അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മാറാ രോഗങ്ങള് രൂക്ഷമാവുകയാണ്. മഴക്കാലമായതോടെ രോഗാണുക്കളും സജീവമായിത്തുടങ്ങി. നിപ്പയും, കൊറോണയുമൊക്കെ വീണ്ടും പടരുന്നു. ഇവയ്ക്കൊപ്പമാണ് ഷിഗെല്ല രോഗവും പടരുന്നത്. മലപ്പുറം പൂക്കോട്ടൂര് സ്വദേശിയായ ആര്ജവ് എന്ന ഏഴ് വയസുകാരനാണ് കോഴിക്കോട് മെഡിക്കല് കോളജില് ചികിത്സയിലിരിക്കെ മരിച്ചത്. കഴിഞ്ഞ ആഴ്ച മലപ്പുറം പെരിന്തല്മണ്ണയില് ചികിത്സയിലിരിക്കെ മരിച്ച വീട്ടമ്മയ്ക്ക് ഷിഗെല്ല സ്ഥിരീകരിച്ചിരുന്നു. ഇതിന് പിന്നാലെയാണ് വീണ്ടും മലപ്പുറത്ത് ഷിഗെല്ല മരണം റിപ്പോര്ട്ട് ചെയ്യപ്പെട്ടിരിക്കുന്നത്. അടുത്തിടെ റിപ്പോര്ട്ട് ചെയ്യപ്പെടുന്ന മൂന്നാമത്തെ മരണവും ഈ വര്ഷത്തെ നാലമത്തെ മരണവുമാണ് ഇത്. നേരത്തെ കോഴിക്കോട് നാലു വയസുകാരിയുടെ മരണവും ഷിഗെല്ല ബാധിച്ചാണെന്ന് സ്ഥിരീകരിക്കപ്പെട്ടിരുന്നു.
നിലവില് സംസ്ഥാനത്തിന്റെ വിവിധ ഭാഗങ്ങളിലായി 61 പേര്ക്ക് രോഗം സ്ഥിരീകരിച്ചിട്ടുണ്ട്. ഇന്നലെ കോഴിക്കോട് കുന്ദമംഗലം സ്വദേശിയായ ഒരു വയസുകാരനും പയ്യോളി സ്വദേശിയായ ഒന്പതു വയസുകാരനും രോഗം സ്ഥിരീകരിച്ചു. മലപ്പുറം എയുപി സ്കൂളിലെ രണ്ടാം ക്ലാസ് വിദ്യാര്ഥിയാണ് മരിച്ച ആര്ജവ്. സംസ്ഥാനത്ത് ഷിഗെല്ല ബാധിച്ച് ചികിത്സയിലിരിക്കുന്നവരില് നിരവധി വിദ്യാര്ഥികള് ഉണ്ട് എന്നത് ഏറെ ഗൗരവകരമാണ്. കഴിഞ്ഞ ആഴ്ച കോഴിക്കോട് പയ്യോളി നഗരസഭയിലെ തച്ചന്കുന്നില് മൂന്ന് വയസ്സുകാരന് ഷിഗെല്ല രോഗം സ്ഥിരീകരിച്ചിരുന്നു. കൂടാതെ വയനാട്ടില് 16 പേര്ക്ക് ഷിഗെല്ല രോഗബാധ റിപ്പോര്ട്ട് ചെയ്യപ്പെട്ടിട്ടുണ്ട്. ഇതിലും നിരവധി വിദ്യാര്ഥികള് ഉള്പ്പെടുന്നു.
കഴിഞ്ഞ ദിവസം കോഴിക്കോട് ഷിഗെല്ല സ്ഥിരീകരിച്ചവരിലും രണ്ട് വിദ്യാര്ഥികള് ഉള്പ്പെടുന്നു. ഈ വര്ഷം ഇതുവരെ 135 ഷിഗെല്ല കേസുകളാണ് സ്ഥിരീകരിച്ചത്. ഇതില് ഏറ്റവും കൂടുതല് കേസുകള് 68 എണ്ണം റിപ്പോര്ട്ട് ചെയ്തിട്ടുള്ളത് കോഴിക്കോടാണ്. ആര്ജവ് മരിക്കുന്നതിന് മുമ്പ്, ഷിഗെല്ല ബാധിച്ച് ഏറ്റവും ഒടുവില് റിപ്പോര്ട്ട് ചെയ്യപ്പെട്ട മരണം കീഴാറ്റൂര് സ്വദേശിനി സരോജിനി (59) യുടേത് ആയിരുന്നു.
