അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സെൽഫി എടുക്കാൻ ശ്രമിച്ച തന്നെ മുഖ്യമന്ത്രി പിണറായി വിജയൻ അവഗണിച്ചു എന്ന രീതിയിൽ സമൂഹമാധ്യമങ്ങളിൽ പ്രചരിക്കുന്ന വാർത്തകൾ പൂർണ്ണമായും തെറ്റാണെന്ന് തിരുവനന്തപുരം ജില്ലാ പഞ്ചായത്ത് അംഗം ആതിര ഗ്രേസ് വ്യക്തമാക്കി. വെള്ളറട ഡിവിഷനിൽ നിന്നുള്ള എൽഡിഎഫ് പ്രതിനിധിയായ ആതിര, വസ്തുതകൾ വളച്ചൊടിച്ചാണ് പ്രചരിപ്പിക്കുന്നത് എന്ന് മാധ്യമങ്ങളോട് പ്രതികരിച്ചു. രാഷ്ട്രീയ പ്രേരിതമായ പ്രചരണങ്ങൾക്കെതിരെ വ്യക്തമായ വിശദീകരണവുമായാണ് ജനപ്രതിനിധി ഇപ്പോൾ രംഗത്തെത്തിയിരിക്കുന്നത്.
കുംഭിച്ചാൽ കടവ് പാലത്തിന്റെ ഉദ്ഘാടന ചടങ്ങിന് ശേഷം മുഖ്യമന്ത്രി വേദിയിൽ നിന്ന് മടങ്ങുന്ന സമയത്താണ് വിവാദത്തിന് ആസ്പദമായ സംഭവം നടന്നത്. മുഖ്യമന്ത്രിയുടെ അടുത്തേക്ക് താൻ ചെന്നത് സെൽഫി എടുക്കാനല്ലെന്നും, മറിച്ച് ഒരു പ്രധാനപ്പെട്ട നിവേദനം അദ്ദേഹത്തിന്റെ ശ്രദ്ധയിൽപ്പെടുത്താൻ വേണ്ടിയാണെന്നും ആതിര പറഞ്ഞു. തന്റെ മൊബൈലിൽ സേവ് ചെയ്തിരുന്ന നിവേദനം കാണിച്ചു സംസാരിക്കാനായിരുന്നു താൻ ശ്രമിച്ചതെന്ന് അവർ വ്യക്തമാക്കി.
ഉദ്ഘാടന ചടങ്ങ് കഴിഞ്ഞ സമയമായതിനാൽ വേദിയിൽ വലിയ ജനത്തിരക്കാണ് അനുഭവപ്പെട്ടിരുന്നത്. ആ തിരക്കിനിടയിൽ സംസാരിക്കാനുള്ള പ്രായോഗിക ബുദ്ധിമുട്ട് കാരണമാണ് മുഖ്യമന്ത്രി വേഗത്തിൽ നടന്നുപോയത്. മുൻപും പലതവണ മുഖ്യമന്ത്രിയെ നേരിൽ കണ്ട് കാര്യങ്ങൾ അവതരിപ്പിച്ചിട്ടുണ്ടെന്നും, ഈ വിഷയത്തിൽ മറ്റ് വ്യാഖ്യാനങ്ങൾക്ക് പ്രസക്തിയില്ലെന്നും ആതിര കൂട്ടിച്ചേർത്തു. നിവേദനവുമായി ബന്ധപ്പെട്ട കാര്യങ്ങൾ സംസാരിക്കാൻ വരും ദിവസങ്ങളിൽ അദ്ദേഹത്തെ കാണുമെന്നും അവർ അറിയിച്ചു.
അതേസമയം, വീഡിയോ തെറ്റായ രീതിയിൽ പ്രചരിക്കുന്നത് ശ്രദ്ധയിൽപ്പെട്ട മുഖ്യമന്ത്രി പിണറായി വിജയൻ ആതിരയെ ഫോണിൽ വിളിച്ച് സംസാരിച്ചതായാണ് വിവരം.
