെ മുൻനിര സോഷ്യൽ ബാങ്കായി മാറുന്നതിനുള്ള ഇസാഫ് ബാങ്കിന്റെ പ്രവർത്തനങ്ങൾക്ക് ശക്തിപകരുന്നതാണ് കിൻഡ്രിലുമായുള്ള സഹകരണമെന്ന് ഇസാഫ് ബാങ്ക് എക്സിക്യുട്ടീവ് ഡയറക്ടർ ജോർജ് കെ ജോൺ പറഞ്ഞു. “ഇടപാടുകാർക്ക് തടസരഹിതമായ ബാങ്കിങ് സേവനം കൂടുതൽ സുരക്ഷിതമായി നൽകാൻ ഇസാഫ് ബാങ്ക് എക്കാലവും പ്രതിബദ്ധരാണ്. ആധുനിക സാങ്കേതിക വിദ്യയുടെ സഹായത്തോടെ ഓൺലൈൻ വഴിയുള്ള ബാങ്കിന്റെ പ്രവർത്തനം കാര്യക്ഷമമാക്കുകയാണ് പങ്കാളിത്തത്തിലൂടെ ലക്ഷ്യമിടുന്നത്. ഉപഭോക്തൃ കേന്ദ്രീകൃത ഡിജിറ്റൽ ബാങ്കിങ് സൗകര്യം കൂടുതൽ മെച്ചപ്പെടും. സേവനങ്ങൾ വേഗത്തിൽ നൽകുന്നതിനോടൊപ്പം ഇടപാടുകളിലെ സുരക്ഷയ്ക്കും മുൻഗണന നൽകുന്നതാണ് പങ്കാളിത്തം.”- അദ്ദേഹം കൂട്ടിച്ചേർത്തു.
STORY HIGHLIGHT: esaf banking
