അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മലപ്പുറത്തെ ജനസംഖ്യാ വർദ്ധനവും ഭരണപരമായ പ്രതിസന്ധികളും പരിഗണിച്ച് ശാസ്ത്രീയമായ പഠനങ്ങളിലൂടെ കേരളത്തിലെ ജില്ലകൾ പുനർനിർണ്ണയിക്കണമെന്ന് സമസ്ത കേരള ജംഇയ്യത്തുൽ ഉലമ. സമസ്തയുടെ നൂറാം വാർഷിക സമ്മേളനത്തിലാണ് ഈ സുപ്രധാന പ്രമേയം അവതരിപ്പിച്ചത്. സമസ്ത സെക്രട്ടറിയും വഖഫ് ബോർഡ് അംഗവുമായ കെ. ഉമർ ഫൈസി മുക്കമാണ് ഈ ആവശ്യം ഉന്നയിച്ച് ഭരണകൂടത്തിന്റെ ശ്രദ്ധ ക്ഷണിച്ചത്.
45 ലക്ഷത്തിലധികം ജനസംഖ്യയുള്ള മലപ്പുറം പോലുള്ള വലിയ ജില്ലകളിൽ ഭരണയന്ത്രം കാര്യക്ഷമമായി ചലിപ്പിക്കാൻ നിലവിലെ സംവിധാനങ്ങൾ അപര്യാപ്തമാണെന്ന് പ്രമേയം ചൂണ്ടിക്കാട്ടുന്നു. വിഭവങ്ങൾ തുല്യമായി വിതരണം ചെയ്യുന്നതിനും വികസന പ്രവർത്തനങ്ങൾ സാധാരണക്കാരിലേക്ക് വേഗത്തിൽ എത്തിക്കുന്നതിനും പുതിയ ജില്ലകളുടെ രൂപീകരണം അനിവാര്യമാണ്. ഭരണപരമായ വികേന്ദ്രീകരണം നടപ്പിലാക്കിയാൽ മാത്രമേ ജനങ്ങളുടെ ആവശ്യങ്ങൾ കൃത്യസമയത്ത് നിറവേറ്റാൻ സാധിക്കൂ എന്നും സമസ്ത വിലയിരുത്തുന്നു.
മലപ്പുറത്തിന് പുറമെ ഭൂപ്രകൃതിയുടെ പ്രത്യേകതകളും യാത്രാക്ലേശവും കണക്കിലെടുത്ത് ഇടുക്കി, എറണാകുളം, പാലക്കാട് തുടങ്ങിയ ജില്ലകളിലും വിഭജനം ആവശ്യമാണെന്ന് പ്രമേയം പറയുന്നു. മലയോര മേഖലകളിലെയും വിസ്തൃതിയേറിയ ജില്ലകളിലെയും ജനങ്ങൾ സിവിൽ സ്റ്റേഷനുകളിലും മറ്റും എത്തുന്നതിന് അനുഭവിക്കുന്ന ബുദ്ധിമുട്ടുകൾ പരിഹരിക്കപ്പെടണം. ശാസ്ത്രീയമായ പഠനങ്ങളുടെ അടിസ്ഥാനത്തിൽ ഇവിടങ്ങളിൽ പുതിയ ഭരണനിർവ്വഹണ കേന്ദ്രങ്ങൾ ഉണ്ടാകണമെന്നാണ് ആവശ്യം.
39 ലോക്സഭാ മണ്ഡലങ്ങളുള്ള തമിഴ്നാട്ടിൽ ഭരണസൗകര്യത്തിനായി 38 ജില്ലകൾ രൂപീകരിച്ചിട്ടുണ്ട്. ഇതേ മാതൃക കേരളത്തിലും പിന്തുടരാവുന്നതാണ്. രാഷ്ട്രീയ താൽപ്പര്യങ്ങൾക്കും കക്ഷിരാഷ്ട്രീയത്തിനും അതീതമായി നാടിന്റെ വികസനം മുൻനിർത്തി ഭരണ-പ്രതിപക്ഷ കക്ഷികൾ ഈ വിഷയത്തിൽ ഒരുമിച്ച് നിൽക്കണമെന്നും പ്രമേയം ആഹ്വാനം ചെയ്യുന്നു.
