അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കേരളത്തിലെ യുവജനങ്ങൾക്ക് സാമ്പത്തിക പിന്തുണയേകാൻ സംസ്ഥാന സർക്കാർ ആവിഷ്കരിച്ച ‘സിഎം കണക്ട് ടു വർക്ക്’ പദ്ധതിയുടെ സംസ്ഥാനതല ഉദ്ഘാടനം ഇന്ന് നടക്കും. വൈകിട്ട് നാലിന് തിരുവനന്തപുരം നിശാഗന്ധി ഓഡിറ്റോറിയത്തിൽ മുഖ്യമന്ത്രി പിണറായി വിജയൻ പദ്ധതിയുടെ ഉദ്ഘാടനം നിർവ്വഹിക്കുമെന്ന് തൊഴിൽ വകുപ്പ് മന്ത്രി വി. ശിവൻകുട്ടി അറിയിച്ചു.
മത്സരപ്പരീക്ഷകൾക്കും നൈപുണ്യ പരിശീലനങ്ങൾക്കും തയ്യാറെടുക്കുന്ന ഉദ്യോഗാർത്ഥികൾക്ക് അവരുടെ ലക്ഷ്യത്തിലേക്കുള്ള യാത്രയിൽ ആശ്വാസമേകാനാണ് ഈ നൂതന പദ്ധതി ലക്ഷ്യമിടുന്നത്.
പ്ലസ് ടു മുതൽ ബിരുദം വരെയുള്ള യോഗ്യതയുള്ള, 18-നും 30-നും ഇടയിൽ പ്രായമുള്ളവർക്കാണ് പദ്ധതിയുടെ ആനുകൂല്യം ലഭിക്കുക. കുടുംബ വാർഷിക വരുമാനം അഞ്ച് ലക്ഷം രൂപയിൽ താഴെയുള്ളവർക്ക് അർഹതയുള്ള ഈ പദ്ധതിയിലൂടെ തിരഞ്ഞെടുക്കപ്പെടുന്നവർക്ക് പ്രതിമാസം 1000 രൂപ വീതം ഒരു വർഷത്തേക്ക് ധനസഹായം ലഭിക്കും.
നാഷണൽ എംപ്ലോയ്മെന്റ് സർവീസ് വകുപ്പിന്റെ ഔദ്യോഗിക പോർട്ടൽ വഴി ഓൺലൈനായാണ് അപേക്ഷകൾ സമർപ്പിക്കേണ്ടത്. സംസ്ഥാനത്തുടനീളം ഇതിനോടകം മുപ്പത്തിയാറായിരത്തി അഞ്ഞൂറോളം പേർ പദ്ധതിക്കായി അപേക്ഷ സമർപ്പിച്ചു കഴിഞ്ഞു.
ആദ്യഘട്ടത്തിൽ തിരഞ്ഞെടുക്കപ്പെട്ട പതിനായിരം ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് തുക നേരിട്ട് കൈമാറും. യുവജനങ്ങളുടെ ആത്മവിശ്വാസം വർധിപ്പിക്കുന്നതിനൊപ്പം മികച്ച തൊഴിൽ മേഖലകൾ കണ്ടെത്താൻ അവരെ പ്രാപ്തരാക്കുക എന്നതും പദ്ധതിയുടെ പ്രധാന ഉദ്ദേശ്യമാണ്.
വിവിധ വകുപ്പ് മന്ത്രിമാരും ജനപ്രതിനിധികളും പങ്കെടുക്കുന്ന ഉദ്ഘാടന ചടങ്ങോടെ കേരളത്തിലെ തൊഴിലന്വേഷകർക്കായി സർക്കാർ വിഭാവനം ചെയ്ത ഈ വലിയ സുരക്ഷാ പദ്ധതിക്ക് ഔദ്യോഗികമായി തുടക്കമാകും.
