അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സമയ്പുർ ബാദ്ലിയിലെ ചന്ദൻ പാർക്കിൽ രണ്ട് മാസം ഗർഭിണിയായ യുവതിയെയും മൂന്ന് പിഞ്ചു പെൺമക്കളെയും കഴുത്തറുത്ത് കൊല്ലപ്പെട്ട നിലയിൽ കണ്ടെത്തി. ആസാദ്പുർ മാണ്ഡിയിലെ പച്ചക്കറി കച്ചവടക്കാരനായ മെഞ്ചുൻ കെവാദാണ് തന്റെ ഭാര്യയെയും മൂന്ന് മുതൽ അഞ്ച് വയസ്സ് വരെ പ്രായമുള്ള മക്കളെയും കൊലപ്പെടുത്തിയതെന്ന് പോലീസ് സ്ഥിരീകരിച്ചു. ചൊവ്വാഴ്ച രാത്രി നടന്ന സംഭവത്തിന് ശേഷം ഒളിവിൽ പോയ പ്രതിക്കായി തിരച്ചിൽ ഊർജ്ജിതമാക്കിയിരിക്കുകയാണ്.
ബുധനാഴ്ച രാവിലെയാണ് ചോരയിൽ കുളിച്ച നിലയിലുള്ള മൃതദേഹങ്ങൾ അയൽക്കാർ കാണുന്നത്. കെവാദിന്റെ പത്ത് വയസ്സുകാരനായ അനന്തരവൻ വീട്ടിലെത്തിയപ്പോഴാണ് ദാരുണമായ കാഴ്ച പുറംലോകമറിഞ്ഞത്. കുട്ടികളെ കഴുത്തറുത്ത നിലയിലും യുവതിയെ മുഖം കമിഴ്ന്നു കിടക്കുന്ന നിലയിലുമാണ് കണ്ടെത്തിയത്.
കൊലപാതകത്തിന് മുൻപ് ഇവർക്ക് ഭക്ഷണത്തിലോ വെള്ളത്തിലോ ഉറക്കഗുളിക കലർത്തി നൽകിയിട്ടുണ്ടാകാമെന്നാണ് പോലീസിന്റെ പ്രാഥമിക നിഗമനം. മൃതദേഹങ്ങൾ കിടന്നിരുന്ന മുറിയിൽ പിടിവലി നടന്നതിന്റെ ലക്ഷണങ്ങളില്ലാത്തത് ഇവർ ഉറങ്ങിക്കിടക്കുമ്പോഴാണ് ആക്രമിക്കപ്പെട്ടത് എന്ന സംശയത്തിന് ബലം നൽകുന്നു.
ആൺകുട്ടികൾ ഇല്ലാത്തതിനെ ചൊല്ലി ദമ്പതികൾക്കിടയിൽ നിരന്തരം തർക്കങ്ങൾ നിലനിന്നിരുന്നതായി ഔട്ടർ നോർത്ത് ഡിസിപി ഹരേശ്വർ സ്വാമി അറിയിച്ചു. ചൊവ്വാഴ്ച രാത്രി ഒൻപത് മണിയോടെ കെവാദും ഭാര്യ അനിതയും തമ്മിൽ ഇതേ ചൊല്ലി വലിയ വഴക്കുണ്ടായതായി അയൽക്കാർ മൊഴി നൽകിയിട്ടുണ്ട്. മൂന്ന് പെൺകുട്ടികൾക്ക് ശേഷം നാലാമതും ഗർഭിണിയായ ഭാര്യയോടുള്ള വിരോധമാണ് ഈ അരുംകൊലയിലേക്ക് നയിച്ചതെന്നാണ് പോലീസിന്റെ പ്രാഥമിക നിഗമനം.
കൊലപാതകത്തിന് ശേഷം പ്രതി നടന്നുപോകുന്നതിന്റെ സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. സംഭവത്തിന് പിന്നാലെ പ്രതിയുടെ മൊബൈൽ ഫോൺ സ്വിച്ച് ഓഫ് ചെയ്ത നിലയിലാണ്. വീട്ടിൽ നിന്നും ലഭിച്ച ഭക്ഷണ അവശിഷ്ടങ്ങൾ ഫോറൻസിക് പരിശോധനയ്ക്കായി അയച്ചിട്ടുണ്ട്.