വയറിളക്കം ബാധിച്ചതിനെത്തുടര്ന്ന് കോഴിക്കോട് മെഡിക്കല് കോളേജില് ചികിത്സയിലിരിക്കെ കഴിഞ്ഞ ചൊവ്വാഴ്ചയാണ് സരോജിനി മരിച്ചത്. തുടര്ന്ന് മരണ ശേഷം നടത്തിയ പരിശോധനയില് ഷിഗെല്ല സ്ഥിരീകരിക്കുകയായിരുന്നു. അതിനും മുമ്പ് കോഴിക്കോട് നാലു വയസുകാരിയുടെ മരണവും ഷിഗെല്ല ബാധിച്ചാണെന്ന് സ്ഥിരീകരിക്കപ്പെട്ടിരുന്നു. തലക്കുളത്തൂര് സ്വദേശി ബബീഷിന്റെ മകള് നിളയാണ് രണ്ടാഴ്ച മുമ്പ് കോഴിക്കോട് മെഡിക്കല് കോളേജില് ചികിത്സയിലിരിക്കെ മരിച്ചത്.
ഈ വര്ഷം മാര്ച്ചില് മരിച്ച മൂന്ന് വയസുകാരിയുടെ മരണം ആണ് സംസ്ഥാനത്തെ ആദ്യത്തെ ഷിഗെല്ല മരണമായി കണക്കാക്കുന്നത്, ഇതും കോഴിക്കോട് തന്നെ ആയിരുന്നു. വയനാട് 16, തിരുവനന്തപുരം 14, മലപ്പുറം 13, കൊല്ലം ആലപ്പുഴ ആറു വീതം, തൃശ്ശൂര് നാല്, ഇടുക്കി മൂന്ന്, എറണാകുളം, കണ്ണൂര് രണ്ടു വീതം, കോട്ടയം ഒന്ന് എന്നിങ്ങനെയാണ് ജില്ലകളില് ഷിഗെല്ല കേസുകള് റിപ്പോര്ട്ട് ചെയ്യപ്പെട്ടിരിക്കുന്നത്.
രോഗം വ്യാപിക്കുന്ന പശ്ചാത്തലത്തില് ആരോഗ്യവകുപ്പും തദ്ദേശസ്ഥാപനങ്ങളും പ്രതിരോധ പ്രവര്ത്തനങ്ങള് ഊര്ജിതമാക്കിയിട്ടുണ്ട്. ഷിഗല്ല ബാക്ടീരിയമൂലം ഷിഗല്ലോസിസ് എന്ന അണുബാധ കുടലിനുണ്ടാകുന്നു. വയറിളക്കമാണ് ഷിഗെല്ല ബാധയുടെ പ്രധാന ലക്ഷണം. വയറിളക്കം മാത്രമല്ല, പനി, ഛര്ദി, മനംപിരട്ടല്, രക്തം കലര്ന്ന മലം, വേദനയോടെ ഇടവിട്ട് ശുചിമുറിയില് പോകണമെന്ന തോന്നല് തുടങ്ങിയവയും ഈ രോഗത്തിന്റെ ലക്ഷണങ്ങളാണ്.
രോഗപ്രതിരോധശേഷി കുറഞ്ഞവരിലും അഞ്ച് വയസ്സിന് താഴെയുള്ള കുട്ടികളിലും ഷിഗെല്ല ബാധ ഗുരുതരമാകുന്നത് മരണകാരണമാകാം. മലിനജലത്തിലൂടെയും വൃത്തിയില്ലാത്തതും കേടായതുമായ ഭക്ഷണത്തിലൂടെയും രോഗം പകരാം. അതിനാല് പൊതുജനങ്ങള് ജാഗ്രത പാലിക്കണമെന്നും ശുചിത്വ കാര്യങ്ങളില് കൂടുതല് ശ്രദ്ധ പുലര്ത്തണമെന്നും അധികൃതര് നിര്ദേശിച്ചിട്ടുണ്ട്. മുന്കരുതലിന്റെ ഭാഗമായി വിദ്യാലയങ്ങളിലെയും മറ്റും കിണറുകള് പരിശോധിക്കാനും ഭക്ഷ്യ സുരക്ഷാ വകുപ്പിനോട് ഹോട്ടലുകളിലെ പരിശോധന കര്ശനമാക്കാനും നിര്ദേശിച്ചിട്ടുണ്ട്.
