അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.രാംപൂർ ബഘേലാൻ നഗർ പരിഷത്തിലെ ഒരു ബിജെപി കൗൺസിലറുടെ ഭർത്താവ് കത്തിമുനയിൽ ഭീഷണിപ്പെടുത്തി ബലാത്സംഗം ചെയ്തുവെന്ന ഗുരുതര ആരോപണവുമായി യുവതി രംഗത്ത്. അശോക് സിംഗ് എന്നയാൾക്കെതിരെയാണ് യുവതി സത്ന ജില്ലാ പോലീസ് സൂപ്രണ്ടിന് പരാതി നൽകിയിരിക്കുന്നത്. യുവതിയെ ഭീഷണിപ്പെടുത്തുന്ന വീഡിയോ ദൃശ്യങ്ങളും പുറത്തുവിട്ടിട്ടുണ്ട്.
പരാതിക്കാരിയുടെ മൊഴി പ്രകാരം, ആറുമാസം മുൻപാണ് അശോക് സിംഗ് ആദ്യമായി പീഡിപ്പിച്ചത്. വീട്ടിൽ അതിക്രമിച്ച് കയറിയ പ്രതി, കത്തിമുനയിൽ നിർത്തി ഭീഷണിപ്പെടുത്തി ബലാത്സംഗം ചെയ്യുകയായിരുന്നു.
ഇതിന്റെ ദൃശ്യങ്ങൾ മൊബൈലിൽ പകർത്തിയ ശേഷം, സംഭവം പുറത്തുപറഞ്ഞാൽ വീഡിയോ പ്രചരിപ്പിക്കുമെന്നും തന്നെയും കുടുംബത്തെയും കൊല്ലുമെന്നും ഭീഷണിപ്പെടുത്തിയതായും യുവതി പറയുന്നു. ഈ ഭീഷണിയെത്തുടർന്ന് സംഭവം രഹസ്യമാക്കി വെച്ചു.
എന്നാൽ, ഡിസംബർ 20-ന് പ്രതി വീണ്ടും യുവതിയെ പീഡിപ്പിച്ചു. ആദ്യത്തെ സംഭവത്തിന് സമാനമായ രീതിയിൽ ഭീഷണിപ്പെടുത്തുകയും ചെയ്തു.
ഇതോടെയാണ് യുവതി പോലീസിനെ സമീപിക്കാൻ തീരുമാനിച്ചത്. അശോക് സിംഗിന് ക്രിമിനൽ പശ്ചാത്തലമുണ്ടെന്നും കേസുകളിൽ ഉൾപ്പെട്ടതിനെ തുടർന്ന് ഇയാളെ ജില്ലയിൽ നിന്ന് നാടുകടത്തിയിരുന്നതായും യുവതിയുടെ പരാതിയിൽ ആരോപിക്കുന്നു.
പരാതിക്കാരിയുടെ കടയിൽ പതിവായി വരാറുള്ള അശോക് സിംഗ് പരസ്യമായി ഭീഷണിപ്പെടുത്തുന്നത് പതിവായിരുന്നു. ഇത്തരത്തിൽ ഭീഷണി മുഴക്കുന്നതിന്റെ ദൃശ്യങ്ങളാണ് യുവതി ഇപ്പോൾ പുറത്തുവിട്ടിട്ടുള്ളത്.
“എവിടെ വേണമെങ്കിലും പരാതി കൊടുത്തോളൂ, തനിക്കൊന്നും സംഭവിക്കില്ല,” എന്ന് അശോക് സിംഗ് വീഡിയോയിൽ പറയുന്നത് കേൾക്കാം. ഈ സമയം പരാതിക്കാരി കരയുന്നതും ദൃശ്യങ്ങളിൽ കാണാം.
സംഭവത്തിൽ സത്ന ജില്ലാ പോലീസ് സൂപ്രണ്ടിനാണ് യുവതി പരാതി നൽകിയിട്ടുള്ളത്. പോലീസ് സൂപ്രണ്ട് പരാതി ഡിഎസ്പിക്ക് കൈമാറിയതായും അന്വേഷണം ആരംഭിച്ചതായും റിപ്പോർട്ടുകളുണ്ട്.
എന്നാൽ, അഞ്ച് ദിവസമായിട്ടും പ്രതിയെ അറസ്റ്റ് ചെയ്യാനോ മറ്റ് നടപടികൾ സ്വീകരിക്കാനോ പോലീസ് തയ്യാറായിട്ടില്ലെന്ന് യുവതി ആരോപിച്ചു. തനിക്കോ കുടുംബത്തിനോ എന്തെങ്കിലും സംഭവിച്ചാൽ അതിന് ഉത്തരവാദി പോലീസ് ആയിരിക്കുമെന്നും പരാതിക്കാരി മുന്നറിയിപ്പ് നൽകി. പ്രതിയെ ഉടൻ അറസ്റ്റ് ചെയ്യണമെന്ന ആവശ്യമാണ് യുവതി ഉന്നയിക്കുന്നത്.
