അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വളർത്തുനായകളെ തെരുവിൽ ഉപേക്ഷിക്കുന്നത് തടയാനായി ലൈസൻസ് വ്യവസ്ഥകൾ കർശനമാക്കാൻ സംസ്ഥാന ജന്തു ക്ഷേമ ബോർഡ് തീരുമാനിച്ചു. പഞ്ചായത്ത്, നഗരപാലികാ നിയമങ്ങൾ ഭേദഗതി ചെയ്യാൻ തദ്ദേശ സ്വയംഭരണ വകുപ്പിനോട് ബോർഡ് ശുപാർശ ചെയ്യും. നിലവിലുള്ള നിയമങ്ങൾ കർശനമായി പാലിക്കപ്പെടാത്ത സാഹചര്യത്തിലാണ് പുതിയ മാറ്റങ്ങൾ നിർദ്ദേശിച്ചിരിക്കുന്നത്.
പുതിയ വ്യവസ്ഥകൾ അനുസരിച്ച് ഒരു വീട്ടിൽ ലൈസൻസോടെ രണ്ട് നായകളെ മാത്രമേ വളർത്താൻ അനുമതിയുള്ളൂ. ലൈസൻസ് എടുക്കുന്നതിനോടൊപ്പം നായകൾക്ക് കൃത്യ സമയത്ത് വാക്സിനേഷനും വന്ധ്യംകരണവും (sterilization) നടത്തണം. ഏറ്റവും പ്രധാനമായി, കുത്തിവെപ്പ് എടുത്ത എല്ലാ നായകൾക്കും മൈക്രോചിപ്പ് ഘടിപ്പിക്കണം. മൈക്രോചിപ്പ് ഘടിപ്പിച്ച നായകളെ മാത്രമേ ലൈസൻസോടെ വളർത്താൻ സാധിക്കൂ.
നായകളെ തെരുവിൽ ഉപേക്ഷിക്കുന്ന പ്രവണത ഒഴിവാക്കുകയാണ് ഈ നിയമഭേദഗതിയുടെ പ്രധാന ലക്ഷ്യം. നായയുടെ തോൽഭാഗത്ത് പ്രത്യേക ഉപകരണം ഉപയോഗിച്ചാണ് മൈക്രോചിപ്പ് ഘടിപ്പിക്കുന്നത്. ഈ ചിപ്പിൽ നായയുടെ പേര്, ഇനം, ഉടമസ്ഥന്റെ പേര്, വിലാസം തുടങ്ങിയ വിവരങ്ങൾ തദ്ദേശ സ്വയംഭരണ സ്ഥാപനങ്ങളുടെ ഡാറ്റാബേസുമായി ബന്ധിപ്പിക്കും. ഇങ്ങനെ മൈക്രോചിപ്പ് ഘടിപ്പിച്ചതിനാൽ നായ്ക്കളെ തെരുവിൽ ഉപേക്ഷിക്കുന്ന ഉടമകളെ വളരെ എളുപ്പത്തിൽ കണ്ടെത്താനും നിയമനടപടികൾ സ്വീകരിക്കാനും സാധിക്കും.
രണ്ടിൽ കൂടുതൽ നായകളെ വളർത്താൻ ആഗ്രഹിക്കുന്നവർ ബ്രീഡേഴ്സ് ലൈസൻസ് എടുക്കേണ്ടി വരും. പ്രജനനം നടത്തിയ ശേഷം സമയബന്ധിതമായി വിൽക്കാൻ കഴിയാത്ത നായ്ക്കുട്ടികളെ തെരുവിൽ ഉപേക്ഷിക്കുന്നത് തടയാൻ കൂടിയാണ് ഈ വ്യവസ്ഥ
ലൈസൻസ് ലഭ്യത കൂടുതൽ ലളിതമാക്കുന്നതിന്റെ ഭാഗമായി, ലൈസൻസ് ഫീസ് അടച്ച് അത് കേസ്മാഷ് (KSMash) ആപ്പ് വഴി ലഭ്യമാക്കാനുള്ള സൗകര്യവും ഒരുക്കും. ഈ നിയമപരമായ മാറ്റങ്ങൾ സംസ്ഥാനത്തെ വളർത്തു മൃഗങ്ങളുടെ ക്ഷേമം ഉറപ്പാക്കുന്നതിനും തെരുവുനായകളുടെ എണ്ണം നിയന്ത്രിക്കുന്നതിനും വലിയ സഹായകരമാകുമെന്നാണ് അധികൃതരുടെ പ്രതീക്ഷ.
