അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കേരളത്തിൽ ഭരണവിരുദ്ധ വികാരമില്ലെന്നും എൽഡിഎഫിന് മികച്ച വിജയസാധ്യതയാണുള്ളതെന്നും സിപിഐഎം സംസ്ഥാന സെക്രട്ടറി എം.വി. ഗോവിന്ദൻ. പുറത്തുവന്ന സർവേ ഫലങ്ങൾ പരിശോധിച്ചാൽ എൽഡിഎഫിന് വീണ്ടും അധികാരത്തിൽ എത്താൻ കഴിയുമെന്ന വസ്തുതയാണ് തെളിയുന്നതെന്ന് അദ്ദേഹം വാർത്താ സമ്മേളനത്തിൽ പറഞ്ഞു. അഞ്ചോ എട്ടോ സീറ്റുകളുടെ വ്യത്യാസത്തിൽ ഇടതുമുന്നണി അധികാരം നിലനിർത്തുമെന്ന ആത്മവിശ്വാസവും അദ്ദേഹം പങ്കുവെച്ചു.
ചില മാധ്യമങ്ങൾ പുറത്തുവിട്ട സർവേകളിൽ നിക്ഷിപ്ത താൽപ്പര്യങ്ങൾ കടന്നുകൂടിയിട്ടുണ്ടെന്ന് എം.വി. ഗോവിന്ദൻ വിമർശിച്ചു. യുഡിഎഫിനെ എങ്ങനെയെങ്കിലും വിജയിപ്പിക്കണമെന്ന വാശിയോടെയാണ് ചില പത്രങ്ങൾ സർവേ ഫലങ്ങൾ പ്രസിദ്ധീകരിച്ചിരിക്കുന്നത്. സർവേകളിലെ ആത്മനിഷ്ഠ ഘടകങ്ങൾ വസ്തുതകളെ വളച്ചൊടിക്കുന്നതാണ്. 100 സീറ്റുകൾ ലഭിക്കുമെന്ന യുഡിഎഫിന്റെ അവകാശവാദം പൊള്ളയാണെന്ന് ഈ സർവേകൾ തന്നെ വ്യക്തമാക്കുന്നുണ്ടെന്നും അദ്ദേഹം കൂട്ടിച്ചേർത്തു.
കേരളത്തിൽ ബിജെപിക്ക് 14 സീറ്റുകൾ വരെ ലഭിക്കുമെന്ന സർവേ കണ്ടെത്തലുകളെ അദ്ദേഹം പരിഹസിച്ചു. ഇത് എന്ത് തരത്തിലുള്ള സർവേയാണെന്ന് മനസ്സിലാകുന്നില്ലെന്നും, കേരളത്തിൽ ഒരു സീറ്റിൽ പോലും ബിജെപി വിജയിക്കാൻ പോകുന്നില്ലെന്നും അദ്ദേഹം ഉറപ്പിച്ചു പറഞ്ഞു. ബിജെപിയുടെ വളർച്ചയെക്കുറിച്ചുള്ള പ്രചാരണങ്ങൾ വെറും അതിശയോക്തി മാത്രമാണെന്നാണ് സിപിഐഎമ്മിന്റെ നിലപാട്.
