വാണിയമ്പലത്ത് ബൈക്കും ടിപ്പറും കൂട്ടിയിടിച്ച് യുവാവ് മരിച്ചു

മലപ്പുറം: വാണിയമ്പലം തെച്ചങ്ങോട് ഭാഗത്ത് ബൈക്കും ടിപ്പറും കൂട്ടിയിടിച്ച് 23 വയസ്സുകാരൻ ദാരുണമായി മരിച്ചു. മരുതുങ്ങൽ എലമ്പ്ര ബേബിയുടെ മകൻ നന്ദൻ (23) ആണ് അപകടത്തിൽ മരിച്ചത്.

ഇന്ന് രാവിലെ 8 മണിയോടെയാണ് അപകടം സംഭവിച്ചത്. വണ്ടൂരിലെ എം.ടി.എസ്. മെറ്റൽസ് സ്ഥാപനത്തിൽ ജോലി ചെയ്യുന്ന നന്ദൻ രാവിലെ വീട്ടിൽ നിന്ന് പാൽ വാങ്ങാനായി പോയതിനിടെയാണ് ദുരന്തം. ടിപ്പറുമായി കൂട്ടിയിടിച്ച ബൈക്ക് റോഡരികിലേക്ക് തെറിച്ചതോടെയാണ് ഗുരുതരമായി പരിക്കേറ്റത്. സംഭവസ്ഥലത്തുവെച്ചുതന്നെ നന്ദൻ മരിച്ചു.

മൃതദേഹം മഞ്ചേരി മെഡിക്കൽ കോളജ് ആശുപത്രിയിലേയ്ക്ക് മാറ്റി. വണ്ടൂർ ബ്ലോക്ക് ഓഫീസ് സമീപം ആയിരുന്നു നന്ദന്റെ പഴയ താമസം. തുടർന്ന് കുടുംബം വാണിയമ്പലം മരുതുങ്ങലിലേയ്ക്ക് മാറിയിരുന്നു. മാതാവ്: ബിന്ദു. സഹോദരങ്ങൾ: നാഥു, നന്ദേഷ്.