അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തമിഴ്നാട് നിയമസഭാ തിരഞ്ഞെടുപ്പിന് മുന്നോടിയായി തിരഞ്ഞെടുപ്പ് കമ്മീഷൻ പരിശോധന ശക്തമാക്കുന്നതിനിടെ നടൻ അർജുൻ ദാസിന്റെ വാഹനത്തിൽനിന്ന് കോടികൾ പിടികൂടുന്ന വീഡിയോ സാമൂഹ്യമാധ്യമങ്ങളിൽ വൈറലാകുന്നു. ചെന്നൈയിൽ ഫ്ലൈയിങ് സ്ക്വാഡ് നടത്തിയ പരിശോധനയിൽ നടൻ കുടുങ്ങിയെന്നും പൊലീസുകാരുമായി തർക്കമുണ്ടായെന്നുമാണ് വീഡിയോ സൂചിപ്പിക്കുന്നത്.
പരിശോധനയ്ക്കിടെ ഉദ്യോഗസ്ഥർ കാറിന്റെ ഡിക്കി തുറന്നപ്പോൾ ബാഗുകളിൽ നിറയെ പണക്കെട്ടുകൾ കണ്ട് അമ്പരക്കുന്നതും തുടർന്ന് കാറിലുണ്ടായിരുന്ന സംഗീത സംവിധായകൻ ഷോൻ റോൾഡൻ സാഹചര്യം വിശദീകരിക്കാൻ ശ്രമിക്കുന്നതും വിഡിയോയിലുണ്ട്.
എന്നാൽ, ‘ഇത് തിരഞ്ഞെടുപ്പ് സമയമാണ്, നിങ്ങൾ ആരായാലും കുഴപ്പമില്ല, മുഖ്യമന്ത്രി വന്നാലും പരിശോധന കഴിഞ്ഞേ വിടൂ’ എന്ന് പൊലീസ് കർശനമായി പറയുന്ന ദൃശ്യങ്ങൾ നിമിഷങ്ങൾക്കകം ഇന്റർനെറ്റിൽ തരംഗമായി.
വിഡിയോയുടെ അവസാനം സത്യാവസ്ഥ വെളിപ്പെടുത്തി അർജുൻ ദാസ് തന്നെ രംഗത്തെത്തുന്നുണ്ട്. താൻ പോലീസ് പിടിയിലായിട്ടില്ലെന്നും ഇതൊരു ബോധവൽക്കരണ വിഡിയോ മാത്രമാണെന്നും താരം പറയുന്നു. തന്റെ പുതിയ ചിത്രമായ ‘കോൺ സിറ്റി’യുടെ യുടെ പ്രമോ ഷൂട്ടിന്റെ ഭാഗമായാണ് ഈ ദൃശ്യങ്ങൾ ചിത്രീകരിച്ചത് എന്ന് അർജുൻ ദാസ് പറഞ്ഞു.
‘ഇത് യഥാർഥ പണമല്ല, സിനിമയ്ക്ക് വേണ്ടി ഉപയോഗിച്ച ഡമ്മി നോട്ടുകളാണ്. തിരഞ്ഞെടുപ്പ് സമയത്ത് ഉദ്യോഗസ്ഥർ വാഹനങ്ങൾ പരിശോധിക്കുമ്പോൾ അവരോട് പൂർണമായി സഹകരിക്കണം. 50,000 രൂപയിൽ കൂടുതൽ പണം കയ്യിൽ കരുതരുത്. ഇത് നിയമപ്രശ്നങ്ങൾക്കും സമയനഷ്ടത്തിനും ഇടയാക്കും. ഏപ്രിൽ 23-ന് എല്ലാവരും സമ്മതിദാനാവകാശം വിനിയോഗിക്കണം. ഇതൊരു പ്രമോ വിഡിയോ ഷൂട്ട് ആണ്. എന്റെ സംവിധായകൻ ഹരീഷ് ഇതൊരു ബോധവത്കരണ വിഡിയോ ആയി ഷൂട്ട് ചെയ്യാം എന്ന് പറഞ്ഞു അങ്ങനെയാണ് ഈ വീഡിയോ എടുത്തത്. നാളെ നമ്മുടെ നമ്മുടെ പടം ‘കോൺ സിറ്റി’ യുടെ ആദ്യത്തെ സിംഗിൾ കൊറിയൻ ഫാമിലി റിലീസ് ആവുകയാണ്. എല്ലാവരും പാട്ട് ആസ്വദിക്കുക.’’ അർജുൻ ദാസ് വീഡിയോയിൽ പറഞ്ഞു.
ഹരീഷ് ദുരൈരാജ് സംവിധാനം ചെയ്യുന്ന ‘കോൺ സിറ്റി’ എന്ന ചിത്രത്തിൽ അർജുൻ ദാസിനൊപ്പം മലയാളി താരം അന്നാ ബെൻ ആണ് നായികയായി അഭിനയിക്കുന്നത്. വടിവുക്കരശി, യോഗി ബാബു എന്നിവരും പ്രധാന വേഷങ്ങളിലുണ്ട്. സിനിമയുടെ ആദ്യ ഗാനമായ ‘കൊറിയൻ ഫാമിലി’ ഉടൻ പുറത്തിറങ്ങും. ഷോൻ റോൾഡൻ സംഗീതം നൽകുന്ന ചിത്രം ചെന്നൈ, മംഗളൂരു, മുംബൈ എന്നിവിടങ്ങളിലായാണ് ചിത്രീകരിച്ചത്. വരും ദിവസങ്ങളിൽ ചിത്രത്തിന്റെ കൂടുതൽ അപ്ഡേറ്റുകൾ പുറത്തുവിടുമെന്ന് അണിയറപ്രവർത്തകർ അറിയിച്ചു.
