അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സംസ്ഥാനത്തെ സര്ക്കാര് ജീവനക്കാരുടെ പ്രതീക്ഷകള്ക്ക് മങ്ങലേറ്റെങ്കിലും ബജറ്റില് വിസ്മയമുണ്ടാകുമെന്ന് പറഞ്ഞ മുഖ്യമന്ത്രി വി.ഡി സതീശന് വിസ്മരിച്ചില്ല എന്നതാണ് മനസ്സിലാക്കേണ്ടത്. ശമ്പളപരിഷ്കരണം, ഡി.എ കുടിശ്ശിക തുടങ്ങിയവയില് പ്രതീക്ഷിച്ച പ്രഖ്യാപനങ്ങള് ഉണ്ടായില്ല എന്നതും വസ്തുതയാണ്. എന്നാല്, കഴിഞ്ഞ സര്ക്കാര് കൊടുക്കാതിരുന്ന സര്ക്കാര് ജീവനക്കാരുടെ ഡി.എ, പെന്ഷന്കാരുടെ ഡി.ആര് എന്നിവ മുടങ്ങമില്ലാതെ നല്കുമെന്ന് ബജറ്റില് പ്രഖ്യാപിച്ചത് ജീവനക്കാരെ സംബന്ധിച്ച് ചെറിയ ആസ്വാസമാണ്. ലീവ് സറണ്ടറില് ഉചിതമായ തീരുമാനം എടുക്കുമെന്നും ബജറ്റില് പ്രഖ്യാപിച്ചു. കഴിഞ്ഞ സര്ക്കാര് ലീവ് സറണ്ടര് ഒഴിവാക്കിയിരുന്നു.
കൂടാതെ, അഷ്വേഡ് പെന്ഷന് പദ്ധതി നടപ്പിലാക്കില്ലെന്നും വ്യക്തമാക്കിയിട്ടുണ്ട്. ജീവനക്കാരുടെ മെഡിക്കല് ഇന്ഷുറന്സ് പദ്ധതിയായ മെഡിസെപ്പ് പരിഷ്കരിക്കാനും തീരുമാനിച്ചിട്ടുണ്ട്. സംസ്ഥാന സര്ക്കാര് ജീവനക്കാരുടെ ക്ഷാമബത്ത (ഡി.എ), ക്ഷാമാശ്വാസം (ഡി.ആര്) എന്നിവ മുടക്കമില്ലാതെ നല്കുമെന്ന് വി.ഡി സതീശന് സര്ക്കാരിന്റെ ആദ്യ ബജറ്റില് പ്രഖ്യാപിച്ചു. എന്നാല്, ഡി.എ കുടിശ്ശികയുടെ മുന് കാല പ്രാബല്യം ബജറ്റില് പരാമര്ശിച്ചില്ല. ഡി.എ കുടിശ്ശികയുടെ മുന് കാല പ്രാബല്യം 8 ഗഡുക്കളായി നല്കുമെന്നായിരുന്നു മുന് ധനകാര്യമന്ത്രിയായിരുന്ന കെഎന് ബാലഗോപാല് കഴിഞ്ഞ ബജറ്റില് പ്രഖ്യാപിച്ചത്. ഇത്തവണ 2 ഗഡുവാണ് നല്കേണ്ടത്. ഇത് നടപ്പാക്കാന് ഈ വര്ഷം 9000 കോടിയിലധികം രൂപ വേണ്ടിവരും.
2026 മാര്ച്ച് 6ലെ G.O.(P) No.44/2026/FIN സര്ക്കാര് ഉത്തരവ് പ്രകാരം ഡി.എ/ ഡി.ആര് കുടിശ്ശിക 2026-27 സാമ്പത്തിക വര്ഷം മുതല് നാല് വര്ഷത്തിനുള്ളില് എട്ട് തുല്യ ഗഡുക്കളായി, പ്രതിവര്ഷം രണ്ട് ഗഡുക്കള് വീതം നല്കുമെന്നായിരുന്നു മുന് സര്ക്കാരിന്റെ പ്രഖ്യാപനം. ഇതനുസരിച്ച് 2026-27 സാമ്പത്തിക വര്ഷത്തില് ആദ്യത്തെ രണ്ട് ഗഡുക്കള് നല്കേണ്ടതുണ്ട്. അതിനായി ഏകദേശം 9,014 കോടി രൂപ കണ്ടെത്തേണ്ടിവരും. ശമ്പളപരിഷ്കരണ കമ്മീഷനെ പറ്റിയും ബജറ്റില് പരാമര്ശം ഉണ്ടായില്ല. ജീവനക്കാരുടെ അടിസ്ഥാന ശമ്പളം വര്ധിപ്പിക്കുന്നതുമായി ബന്ധപ്പെട്ടുള്ള കാര്യങ്ങള് പരിശോധിച്ച് ശുപാര്ശ സമര്പ്പിക്കാന് കഴിഞ്ഞ, ഫെബ്രുവരിയിലാണ് കേരള സര്ക്കാര് ശമ്പളകമ്മീഷനെ നിയോഗിച്ചത്.
