അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.യുഎസ്എയിലെ സാൻഫ്രാൻസിസ്കോയുടെ ആകാശത്ത് വളരെ പതുക്കെയും നിശ്ശബ്ദമായും നീങ്ങുന്ന ഒരു വലിയ വെളുത്ത എയർഷിപ്പ് പൊതുജനശ്രദ്ധ ആകർഷിച്ചു. ഈ അപൂർവ കാഴ്ചയുടെ വീഡിയോ സോഷ്യൽ മീഡിയയിൽ അതിവേഗം പ്രചരിക്കുകയും ആളുകളിൽ വലിയ കൗതുകമുണ്ടാക്കുകയും ചെയ്തു. ആകാശത്തിലൂടെ പറന്ന ഈ വസ്തു എന്താണെന്ന ചോദ്യമാണ് വീഡിയോ കണ്ടവർ കൂടുതലും പങ്കുവെച്ചത്. ഇത് ഡ്രോണോ, സിനിമയുടെ പ്രൊപ്പോ, അതോ ഏതെങ്കിലും സർക്കാർ പദ്ധതിയുടെ ഭാഗമോ എന്ന തരത്തിൽ നിരവധി ഊഹാപോഹങ്ങൾ ഉയർന്നു.
ക്രിയേറ്റർ സെസർ കോൺസെപ്ഷ്യൻ സാൽസ ഇൻസ്റ്റാഗ്രാമിൽ പോസ്റ്റ് ചെയ്ത വീഡിയോയാണ് ചർച്ചകൾക്ക് വഴിവെച്ചത്. സാൻഫ്രാൻസിസ്കോയിലെ ഒരു വലിയ കെട്ടിടത്തിന് പിന്നിൽ നിന്ന് പ്രത്യക്ഷപ്പെട്ട്, ശാന്തമായി മുന്നോട്ട് നീങ്ങുന്ന എയർഷിപ്പായിരുന്നു ദൃശ്യങ്ങളിലുണ്ടായിരുന്നത്. “ഇന്ന് സാൻഫ്രാൻസിസ്കോയുടെ ആകാശത്ത് കണ്ട ഇത് എന്താണ്?” എന്ന കുറിപ്പോടെയാണ് അദ്ദേഹം വീഡിയോ പങ്കുവെച്ചത്.
‘പാത്ത്ഫൈൻഡർ 1’: എൽടിഎയുടെ സീറോ-എമിഷൻ എയർഷിപ്പ്
വീഡിയോ അതിവേഗം വൈറലായതോടെ ഇൻസ്റ്റാഗ്രാം, എക്സ്, റെഡിറ്റ് തുടങ്ങിയ പ്ലാറ്റ്ഫോമുകളിലെല്ലാം ആയിരക്കണക്കിന് പേർ ഇത് പങ്കുവെച്ചു. പറന്ന വസ്തുവിനെക്കുറിച്ചുള്ള ആകാംഷ ശക്തമായതോടെ ഉത്തരം തേടിയുള്ള അന്വേഷണങ്ങൾ ആരംഭിച്ചു. ഒടുവിൽ, ഈ സംശയങ്ങൾക്കെല്ലാം ഉത്തരം ലഭിച്ചു. ലൈറ്റർ ദാൻ എയർ (LTA) റിസർച്ച് വിഭാഗം വികസിപ്പിച്ചെടുത്ത ‘പാത്ത്ഫൈൻഡർ 1’ എന്ന സീറോ-എമിഷൻ എയർഷിപ്പാണ് സാൻഫ്രാൻസിസ്കോയ്ക്ക് മുകളിലൂടെ പറന്നതെന്നാണ് എൻബിസി റിപ്പോർട്ട് ചെയ്തത്.
ഗൂഗിൾ സഹസ്ഥാപകനായ സെർഗി ബ്രിൻ ഉൾപ്പെടെയുള്ളവർ നേതൃത്വം നൽകുന്ന ഈ സംരംഭം, ചരക്ക് ഗതാഗതവും മാനുഷിക സഹായ ദൗത്യങ്ങളും കൂടുതൽ പരിസ്ഥിതി സൗഹൃദപരമായ രീതിയിലേക്ക് മാറ്റുക എന്ന ലക്ഷ്യത്തോടെയാണ് പ്രവർത്തിക്കുന്നത്.
എയർഷിപ്പിന്റെ പരീക്ഷണ പറക്കൽ
124 മീറ്റർ നീളമുള്ള ഈ എയർഷിപ്പ് ഹീലിയം ഉപയോഗിച്ചാണ് പറക്കുന്നത്. ഇതിൽ 12 ഇലക്ട്രിക് മോട്ടോറുകളുമുണ്ട്. ടൈറ്റാനിയം ഹബ്ബുകൾ, കാർബൺ ഫൈബർ ട്യൂബുകൾ, പോളിമർ ഷെല്ലുകൾ എന്നിവയുടെ സംയോജനമാണ് ‘പാത്ത്ഫൈൻഡർ 1’-ന്റെ പ്രത്യേക രൂപകൽപ്പനയ്ക്ക് പിന്നിൽ.
ഈ എയർഷിപ്പിന്റെ ആദ്യത്തെ പരീക്ഷണ പറക്കൽ 2025 മെയ് മാസത്തിൽ കലിഫോർണിയയിലെ മോഫെറ്റ് ഫെഡറൽ എയർഫീൽഡിൽ നടന്നിരുന്നു. സാൻഫ്രാൻസിസ്കോയിലെ ഇപ്പോഴത്തെ പറക്കൽ, ഫ്ലൈറ്റ് സ്റ്റെബിലിറ്റി, ഉയരം നിയന്ത്രിക്കാനുള്ള സംവിധാനം, നാവിഗേഷൻ എന്നിവയുടെ പരീക്ഷണങ്ങളുടെ ഭാഗമായിരുന്നു എന്നാണ് റിപ്പോർട്ടുകൾ സൂചിപ്പിക്കുന്നത്.