തുടര്ന്ന് ശുപാര്ശ സമര്പ്പിക്കാന് മൂന്ന് മാസത്തെ സമയവും നല്കിയിരുന്നു. എന്നാല്, ജൂണ് പകുതിയാകാറായിട്ടും ശമ്പളപരിഷ്കരണം പ്രഖ്യാപിക്കാത്തതിനാല്, ബജറ്റില് എന്തെങ്കിലും പ്രഖ്യാപനമുണ്ടാകുമെന്നായിരുന്നു ജീവനക്കാരുടെ പ്രതീക്ഷ. എന്നാല്, ശമ്പള പരിഷ്കരണത്തെ പറ്റി ഒന്നും ബജറ്റില് സൂചിപ്പിച്ചില്ല. കമ്മീഷനില് അഴിച്ചുപണിക്ക് സാധ്യതയുണ്ടെന്നായിരുന്നു റിപ്പോര്ട്ട്. കഴിഞ്ഞ സര്ക്കാരിന്റെ അവസാന മാസങ്ങളിലാണ് പന്ത്രണ്ടാം ശമ്പളകമ്മീഷന് രൂപീകരിച്ചത്. ശുപാര്ശ സമര്പ്പിക്കാന് മൂന്ന് മാസത്തെ കാലാവധിയും നല്കി. എന്നാല് മൂന്ന് മാസത്തിനിടെ കാര്യമായ പ്രവര്ത്തനങ്ങള് നടന്നിട്ടില്ല. കാലാവധി നീട്ടണമെന്ന് കമ്മീഷന് ആവശ്യപ്പെട്ടെങ്കിലും സര്ക്കാര് തീരുമാനമെടുത്തിട്ടില്ല. എല്ഡിഎഫ് സര്ക്കാര് നിയമിച്ച കമ്മിഷനുമായി മുന്നോട്ട് പോകാന് യുഡിഎഫ് സര്ക്കാരിന് താല്പര്യമില്ലെന്നാണ് വിവരം.
അതുകൊണ്ട് തന്നെ, നിലവിലെ ചെയര്മാന് ഡോ. വിപി ജോയിയെ നിലനിര്ത്തി മറ്റ് രണ്ട് അംഗങ്ങളെ മാറ്റാന് ധനവകുപ്പ് ആലോചിക്കുന്നുണ്ടെന്നും വാര്ത്തകള് പ്രചരിച്ചിരുന്നു. ജീവനക്കാരുടെയും പെന്ഷന്കാരുടെയും ഡിഎ, ഡിആര് കുടിശ്ശിക 36,057 കോടി രൂപയാണ്. 2026 മാര്ച്ച് 31-ലെ കണക്കനുസരിച്ച് സര്ക്കാരിന്റെ മൊത്തം കുടിശ്ശിക ബാധ്യതയായ 48,733 കോടി രൂപയില് ഏറ്റവും വലിയ വിഹിതം സര്ക്കാര് ജീവനക്കാര്, അധ്യാപകര്, സര്വീസ് പെന്ഷന്കാര്, കുടുംബ പെന്ഷന്കാര് എന്നിവര്ക്ക് നല്കാനുള്ള ക്ഷാമബത്ത കുടിശ്ശികയാണ്. 2021 ജനുവരി 1 മുതല് 2026 ഫെബ്രുവരി 28 വരെയുള്ള കാലയളവിലെ ക്ഷാമബത്തയുടെയും ക്ഷാമാശ്വാസത്തിന്റെയും മൊത്തം തുക 36,057 കോടി രൂപയാണെന്നാണ് കണക്ക്.
